VINAYAYUTE LOKAM ... വിനയയുടെ ലോകം

അനന്തരഫലം

2011-12-15T19:09:00.000-08:00

അനന്തരഫലം
തൃശൂര്‍ ജില്ലാ ആശുപത്രിയുടെ പരിസരത്ത് കാര്‍ പാര്‍ക്കുചെയ്യുമ്പോള്‍ ഒരു പോലീസ് ജീപ്പ് എന്റെടുത്തു നിര്‍ത്തി വിനയാ.... എന്നു വിളിച്ചു.ഞാന്‍ തിരിഞ്ഞുനോക്കി.എന്നെ സംബന്ധിച്ചിടത്തോളം പറഞ്ഞറിയിക്കാനാകാത്ത സന്തോഷം നല്കിയ ഒരു കാഴ്ചയായിരുന്നു അത്. ജീപ്പിന്റെ ഡ്രൈവര്‍ സീറ്റില്‍ ഒരു പോലീസുകാരി.എന്നെ വിളിച്ചത് എന്റെ ബാച്ചില്‍ ട്രെയിനിംഗ് കഴിഞ്ഞ എലിസബത്ത് (അവരിപ്പോള്‍ തൃശ്ശൂര്‍ വനിതാസെല്ലില്‍ സര്‍ക്കിള്‍ ഇന്‍സ്‌പെക്ടറാണ്).വര്‍ഷങ്ങള്‍ക്കു മുമ്പ് ജീപ്പോടിക്കാന്‍ സമ്മതം ചോദിച്ചതിന്റെ പേരില്‍ ഇനി വനിതാപോലീസ് ജീപ്പോടിക്കാഞ്ഞിട്ടാ..... ആളുകള് മനസ്സമാധാനത്തോടെ നടക്കുന്നതില്ലാതാക്കാന്‍..എന്നു തുടങ്ങിയ കമന്റെുകളും, ഓതറൈശേഷന്‍ തരില്ലെന്ന പുരുഷ മേലുദ്യോഗസ്ഥരുടെ ദുര്‍വ്വാശിക്കും മുന്നില്‍ നാണം കെട്ട് നില്‌ക്കേണ്ടി വന്ന എന്റെ പ്രയത്‌നത്തിന്റെ അനന്തരഫലം ......... തിരക്കുപിടിച്ച തൃശ്ശൂര്‍ ടൗണിലും കൊല്ലം ടൗണിലും ഞാനുള്‍പ്പെടെ ചുരുക്കം ചില പോലീസുകാരികള്‍ ഒരാളുടേയും മനസ്സമാധാനം തകര്‍ക്കാതെ കളിയാക്കിയവര്‍ക്കുപോലും പലപ്പോഴും സഹായികളായി അഭിമാനത്തോടെ ഇന്ന് പോലീസ് ജീപ്പ് ഓടിക്കുന്നു.

ഞെളിയന്‍ പറമ്പുകള്‍

2011-12-09T20:02:00.000-08:00

ഞെളിയന്‍ പറമ്പുകള്‍
അമ്മ ഓര്‍മ്മ എന്ന പുസ്തകം വായിച്ചതാണ് ഈ കുറിപ്പിനാധാരം.ചില എഴുത്തുകാര്‍ അവരുടെ അമ്മമാരെക്കുറിച്ച് എഴുതിയ ലേഖനങ്ങളാണ് ഈ പുസ്തകത്തില്‍.ജീവിച്ചിരുന്നപ്പോള്‍ അമ്മമാരെ അംഗീകരിക്കാന്‍ മടിച്ചവരും മറന്നവരും സ്ത്രീത്വത്തെ വിലമതിക്കാത്തവരും ,അവരെ അപമാനിച്ചവരും ണരിച്ചശേഷം അമ്മ ഓര്‍മ്മകള്‍ എഴുതുമ്പോള്‍ ജീവിച്ചിരിക്കുന്ന അവരുടെ കുട്ടികളുടെ അമ്മമാരെക്കുറിച്ചെന്തു പറയുന്നു.ജീവിച്ചിരിക്കുന്ന ലക്ഷങ്ങളോളം അമ്മമാരെ മനുഷ്യരായിപ്പോലും അംഗീകരിക്കാത്തവര്‍ മരണശേഷം അമ്മ ഓര്‍മ്മകള്‍ എഴുതി മനശ്ശാന്തി തേടുകയാണ്.ഇവരുടെയെല്ലാം സ്‌ക്കൂള്‍,കോളേജ് ജോലി രേഖകളില്‍ ഈ അമ്മമാരുടെ പേരു പോലും parent/guardian എന്നീ തലങ്ങളില്‍ ചേര്‍ത്തിട്ടുണ്ടാവില്ല.എന്തിന് വിവാഹ ക്ഷണക്കത്തില്‍ പോലും ഈ വിശുദ്ധ അമ്മമാരുടെ പേര് കാണിച്ചിട്ടുണ്ടാവില്ല.അമ്മ ....ജീവിതത്തിലോ,രേഖകളിലോ ഇല്ലാത്തവര്‍ അമ്മയുടെ മരണശേഷം എഴുതുന്ന ഈ ഓര്‍മ്മകള്‍ പുതു തലമുറയെ വഴിതെറ്റിക്കാന്‍ മാത്രം ഉതകുന്നതാണ്.'ഓര്‍മ്മക്കു വേണ്ടി 'ഓര്‍മ്മിക്കാന്‍' വേണ്ടി ജീവിക്കുന്നവരാകാന്‍ സ്ത്രീകളെ ഇത്തരം അമ്മ ഓര്‍മ്മകള്‍ ഓര്‍മ്മിപ്പിക്കുന്നു.
ഏതൊരു ക്ലീന്‍ സിറ്റിക്കു പുറകിലും ഒരു ഞെളിയന്‍ പറമ്പുണ്ടാകും എന്നു പറയും പോലെ.(കോഴിക്കോട് നഗരത്തിന്റെ മാലിന്യങ്ങള്‍ ഏറ്റുവാങ്ങുന്ന ഗ്രാമമാണ് ഞെളിയന്‍ പറമ്പ്)
സ്ത്രീകള്‍ ഇന്നനുഭവിക്കുന്ന അടിമത്തവും വിവേചനവും ശരിയാണെന്ന് നമ്മെ പഠിപ്പിച്ച നമ്മുടെ മുന്‍ തലമുറകളേയും ആ മൂല്യ ബോധത്തേയും നമ്മള്‍ അവഗണിക്കുകയും ഇത്തരം മൂല്യബോധങ്ങള്‍ നമ്മെ പഠിപ്പിച്ച് സ്ത്രീയുടെ ഇന്നത്തെ അവസ്ഥക്ക് കാരണക്കാരാവുകയും ചെയ്ത ഇവര്‍ മാപ്പര്‍ഹിക്കാത്ത കുറ്റം ചെയ്തവര്‍ തന്നെയാണ്.ഈ ശാപ വചനം വരും തലമുറ നമ്മെക്കൊണ്ടും പറയാതിരിക്കണമെങഅകില്‍ തുടര്‍ന്നുവരുന്ന ഈ മൂല്യബോധം നാം മാറ്റുക തന്നെ വേണം

2011-10-17T23:45:00.000-07:00

എന്റെ വിധി

അപേക്ഷാ ഫോറങ്ങളിലെ പുരുഷാധിപത്യത്തെ ചോദ്യം ചെയ്‌ത്‌ 1999 ല്‍ ബഹുമാനപ്പെട്ട കേരളാ ഹൈക്കോടതിയില്‍ ഞാന്‍ ഫയല്‍ ചെയ്‌ത writt op യില്‍ (2001 വര്‍ഷം) തികച്ചും അനുകൂലമായ വിധി നേടാനെനിക്കായി. ആ വിധി impliment ചെയ്യുന്നതിനായി അന്നു മുതല്‍ തന്നെ ഞാന്‍ കഠിനമായി പശ്രമിക്കുകയും ചെയ്‌തു പോരുന്നു.തുടര്‍ച്ചയായുള്ള എന്റെ പരിശ്രമത്തിന്റെ ഫലമായി സ്‌ക്കൂള്‍ അറ്റന്റെന്‍സ്‌ ബുക്കിലും psc അപേക്ഷാ ഫോറങ്ങളിലും റവന്യൂ വകുപ്പിറക്കിയ പട്ടയത്തിന്റെ ഫോമിലും (ഫോറം 6) മാറ്റം വരുത്തുന്നതിലും, തുടര്‍ച്ചയായുള്ള ഇടപെടല്‍ നിമിത്തം സര്‍ക്കാര്‍ മേല്‍ വിധി നടപ്പില്‍ വരുത്തുന്നതിന്‌ എല്ലാ വകുപ്പുകള്‍ക്കും നിര്‍ദ്ദേശം നല്‌കുന്ന GO ഇറക്കുകയും ചെയ്‌തു.എന്നിട്ടും ഈ വിധി പൂര്‍ണ്ണമായും നടപ്പില്‍ വരുത്തുന്നതിനു കഴിഞ്ഞിട്ടില്ല.ഈ വിധി ഫലത്തിലെത്തിക്കാന്‍ നിങ്ങളുടെ ഓരോരുത്തരുടേയും സഹായ സഹകരണങ്ങള്‍ ഞാന്‍ പ്രതീക്ഷിക്കുന്നു.കോടതി വിധിയും, ഗവ: ഓര്‍ഡറും നിങ്ങളുടെ അറിവിലേക്കായി ഇവിടെ ചേര്‍ക്കുന്നു.(കംമ്പ്യൂട്ടര്‍ expert അല്ലാത്തതിന്റെ പോരായ്‌മകള്‍ ക്ഷമിക്കുമല്ലോ....... )

B.N SRIKRISHNA, & RAMACHANDRAN

-------------------------------------------------------------

(O.P.No.28856 of 1999,I)

----------------------------------------------------------------------------

Dated this the 27th day of september, 2001

JUDGEMENT

Sri Krishna,C.J

-------------------

Though a large number of sweeping prayers are made ,some of which required changing of the social mindest.It is not possible for this court to entertain the prayers .The only legitimate prayer which appeals to us is that THE FORMS RINTED BY THE GOVERMENT SHOULD BE GENDER NEUTRAL SHOULD PROVIDE ALTERNATIVE OF BOTH GENDERS,unlike the one shownas ext-P1(2).We direct that respondence 1 and 2 should amend the concerned forms suitably when reprinting them, so that the grevance of this nature of gender discrimination does not arise in future.

With this direction we close this Original petition

(B.N.SRIKRISHNA)

(Chief Justice)

(RAMACHANDRAN)

Judge

കേരള സര്‍ക്കാര്‍

‍പൊതുഭരണ(ഏകോപന)വകുപ്പ്‌

സര്‍ക്കുലര്‍നമ്പര്‍ 15800/സി.ഡി.എന്‍4/2004/പൊ.ഭ.വ തിരുവനന്തപുരം 2004 ഏപ്രില്‍ 27.

വിഷയം- സര്‍ക്കാര്‍ ഫോറങ്ങള്‍ ലിംഗഭേദം പ്രതിഫലിപ്പിക്കാതെ അച്ചടിക്കുന്നത്‌ സംബന്ധിച്ച്‌

സൂചന- 28856/99-നമ്പര്‍ ഒ.പി യിലെ ബഹു ഹൈക്കോടതിയുടെ 27-09-2001 ലെ വിധിന്യായം

പൊതു ആവശ്യങ്ങള്‍ക്കായി നിലവിലുള്ള പല സര്‍ക്കാര്‍ ഫോറങ്ങളിലും കൈവശ ഭൂമി,വീട്‌,കുടുംബം ഇത്യാതി രേഖപ്പെടുത്തേണ്ട കോളങ്ങളില്‍ ,കൈവശക്കാരന്‍ / കുടുംബ നാഥന്‍ എന്നിങ്ങനെ പുരുഷനെ മാത്രമാണ്‌ സൂചിപ്പിക്കുന്നത്‌.സര്‍ക്കാരിന്റെ ഫോറങ്ങള്‍ സ്‌ത്രീ പുരുഷഭേദമില്ലാത്തതാകണമെന്നും , അതിനാല്‍ ഫോറങ്ങള്‍ പുതുതായി അച്ചടിക്കുമ്പോള്‍ രണ്ടു വിഭാഗങ്ങളേയും തുല്യമായി സൂചിപ്പിക്കുന്ന തരത്തില്‍ ആവശ്യമായ ഭേദഗതി വരുത്തേണ്ടതാണെന്നും സൂചനയിലെ വിധിന്യായത്തില്‍ , ബഹുമാനപ്പെട്ട കേരളാ ഹൈക്കോടതി നിര്‍ദ്ദേശിച്ചിട്ടുണ്ട്‌.എന്നാല്‍ പ്രസ്‌തുത വിധിക്കു ശേഷം അച്ചടിച്ചിട്ടുള്ള ഫോറങ്ങളിലും ,മേല്‍ പറഞ്ഞ മാറ്റങ്ങള്‍ വരുത്തിയിട്ടില്ലെന്ന കാര്യം സര്‍ക്കാരിന്റെ ശ്രദ്ധയില്‍ പെടുകയുണ്ടായി.ഇത്‌ കോടതി വിധിയുടെ ലംഘനവും ഗുരുതരമായ വീഴ്‌ചയുമായി സര്‍ക്കാര്‍ കാണുന്നു.ഈ സാഹചര്യത്തില്‍ ഇത്തരം ഫോറങ്ങള്‍ പുതിയതായി അച്ചടിക്കുമ്പോള്‍ , സ്‌ത്രീ പുരുഷ പക്ഷഭേദമില്ലാത്ത രീതിയില്‍ രണ്ട്‌ വിഭാഗങ്ങള്‍ക്കും തുല്യത ഉറപ്പു വരുത്തേണ്ടതാണെന്ന്‌ ഇതിനാല്‍ നിര്‍ദ്ദേശിച്ചു കൊള്ളുന്നു.ഫോറത്തിന്റെ മാതൃക അനുബന്ധമായി ചേര്‍ത്തിട്ടുണ്ട്‌.

കയ്‌ക്കും പുളിക്കും മുന്തിരിങ്ങ

2011-07-26T17:20:00.000-07:00

കയ്‌ക്കും പുളിക്കും മുന്തിരിങ്ങ

തൃശൂര്‍ പൂരത്തിനോടനുബന്ധിച്ചുള്ള സാമ്പിള്‍ വെടിക്കെട്ടു ദിവസം യാതൊരു ശല്യവുമനുഭവിക്കാതെ റൗണ്ടിലൂടെ നടന്നു നീങ്ങിയ അനുഭവം സുഹൃത്തുക്കളോട്‌ വിവരിക്കുകയായിരുന്നു.കൂട്ടത്തില്‍ മിടുക്കിയായ സാരി മാത്രം ധരിക്കാറുള്ള സ്‌ത്രീ "വിനയാ...... തിരക്കിലൂടെ നടന്നു മാത്രമേ തിരക്കാസ്വദിക്കാന്‍ കഴിയൂ എന്നു പറയുന്നതിലര്‍ത്ഥമില്ല.ഞങ്ങളും മാറി നിന്നുകൊണ്ട്‌ തിരക്ക്‌ ആസ്വദിച്ചു.പിന്നെന്താണതിലിത്ര പ്രത്യേകത ?"അവര്‍ അല്‌പം ഗമയില്‍ തന്നെ ചോദിച്ചു.
"അതെ മാഡം.അങ്ങനെ ആസ്വദിക്കുക മാത്രമേ നിങ്ങള്‍ക്കു നിവൃത്തിയുള്ളൂ.ഒരേ സമയം എനിക്കിതിനു രണ്ടിനും കഴിയും എന്നുള്ളതുമാത്രമാണ്‌ ഇതിന്റെ പ്രത്യേകത".ഞാനും ഗമയില്‍ മറുപടി പറഞ്ഞു

ഒരേ പുസ്തകം

2011-06-16T10:29:00.000-07:00

ഒരേ പുസ്തകം
ഒരു സ്വകാര്യ നിമിഷത്തില്‍ ഏറെ ആവേശത്തോടെ ഒരു ചെറുപ്പക്കാരന്‍ എന്നോടു പറഞ്ഞു.
'വിനയാ... ഞാന്‍ വിനയയുമായി സെക്‌സില്‍ ഏര്‍പ്പെടുന്നത് എങ്ങനെയായിരിക്കും എന്ന് പറയട്ടെ...''
ഞാന്‍ അയാളെ പറയാനനുവദിച്ചു.
അയാളുടെ നമ്പര്‍ക്രമം വിശദമായി കേട്ടശേഷം ഞാന്‍ അയാളോട് പറഞ്ഞു- 'ഇക്കാലത്തിനുള്ളില്‍ കുറഞ്ഞത് ഒരു മുപ്പത്‌പേരെങ്കിലും എന്നോടിതേ ക്രമത്തില്‍ പറഞ്ഞിട്ടുണ്ട്. നിങ്ങളെല്ലാവരും വായിച്ചത് ഒരേ പുസ്തകം തന്നെയായിരിക്കും അല്ലേ?....

എന്തെളുപ്പം

2011-06-02T09:50:00.000-07:00

എന്തെളുപ്പം
'സാറേ ഞങ്ങളെ ജംഗ്ള്‍ ട്രയിനിംങ്ങില്‍ നിന്നും ഒഴിവാക്കി.ഞങ്ങളെല്ലാവരും വില്ലിംഗ് ആയിരുന്നു. ഞങ്ങളം കൂടി പോയാല്‍ അലിഗേഷനാകും പോലും ഞങ്ങളേയും കൂടി കൊണ്ടുപോകാന്‍ സാറൊന്നു പറയുമോ ?'. ഒരു പെണ്‍ പോലീസ് ട്രയിനി വളരെ രഹസ്യമായി തഞ്ചത്തില്‍ എന്നെ കണ്ടു കിട്ടിയപ്പോള്‍ ആവേശത്തോടെ പറഞ്ഞുപോയ വരികളാണിവ.കാര്യങ്ങള്‍ അന്യേഷിച്ചതില്‍ സംഗതി സത്യമാണെന്ന് ാേബോധ്യപ്പെട്ടു. എന്റെ ഇടപെടല്‍ കൊണ്ട് പ്രത്യേകിച്ചൊരു ഗുണവും ഉണ്ടാകില്ലെന്ന് കൃത്യമായ അറിവുണ്ടായിട്ടും ട്രെയിനിംഗിന്റെ ചുമതലയുള്ള ഉഥടജ യെ കണ്ട് ആ പെണ്‍കുട്ടികളെക്കൂടി ജംഗ്ള്‍ ട്രയിനിംഗില്‍ ഉള്‍പ്പെടുത്തണമെന്ന് അപേക്ഷിക്കുന്നതിനായി ഞാന്‍ പിറ്റേ ദിവസം തന്നെ ഡി.വൈ.എസ്.പി യുടെ മുറിയിലേക്ക് കയറി.
ഏറെ മര്യാദപൂര്‍വ്വം തനിക്കഭിമുഖമായ കസേര ചൂണ്ടി എന്നോടിരിക്കാനാവശ്യപ്പെട്ട് കാര്യമന്യേഷിച്ച ഡി.വൈ എസ്.പി.യോട് എന്തിനാണ് പെണ്‍കുട്ടികളെ ജംഗിള്‍ ട്രയിനിംങ്ങില്‍ നിന്ന് ഒഴിവാക്കിയതെന്ന് ഞാന്‍ ചോദിച്ചപ്പോള്‍ കൂടുതല്‍ നടക്കേണ്ട ദിവസവും എല്ലാ രാത്രിയും മാത്രമാണ് അവരെ ഒഴിവാക്കിയതെന്ന് മറുപടി പറഞ്ഞു. രാത്രിയില്‍ കാട്ടില്‍ നടക്കുന്നതിലെ വ്യത്യസ്തമായ അനുഭവം പുരുഷ പോലീസുകാരെപ്പോലെ സ്ത്രീപോലീസുകാര്‍ക്കും അറിയണമെന്ന് വനിതാപോലീസ് ട്രയിനികള്‍ക്കും ആഗ്രഹമുണ്ടെന്നും അതിനവര്‍ തയ്യാറുമാണ്. എന്നിട്ടും അവരെ എന്തിനാണ് സാര്‍ ഒഴിവാക്കുന്നത് എന്ന് ഞാന്‍ വീണ്ടും ചോദിച്ചു. അല്ലെങ്കില്‍ തന്നെ ധാരാളം ആരോപണങ്ങള്‍ ഉണ്ടെന്നും ഇനി പെണ്‍പോലീസിന് രാത്രി കാട്ടില്‍ ട്രെയിനിങ്ങിന് വിട്ടാല്‍ പത്രക്കാര്‍ അതുമിതും എഴുതിയുണ്ടാക്കുമെന്നും അതിനാലാണ് അത് അനുവദിക്കാതിരുന്നതെന്നും അദ്ദേഹം വിശദമാക്കി.
ശരിയാണ് സാര്‍. എപ്പോഴും സമൂഹത്തില്‍ ഏത് ആരോപണമുണ്ടായാലും ആരോപണമുണ്ടാകാന്‍ വിദൂര സാധ്യതയുണ്ടായാലും മാറ്റിനിര്‍ത്താന്‍ എളുപ്പം സ്ത്രീകളെയാണല്ലോ. പരിഹാരവും എത്ര എളുപ്പം!! സദാചാരത്തിന്റെ പേരിലും മഞ്ഞപ്പത്രങ്ങളെപ്പേടിച്ചും മാറ്റിനിര്‍ത്തപ്പെടേണ്ടത് സ്ത്രീകളാണെന്ന കാര്യത്തില്‍ ആര്‍ക്കും ഒരു എതിരഭിപ്രായവുമില്ല. എന്തൊരത്ഭുതം പട്ടി കടിക്കുമെന്ന് കരുതി മനുഷ്യരെ കെട്ടിയിടാന്‍ ആഹ്വാനം ചെയ്യുന്ന സംസ്‌കാരമെന്ന പാപരത്വം!!

പടിയിറക്കം

2011-03-27T10:31:00.000-07:00

പടിയിറക്കം

വൈകിയാണേലും പ്രമോഷനോടെ സ്ഥലംമാറിപ്പോകുന്ന എന്നോട്‌ പോലീസുകാര്‍ സ്‌റ്റേഷനില്‍ ചിലവുചെയ്യാന്‍ ആവശ്യപ്പെട്ടപ്പോള്‍ സന്തോഷത്തോടെ ഞാനാകര്‍മ്മം ചെയ്‌തു.ഏകദേശം 1500 രൂപയോളം മുടക്കി ഞാന്‍ പോലീസകാര്‍ക്ക്‌ പ്രഭാത ഭക്ഷണം നല്‌കി.25 പോലീസുകാര്‍ ആ സന്തോഷത്തില്‍ പങ്കു ചേര്‍ന്നു.പോലീസ്‌ സ്‌റ്റേഷനില്‍ സാധാരണ ഒരാള്‍ പ്രമോഷനോടെ ട്രന്‍സ്‌ഫര്‍ ആയാല്‍ അയാള്‍ പോലീസുകാര്‍ക്ക്‌ ചെലവു ചെയ്യുകയും തിരിച്ച്‌ പോലീസുകാര്‍ അവര്‍ക്ക്‌ യാത്രയയപ്പ്‌ നല്‌കുകയും അതിന്റെ തുക പിരിച്ചെടുക്കുകയുമാണ്‌ പതിവ്‌.ഇത്തരം യാത്രയയപ്പുകള്‍ക്കെല്ലാം അര്‍ഹത ആണ്‍പോലീസുകാര്‍ക്ക്‌ മാത്രമാണെന്ന ധാരണ സ്‌റ്റേഷനിലുണ്ടെന്ന്‌ ഞാന്‍ തിരിച്ചറിഞ്ഞത്‌ എന്റെ നേരിട്ടുള്ള അനുഭവത്തില്‍ നിന്നു തന്നെയാണ്‌.
ഇക്കഴിഞ്ഞ മാര്‍ച്ചുമാസം അഞ്ചാം തിയ്യതി ഞാനുള്‍പ്പെടെ എട്ടോളം പോലീസുകാരികള്‍ പ്രമോഷനോടെ വയനാടു ജില്ലയില്‍ നിന്നും തൃശൂര്‍ ജില്ലയിലേക്ക്‌ ട്രാന്‍സ്‌ഫര്‍ ആയി. ഓര്‍ഡര്‍ വന്ന അതേ ദിവസം തന്നെ ഞങ്ങള്‍ അതാതു സ്‌റ്റേഷനുകളില്‍ നിന്ന്‌ റിലീവ്‌ ചെയ്‌തു.ജില്ല മാറിയുള്ള സ്ഥലംമാറ്റമായതിനാല്‍ ഞങ്ങള്‍ക്ക്‌ ഒരാഴ്‌ച ജോയിനിംഗ്‌ ലീവുണ്ടായിരുന്നു.നിങ്ങള്‍ക്ക്‌ നാളയോ മറ്റന്നാളോ ഞങ്ങളും ചെലവുചെയ്യും അറിയിക്കാം എന്നവര്‍ എന്നോടു പറഞ്ഞതുകൊണ്ട്‌ പോകുന്നതിനു രണ്ടു ദിവസം മുമ്പു വരെ ഞാനതു പ്രതീക്ഷിച്ചു.അപ്പോഴേക്കും പോലീസുകാരുടെ മനോഭാവം കൃത്യമായി മനസ്സിലാക്കാനെനിക്കു കഴിഞ്ഞു.എന്റെ സംശയം ദുരീകരിക്കാന്‍ ബത്തേരിയില്‍ നിന്നും ട്രാന്‍സ്‌ഫര്‍ ആയ റംല എന്ന പോലീസുകാരിയെ വിളിച്ച്‌ കാര്യം തിരക്കി."വിനയേ 2000 രൂപയോളം ഞാന്‍ മുടക്കി .ഇന്നു തരും നാളെത്തരും എന്നു പോലീസുകാര്‍ ഓരോരുത്തരായി ഒന്നു രണ്ടു പ്രാവശ്യം പറഞ്ഞതല്ലാതെ എന്നെയാരും വിളിച്ചിട്ടൊന്നുമില്ല"
"താനതേക്കുറിച്ച്‌ പോലീസുകാരോട്‌ എന്തെങ്കിലും സംസാരിച്ചോ "ഞാന്‍ അവളോടു തിരക്കി
"എനിക്കു വേണ്ട വിനയേ അവരുടെ നാണം കെട്ട ചെലവ്‌ " എല്ലാ വികാരവും പ്രകടമാക്കികൊണ്ട്‌ റംല മറുപടി നല്‌കി.
എനിക്കര്‍ഹതപ്പെട്ട യാത്രയയപ്പ്‌ റംലയെപ്പോലെ വേണ്ടെന്നു വെക്കാന്‍ ഞാന്‍ തയ്യാറല്ലായിരുന്നു.തൃശൂരില്‍ പോകുന്നതിനു രണ്ടു ദിവസം മുമ്പ്‌ പേഴ്‌സണല്‍ റിക്കാര്‍ഡ്‌ വാങ്ങാനായി സ്റ്റേഷനില്‍ പോയപ്പോള്‍ എന്റെ യാത്രയയപ്പ്‌ ഞാന്‍ തന്നെ പറഞ്ഞ്‌ സെറ്റപ്പാക്കി.ചായയും ലഡു,കേക്ക്‌ ,ബിസ്‌ക്കറ്റ്‌, മിഠായി തുടങ്ങിയവയുള്ള ഒരു ചെറിയ പാക്കറ്റ്‌.കൂടെ ഒരു ചെറിയ മീറ്റിംങും.ഉത്‌ഘാടനം,ആശംസ,മറുപടി നന്ദി.അര മണിക്കൂറിനുള്ളില്‍ ഏറെ അക്ഷമയോടെ എല്ലാം കഴിച്ചു.
പോലീസുകാര്‍ക്കു വേണ്ടി 1500 രൂപയോളം മുടക്കിപ്പോയ എനിക്ക്‌ അവരെക്കൊണ്ട്‌ തിരിച്ച്‌ 250 രൂപയെങ്കിലും മുടക്കിപ്പിക്കാന്‍ കഴിഞ്ഞല്ലോ എന്ന സംതൃപ്‌തിയാലെ ഞാന്‍ അമ്പലവയല്‍ സ്റ്റേഷന്റെ പടിയിറങ്ങി.

എനിക്കു കിട്ടിയ പുരസ്‌ക്കാരം

2011-02-24T08:33:00.000-08:00

എനിക്കു കിട്ടിയ പുരസ്‌ക്കാരം
അബുദാബിയിലെ KSC ,ISC സംഘടനകള്‍ സംഘടിപ്പിച്ച സ്‌ത്രീയും സാമൂഹിക നിര്‍മ്മിതിയും എന്ന വിഷയത്തിലെ സെമിനാറില്‍ സംസാരിക്കുകയായിരുന്നു.(26 / 01/2011 തിയ്യതി മുതല്‍ 4 /02 /2011 l തിയ്യതി വരെ മേല്‍ സംഘടകളുടെ അഥിതിയായി UAE യില്‍ കഴിയുന്നതിനുള്ള ഭാഗ്യം എനിക്കും ദാസേട്ടനും ഉണ്ടായി)ചര്‍ച്ച യുടെ സമയമായപ്പോള്‍ ഞാനെന്റെ പതിവു ശൈലിയില്‍ ചര്‍ച്ചക്ക്‌ തുടക്കമിട്ടുകൊണ്ട്‌ സദസ്സിനോടായി പറഞ്ഞു
"നിങ്ങള്‍ക്കെന്തും എന്നോടു ചോദിക്കാം പക്ഷേ ഒന്നെനിക്കുറപ്പുണ്ട്‌ നിങ്ങള്‍ക്കൊരിക്കലും എന്നെ തോല്‍പ്പിക്കാനാവില്ല.............. ok ചോദ്യങ്ങല്‍ വരട്ടെ" ഞാന്‍ സദസ്സിലെ ചോദ്യങ്ങള്‍ക്കായി കാത്തു നിന്നു..
ഉടനെ തന്നെ മുന്നിലിരുന്ന ഒരു സ്‌ത്രീഎഴുന്നേറ്റു നിന്ന്‌ ആവേശത്തോടേയും അഭിമാനത്തോടേയും പറഞ്ഞു" വിനയാ................. ആരും നിങ്ങളെ തോല്‍പ്പിക്കാന്‍ പാടില്ല. ഈ ലോകം നിങ്ങളെ തോല്‍പ്പിച്ചു എന്നു കേള്‍ക്കാനിഷ്ടപ്പെടുന്നില്ല.വിനയയുടെ തോല്‍വി ഞങ്ങള്‍ക്ക്‌ സഹികകാന്‍ കഴിയില്ല.നിങ്ങളെന്നും ജയിക്കണം ജയിക്കാനേ പാടുള്ളൂ
അവര്‍ പറഞ്ഞതിനു പിന്നാലെ അവര്‍ പറഞ്ഞതിനെ അനുകൂലിച്ചുകൊണ്ട്‌ സദസ്സില്‍ കൈ.്‌യ്യടിയുയര്‍ന്നു
ഒരു നിമിഷം എനിക്കു ശബ്ദിക്കാനായില്ല . ലോകം എന്നെ സ്വീകരിച്ചിരിക്കുന്നു എന്നതിന്റെ പ്രകടമായ തെളിവ്‌ .ഞാന്‍ മനസ്സില്‍ പറഞ്ഞു എനിക്കു കിട്ടിയ പുരസ്‌ക്കാരം

"അല്ലാ....... പെണ്ണ്‌ങ്ങക്ക്‌ ഇങ്ങനിരിക്കാന്‍ പാട്വോ

2011-01-18T08:18:00.000-08:00

അടുത്ത ബന്ധുവിന്റെ വീട്ടില്‍ വിരുന്നിനു പോയതായിരുന്നു. രാത്രി അടുക്കളയിലെ സ്‌റ്റൂളില്‍ ഒരു കാല്‍ തറയിലും ഒരു കാല്‍ അടുക്കളയിലെ സ്ലാബിനുമുകളിലുമായി വെച്ച്‌ ആ വീട്ടിലെ മരുമകളുമായി വിശേഷങ്ങള്‍ പറയുകയായിരുന്നു.പെട്ടന്ന്‌ അടുക്കളയിലേക്കു വന്ന ആ വീട്ടിലെ രണ്ടാം ക്ലാസുകാരി വലതുകൈ താടിയില്‍ വച്ച്‌ അത്ഭുതത്തോടെ എന്നെ നോക്കുന്നതു കണ്ട്‌
"എന്താ മോളെ "എന്നുചോദിച്ചു.
ഉടനെ വന്നു അതിശയത്തോടെയുള്ള മറുചോദ്യം "അല്ലാ....... പെണ്ണ്‌ങ്ങക്ക്‌ ഇങ്ങനിരിക്കാന്‍ പാട്വോ ?

മനസുവൃത്തികേടാക്കി വീടു വൃത്തിയാക്കേണ്ട

2011-01-10T18:28:00.000-08:00

മനസുവൃത്തികേടാക്കി വീടു വൃത്തിയാക്കേണ്ട
ഒരു ദിവസത്തെ നൈറ്റ്‌ റെസ്റ്റില്‍ വീട്ടിലെത്തിയതായിരുന്നു ദാസേട്ടന്‍(ചേവായൂര്‍ പോലീസ്‌ സ്‌റ്റേഷനിലെ അസി.സബ്ബ്‌ ഇന്‍സ്‌പെക്ടറാണ്‌) വന്ന പാടേ ഭക്ഷണം കഴിച്ച്‌ ദാസേട്ടന്‍ പതിവു പണികള്‍ തുടങ്ങി.ഞാനെന്തോ എഴുതിക്കൊണ്ടിരിക്കുകയായിരുന്നു. വീടു മുഴുവന്‍ വണ്ണാമ്പല കെട്ടിയത്‌ തട്ടിക്കളഞ്ഞും ബര്‍ത്തിലെ സാധനങ്ങള്‍ അടുക്കിവെച്ചും ദാസേട്ടന്‍ പ്രാക്ക്‌ തുടങ്ങി
"എപ്പോഴെങ്കിലും ഒഴിവുള്ള നേരം ഇതൊക്കെയൊന്ന്‌ തട്ടിക്കൂടേ..... ഈ വീടിന്റെയൊരു കോലം. ബാക്കിയുള്ളോന്‍ ഈ ാെറക്കൊഴിഞ്ഞു വന്നിട്ടുവേണം ...... എന്റെ എഴുത്തിന്റെ ശ്രദ്ധയെ ബാധിക്കാന്‍തുടങ്ങിയപ്പോള്‍ ഞാന്‍ ഇടപെട്ടു
"ദാസേട്ടാ നിങ്ങളിങ്ങനെ മനസു വൃത്തികേടാക്കി വീടു വൃത്തിയാക്കേണ്ട." മറ്റൊന്നും ശ്രദ്ധിക്കാതെ ഞാനെന്റെ എഴുത്തു തുടര്‍ന്നു.

മദാലസക്കുളി

2010-12-20T08:02:00.000-08:00

തൃശൂരിലെ ' കേരളീയം ' മാഗസിന്റെ സംഘാടകര്‍ സംഘടിപ്പിച്ച കുടജാദ്രി യാത്ര.10 സ്‌ത്രീകളും 10 പുരുഷന്മാരുമായിരുന്നു യാത്രയിലുണ്ടായിരുന്നത്‌.മൂന്നു ദിവസത്തെ യാത്ര എന്നെപ്പോലെ തന്നെ സംഘത്തിലെ ഓരോ അംഗങ്ങള്‍ക്കും ആവോളം മാനസീകോല്ലാസം പ്രദാനം ചെയ്‌തു എന്ന്‌ വിലയിരുത്തലില്‍ നിന്നും ബോധ്യമായി. യാത്രയില്‍ എനിക്കനുഭവപ്പെട്ട പ്രത്യേകത ആദ്യദിവസം വളരെ സ്വതന്ത്രമായി സൗഹൃദത്തില്‍ ഏര്‍പ്പെട്ടിരുന്നവര്‍ സൗപര്‍ണ്ണിക നദിക്കടുത്തെത്തിയപ്പോള്‍ രണ്ടു വിഭാഗമായി വേര്‍തിരിഞ്ഞു.സ്‌ത്രീകള്‍ പുരുഷന്മാര്‍ കുളിക്കുന്നത്‌ നോക്കി നിന്ന്‌ കൈ കാലുകള്‍ കഴുകുന്നു.ഞാന്‍ വസ്‌ത്രം മാറി ഒരു മുണ്ടെടുത്ത്‌ മുലക്കച്ചകെട്ടി പുരുഷന്മാര്‍ക്കൊപ്പം പുഴയിലിറങ്ങി നീന്താന്‍ തുടങ്ങി തെളിഞ്ഞവെള്ള മായതുകൊണ്ട്‌ മുണ്ട്‌ പാടെ നീങ്ങുന്നതുകൊണ്ട്‌ ഞാന്‍ കരക്കു കയറി സ്‌പോട്‌സ്‌ ഡ്രെസ്സെടുത്ത്‌ ധരിച്ചു. അപ്പോഴേക്കും മുലക്കച്ചകെട്ടിയും ചുരിദാര്‍ ധരിച്ചും പെണ്ണുങ്ങളും പെണ്‍കുട്ടികളും പുഴയിലിറങ്ങി.ഏകദേശം ഒരു മണിക്കൂറോളം ഞങ്ങള്‍ കുളിച്ചു.അതുപോലൊരുപുഴ ഒത്തു കിട്ടിയത്‌ മൂന്നാമത്തെ ദിവസമായിരുന്നു.ആണുങ്ങളില്‍ ചിലര്‍ ഷഡ്ഡി മാത്രം ധരിച്ചും കൂടുതല്‍ പേരും ഷഡ്ഡിക്കുമുകളില്‍ തോര്‍ത്തുമുണ്ട്‌ ധരിച്ചും കുളിച്ചു.ഷഡ്ഡി മാത്രം ധരിച്ച ആണുങ്ങള്‍ വളരെ സ്വതന്ത്രരായി മലര്‍ന്നും കമിഴ്‌ന്നും നീന്തിക്കളിച്ചപ്പോള്‍, ഷഡ്ഡിക്കു മുകളില്‍ തോര്‍ത്തു ധരിച്ചവര്‍ മലര്‍ന്നു നീന്തുമ്പോള്‍ മുണ്ടു മാറാതിരിക്കാന്‍ തന്ത്രപ്പെടുന്നത്‌്‌ ഞാന്‍ ശ്രദ്ധിച്ചു.ചുരിദാര്‍ ധരിച്ചും മുലക്കച്ച കെട്ടിയും നീന്തി കുളിക്കുന്ന സ്‌ത്രീകളും പെണ്‍കുട്ടികളുംസ്വന്തം ശരീരത്തില്‍ സോപ്പു തേക്കാന്‍ പെടുന്ന പെടാപ്പാടുകണ്ട്‌ എനിക്കു ചിരിവന്നു.കുറച്ചു നേരം രംഗം വീക്ഷിച്ച ഞാന്‍ ഒരു ഷോട്‌സും ബോഡിയും മാത്രം ധരിച്ച്‌ പുഴയിലേക്ക്‌ ചാടുകയും മലര്‍ന്നും കമിഴ്‌ന്നും നീന്തുകയും ചെയ്‌തതിനുശേഷം പാറപ്പുറത്തു കയറി നിന്ന്‌ ശരീരം മുഴുവന്‍ സോപ്പുതേച്ച്‌ പതപ്പിച്ചു.അതിനിടയില്‍ എല്ലാവരോടുമായി കൂട്ടത്തിലൊരു ചെറുപ്പക്കാരന്‍ നീന്തുന്നതിനിടയില്‍ വിളിച്ചു പറഞ്ഞു " നോക്ക്‌ വിനയചേച്ചിയുടെ മദാലസക്കുളി കണ്ടോ " ഞാന്‍ എന്റെ ദേഹത്തെ സോപ്പു പുരട്ടല്‍ തുടര്‍ന്നുകൊണ്ടു തന്നെ പറഞ്ഞു
"പിന്നേ.............. നിങ്ങള്‍ക്കു കിട്ടുന്ന ചെറിയ സന്തോഷത്തെ ഇല്ലാതാക്കാന്‍ ഞാനെന്റെ വലിയ സന്തോഷം വേണ്ടന്നുവെക്കൂലാ...ട്ടോ..."
എല്ലാവരും ചിരിച്ചു പിന്നേയും കുറേ സമയം ഞങ്ങള്‍ വെള്ളത്തില്‍ കളിച്ചു.സ്‌ത്രീകളും പുരുഷന്മാരും പരസ്‌പരം ശരീരം കണ്ടു പോയാല്‍ പ്രത്യേകിച്ചൊരപകടവും സംഭവിക്കാനില്ലെന്നെനിക്കന്നു മനസിലായി.അടുത്തയാത്രയില്‍ ഞങ്ങളെല്ലാവരും മദാലസക്കുളികുളിക്കും എന്നു പറഞ്ഞുകൊണ്ട്‌ ഒരു സ്‌ത്രീ എനിക്കു പിന്‍തുണ പ്രഖ്യാപിച്ചു.മറ്റു സ്‌ത്രീകള്‍ അതു ശരിവെക്കുകയും ചെയ്‌തു.

ദഹിക്കാഞ്ഞിട്ടാ

2010-12-07T17:10:00.000-08:00

ദഹിക്കാഞ്ഞിട്ടാ--------------

ചേച്ചിയുടെ മകളുടെ വിവാഹ നിശ്ചയം നിശ്ചയിക്കാനുള്ള തയ്യാറെടുപ്പിലാണ്‌ രണ്ടു കുടുംബത്തിലേയും മുതിര്‍ന്ന ആണുങ്ങള്‍.പതിവിനു വിപരീതമായി ചെക്കന്റെ വീട്ടില്‍ നിന്നും സ്‌ത്രീകളും ഉണ്ടായിരുന്നു.ഉമ്മറക്കോലായില്‍ ചടങ്ങിനിരിക്കാനുള്ള പായ വിരിച്ചു.പതിവുപോലെ മുതിര്‍ന്ന ആണുങ്ങള്‍ രണ്ടു ഭാഗങ്ങളായി അഭിമുഖമായിട്ടിരിക്കുന്നു.ശീലിച്ചതു പോലെ സ്‌ത്രീകളും മറ്റുള്ളവരും ചുറ്റിലും നിന്നു.ഞാനും നില്‌ക്കുന്നവരുടെ കൂട്ടത്തില്‍ മുന്നില്‍തന്നെ സ്ഥാനം പിടിച്ചു.പെട്ടന്ന്‌ ചെക്കന്റെ അച്ഛന്‍ എന്നെ നോക്കികൊണ്ട്‌ പറഞ്ഞു "വരിന്‍ നിങ്ങളും ഇരിക്ക്‌" തുടര്‍ന്ന്‌ ഇരിക്കുന്ന ആണുങ്ങള്‍ ഓരോരുത്തരും സ്‌ത്രീകളെ മാറിമാറി വിളിച്ചു.
സ്‌ത്രീകളുടെ മുഖത്തെ അന്ധാളിപ്പ്‌ കണ്ട്‌ ഞാന്‍ ഇടപെട്ടു.
"വേണ്ട മോഹനേട്ടാ നടക്കട്ടെ................"അവര്‍ ചടങ്ങ്‌ ആരംഭിച്ചു.
ചടങ്ങു കഴിഞ്ഞ്‌ മുറ്റത്തിറങ്ങിയ മോഹനേട്ടന്‍ എന്നോടു ചോദിച്ചു." എന്താ .......... വിനയപോലും ഇരിക്കാഞ്ഞത്‌?"
"ദഹിക്കാഞ്ഞിട്ടാ മോഹനേട്ടാ.............. ഇതുവരെ വിട്ടുനിന്നു ശീലിച്ചവരല്ലേ ഞങ്ങള്‍.കുറുക്കു പോലും തിന്നു തുടങ്ങാത്ത കുഞ്ഞിനു ബിരിയാണി എങ്ങനെ ദഹിക്കാനാ..........എനിക്ക്‌ സന്തോഷമുണ്ട്‌ മോഹനേട്ടാ........ നിങ്ങളുടെ മനസ്സില്‍ ഞങ്ങളും കൂടി വേണംന്ന്‌ തോന്നിയല്ലോ. ഞാന്‍ മറുപടി പറഞ്ഞു

ഭേദം

2010-12-04T02:09:00.000-08:00

ഭേദം
"സാറേ ഞാന്‍ ഹൈറുന്നീസ. കെട്ട്യോന്‌ വേറൊരു നിക്കാഹ്‌ കയ്‌ക്കാന്‍ വേണ്ടി ഞാന്‍ വീട്ടീന്നെറങ്ങണംന്ന്‌ പറഞ്ഞ്‌ ദെവസോം അടിതന്നെ .ഉമ്മെന്തിനാ തല്ലുകൊള്ളാന്‍ നിക്കണത്‌ വേഗം എറങ്ങിക്കോളി.ബാക്കിള്ളോര്‍ക്കെങ്കിലും മനസ്സമാധാനം ഉണ്ടാകൂലോ എന്നാ 16 ഉം 18 ഉം വയസ്സുള്ള രണ്ടാണ്‍മക്കളും പറയുന്നത്‌.ഞാനെങ്ങോട്ടുപോകും സാറേ............... തല്ലുകൊണ്ട്‌ നിക്കാനും വയ്യ."
സഹനത്തിന്റെ അവസാനഘട്ടത്തിലുള്ള ആ ശബ്ദത്തിന്‌ ഞാന്‍ മറുപടി നല്‌കിയതിങ്ങനെ.
നിങ്ങള്‍ തല്ലെത്ര കൊണ്ടാലും ആ വീട്ടില്‍ നിന്നും ഇറങ്ങരുത്‌ അത്‌ നിങ്ങളുടെ വീടാണ്‌.നിങ്ങള്‍ ആ വീട്ടില്‍ നിന്നിറങ്ങാതെ നിന്നാല്‍ മാത്രമേ നിങ്ങള്‍ക്ക്‌ Domastic violence Act പ്രകാരം ഭര്‍ത്താവിനെ വീട്ടില്‍ നിന്നും ഒഴിവാക്കണമെന്ന ഓര്‍ഡര്‍ വാങ്ങാന്‍ ഒക്കൂ.നിങ്ങള്‍ പുറത്തിറങ്ങിയാല്‍ ആകെ ചെയ്യാനുള്ളത്‌ ചിലവിനു കിട്ടാനുള്ള കേസു കൊടുക്കാം എന്നതു മാത്രമാണ്‌. അതിനുതന്നെ എത്ര കാലം കേസു നടത്തണം ?അഥവാ കേസ്‌ അനുകൂലമായാല്‍തന്നെ അയാള്‍ അതു പാലിക്കില്ല. പിന്നെ കോടതി അലക്ഷ്യം ഫയല്‍ ചെയ്യണം ഒരു പ്രാവശ്യമല്ല പല പ്രാവശ്യം അതിലും ഭേദം കുറച്ചടികൊണ്ട്‌ അവിടെത്തന്നെ പിടിച്ചുനിന്ന്‌ അയാളെത്തന്നെ ആ വീട്ടില്‍നിന്നും ഓടിക്കുന്നതല്ലേ.............?

എന്തുകൊണ്ട്‌ മുസ്ലീം യുവാക്കള്‍ പ്രതികരിക്കുന്നില്ല

2010-11-30T07:35:00.000-08:00

എന്തുകൊണ്ട്‌ മുസ്ലീം യുവാക്കള്‍ പ്രതികരിക്കുന്നില്ല

21 വയസ്സുള്ള സുനീറ വിവാഹം കഴിഞ്ഞ്‌ ഒരു വര്‍ഷത്തിനുള്ളില്‍ സ്‌ത്രീ പീഡനക്കേസ്‌ രജിസ്റ്റര്‍ ചെയ്യുന്നു.അന്യേഷണം കിട്ടിയതേ ഞാന്‍ ആ കുട്ടിയെ പോയി കണ്ടു.മൂന്നു മാസമേ ഒരുമിച്ചു ജീവിച്ചിട്ടുള്ളൂ.വിവാഹം കഴിച്ച നൂറുദ്ദീന്‌ ഭാര്യയും രണ്ടു കുട്ടികളുമുണ്ട്‌.ഈ വിവരം വീട്ടുകാരോട്‌ മറച്ചുവെച്ചിട്ടാണ്‌ അയാള്‍ വിവാഹം കഴിച്ചത്‌.സുനീറയുമായുള്ള വിവാഹം കഴിഞ്ഞ്‌ മൂന്നു മാസം കഴിഞ്ഞപ്പോഴാണ്‌ വിവരം നൂറുദ്ദീന്റെ ആദ്യ ഭാര്യ അറിയുന്നത്‌. ആ വീട്ടില്‍ പ്രശ്‌നമായി.അവരും കുട്ടികളും ആത്മഹത്യാ ഭീഷണി മുഴക്കി.അവരുടെ വീട്ടുകാര്‍ നൂറുദ്ദീനെ ഉള്‍പ്പെടെ ഭാര്യവീട്ടിലേക്ക്‌ മാറ്റി.തന്റെ ഭര്‍ത്താവ്‌ തന്നെ മൊഴി ചൊല്ലുകയാണെന്ന്‌ ഫോണിലൂടെ അറിയിച്ചു.സുനീറയുടേയും പിതാവിന്റേയും ആവശ്യം ഇതു മാത്രം .വല്ലപ്പോഴും വന്നാല്‍ മതി.നാട്ടുകാരോട്‌ ഒരു ഭര്‍ത്താവുണഅടെന്നു പറയണം.അതിനും അയാള്‍ വഴങ്ങിയില്ല.കേസ്‌ നടക്കുന്നു.
ഒരു മാസത്തിനുള്ളില്‍ അനുഭവമുള്ള നാലാമത്തെ സംഭവം .ഒരു പെണ്‍കുട്ടിയെ വിവാഹം നിശ്ചയിക്കുമ്പോള്‍ എന്തു കൊണ്ട്‌ അയാളുടെ കുടുംബത്തെപ്പറ്റി അന്യേഷിക്കുന്നില്ല ? ഇത്തരത്തില്‍ ഇക്കാലത്തും നടക്കുന്ന രണ്ടാം കല്ല്യാണങ്ങള്‍ക്കെതിരെ എന്തുകൊണ്ടാണ്‌ മുസ്ലീം യുവാക്കള്‍ പ്രതികരിക്കാത്തത്‌ ?
നമ്പൂതിരി സമുദായങ്ങള്‍ക്കിടയിലുണ്ടായിരുന്ന അഫ്‌ന്‍ സമ്പ്രദായം( സ്വ സമുദായത്തില്‍ നിന്നും വിവാഹം കഴിക്കാന്‍ പാടില്ല എന്ന നിയമം), വിധവാ വിവാഹ നിരോധനം തുടങ്ങിയവ ആ സമുദായത്തിലെ ചെറുപ്പക്കാരുടെ തീഷ്‌ണമായ പ്രതികരണത്തിലൂടെ തന്നെയാണിന്ന്‌ പൂര്‍ണ്ണമായും നിര്‌ത്താനായത്‌ അതു പോലെ തന്നെ സതി സമ്പ്രദായം ( ഭര്‍ത്താവ്‌ മരിച്ചാല്‍ ഭാര്യ ചിതയില്‍ ചായുന്നത്‌)
ഒരു സമുദായത്തില്‍ നില നില്‌ക്കുന്ന ദുരാചാരത്തനെതിരെയുള്ള പ്രതികരണം ,പ്രതിഷേധം ഉയര്‍ന്നു വരേണ്ടത്‌ ആ വിഭാഗത്തിലെ ചെറുപ്പക്കാര്‍ക്കിടയില്‍ നിന്നു തന്നെയാകണം.മുസ്ലീം സമുദായത്തില്‍ വ്യാപകമായി നിലനില്‌ക്കുന്ന ഈ ദുരവസ്ഥക്കെതിരെ എന്തുകൊണ്ടൊരു അത്തരത്തിലൊരു പ്രതിഷേധം ഇതു വരെ ഉയര്‍ന്നു വരുന്നില്ല ?പള്ളിക്കമ്മറ്റികള്‍ എന്തുകൊണ്ട്‌ ഈ കാര്യം ഗൗരവമായി കാണുന്നില്ല.ഒരു സമുദായത്തെത്തന്നെ മുറിപ്പെടുത്തുന്ന ഈ അവസ്ഥക്ക്‌ മാറ്റം വരുത്തേണ്ടേ.....?

ഞാന്‍

2010-11-19T08:56:00.000-08:00

ഞാന്‍
14-11-2010 തിയ്യതിയില്‍ കല്‌പറ്റ പത്മപ്രഭ ഗ്രന്ഥാലയത്തില്‍ വെച്ച്‌ എന്റെ പുസ്‌തക(എന്റെ കഥ അഥവാ ഒരു മലയാളി യുവതിയുടെ ജീവിതയാത്ര)ത്തിന്റെ ചര്‍ച്ച നടന്നു.ചര്‍ച്ചയില്‍ ഉയര്‍ന്നുവന്ന അനേകം ചോദ്യങ്ങള്‍ക്ക്‌ സമയക്കുറവുമൂലം മൂന്നു മിനിട്ടുകൊണ്ട്‌ ഞാന്‍ മറുപടി നല്‌കി.അവയിലെ ചില ചോദ്യങ്ങളും അവക്ക്‌ ഞാന്‍ നല്‌കിയ പൊതുവായ മറുപടിയും ഞാന്‍ ഇവിടെ ചേര്‍ക്കുന്നു.
ചോദ്യങ്ങള്‍
1- നിങ്ങള്‍ ആണുങ്ങളെ അനുകരിക്കകയല്ലെങ്കില്‍ പിന്നെ എന്തിനീ രൂപമാറ്റം
2- പുരുഷന്മാരെ ബോധവത്‌ക്കരിക്കാന്‍ നിങ്ങളൊന്നും ചെയ്‌തിട്ടില്ല. ശരിയല്ലേ?
3-നിങ്ങളുടെ ഈ പുസ്‌തകം വായിച്ചാല്‍ പുരുഷവിദ്വോഷമല്ലാതെ മറ്റൊന്നും പ്ര തിഫലിക്കുന്നില്ല
4-വിനയയുടെ ഒരു ക്ലാസിനു വേണ്ടി പറഞ്ഞപ്പോള്‍ ആര്‍ക്കും അതു സമ്മതമല്ല.എന്തുകൊണ്ട്‌ സമൂഹം വിനയയുടെ ക്ലാസിനെ എതിര്‍ക്കുന്നു.

ഉത്തരം-വേഷത്തിലറിയണം ആണിനെ പെണ്ണിനെ ആരു നിഷ്‌കര്‍ഷിച്ച സംസ്‌ക്കാരമാണിത്‌ കുഞ്ഞുനാള്‍ തൊട്ടു തുടങ്ങുമീ വേര്‍തിരിവെന്തിനാണെന്നൊത്തു ചിന്തിക്കണം
ഞാന്‍ വിനയ. റോഡിലൂടെ നടക്കുമ്പോള്‍ എന്നെ അറിയുന്നവര്‍ അതു വിനയയാണെന്നു പറയും.ആ വിനയ പെണ്ണാണെന്ന്‌ അറിയേണ്ടവര്‍ അറിഞ്ഞാല്‍ പോരെ ?അറിയിക്കേണ്ടവരെ മാത്രം അറിയിച്ചാല്‍ പോരെ? ഒരു വ്യക്തിയുടെ സെക്‌സ്‌ അറിയേണ്ട എന്തു കാര്യമാണ്‌ സമൂഹത്തിനുള്ളത്‌?
പെരുമഴ പെയ്യുമ്പോള്‍ നടക്കുന്നിടം മുഴുവന്‍ പന്തലിടാന്‍ എനിക്കാവില്ല.ഞാന്‍ എനിക്കു നനയാതിരിക്കാന്‍ കുട പിടിച്ചു നടക്കും.മുന്നോട്ടുള്ള വഴി മുഴുവന്‍ കല്ലും മുള്ളും നിറഞ്ഞതാണെന്നുവെച്ച്‌ എനിക്കു നടക്കാതിരിക്കാനാവില്ല ഞാന്‍ ചെരുപ്പിട്ടു നടക്കും
വയനാടന്‍ തോട്ടങ്ങളില്‍ ധാരാളം അട്ടകളുണ്ട്‌്‌.തോട്ടത്തില്‍ പണിയെടുക്കുമ്പോള്‍ അട്ടയുടെ കടി സമയം മെനക്കെടുത്തും.ജോലിയുടെ ശ്രദ്ധമാറ്റും.അതിനാല്‍ തോട്ടത്തില്‍ പണിയെടുക്കുന്നവര്‍ (മുട്ടറ്റം വരെയുള്ള ഷൂ )ജംഗിള്‍ഷൂ ധരിക്കും .അത്‌ അട്ടയെ പേടിച്ചല്ല മറിച്ച്‌ അട്ടയുടെ ശല്യം ഒഴിവാക്കാന്‍.എന്റെ വേഷവും ഒരു ജംഗിള്‍ഷൂ മാത്രമാണ്‌.
പിന്നെ എന്റെ ക്ലാസ്‌ സമൂഹം നിഷേധിക്കുന്നത്‌.ഞാന്‍ ഒരു സാഗരമാണ്‌.അതിലെ ഒരു ബക്കറ്റ്‌ വെള്ളം മാത്രമാണ്‌ എന്റെ ക്ലാസ്‌ സാഗരത്തെത്തന്നെ ഉള്‍ക്കൊള്ളാന്‍ തയ്യാറായി നില്‌ക്കുന്ന സമൂഹത്തിനെന്തിനാണ്‌ കേവലമൊരുബക്കറ്റ്‌ വെള്ളം
ഏതായാലും ഒന്നെനിക്കുറപ്പുണ്ട്‌ എന്നെമാറ്റി നിര്‍ത്തിക്കൊണ്ടൊരു സ്‌ത്രീപുരോഗതി ലോകത്തിനു സാധ്യമല്ല.

വ്യത്യാസം

2010-11-19T08:51:00.000-08:00

വ്യത്യാസം
ഭാര്യ മരിച്ച സഹപ്രവര്‍ത്തകനേയും ഭര്‍ത്താവു മരിച്ചകൂട്ടുകാരിയേയും ഒരേ ദിവസം രണ്ടു മണിക്കൂര്‍ വ്യത്യാസത്തില്‍ സന്ദര്‍ശിക്കേണ്ടി വന്നു.പുരുഷന്റെ നിസ്സഹായതയും സ്‌ത്രീയുടെ സമ്പന്നതയും അനുഭവിച്ചറിഞ്ഞത്‌ രണ്ടു വീട്ടിലും കൂടിയിരുന്ന ആളുകളുടെ ആകാംക്ഷ നിറഞ്ഞ വാക്കുകളില്‍ നിന്നും
1, ഭാര്യ മരിച്ച പുരുഷന്റെ വീട്‌. (സ്ഥിരമായി അടുത്തിരിക്കാന്‍ ഒരാളുപോലുമില്ലാത്ത ദയനീയാവസ്ഥ.വരുന്നവര്‍ വരുന്നവര്‍ അടത്തിരിക്കുന്നു.ഓരോരുത്തരോടും അയാള്‍ സംഭവം വിശദീകരിക്കുന്നു.)
ഒരാള്‍:- മക്കള്‌ രണ്ടും രണ്ട്‌ കൊമ്പത്ത്‌ (ഒരാള്‍ തിരുവനന്തപുരത്ത്‌ മെഡിസിനു പഠിക്കുന്നു മറ്റൊരാള്‍ ബാംഗ്ലൂരില്‍ ജോലി ചെയ്യുന്നു) ഇനി ആരാ പാവം അയാള്‍ ഈ വലിയ വീട്ടില്‍ ഒറ്റക്ക്‌
മറ്റൊരാള്‍ :- പെണ്ണുങ്ങളേന്‍ ഏതെങ്കിലുമൊരു കുട്ടിയെത്തന്നേയും നിര്‍ത്തി പഠിപ്പിക്കാന്‍ പറ്റുമായിരുന്നു.ഇതുപ്പം അതും പറ്റില്ലല്ലോ.പെങ്കുട്ട്യളെ ആരും നിര്‍ത്താന്‍ മടിക്കും.ആങ്കുട്ട്യേളെയാണെങ്കില്‍ ആരാ വെച്ച്‌ണ്ടാക്കി കൊട്‌ക്കാ.........
ഭര്‍ത്താവ്‌ മരിച്ച സ്‌ത്രീയുടെ വീട്‌ (.അമ്മയും സഹോദരിമാരും അടുത്തു തന്നെ ആ സ്‌ത്രീയുടെ കൈയ്യും പിടിച്ചിരിക്കുന്നു.തികച്ചും മ്ലാനമായിരിക്കുന്നു.വരുന്നവരോട്‌ മറ്റുള്ളവര്‍ സംഭവം വിവരിക്കുന്നു. )
ഒരാള്‍ :-അങ്ങനെ വെഷമിക്കണ്ട കാര്യൊന്നും ഇല്ല. ഒക്കെ വിധിയല്ലേ. ആരു വേണേലും വീട്ടില്‌ നിക്കാനുണ്ട്‌.എന്തായാലും ഒറ്റക്കല്ലല്ലോ.

ലേഡീസും വേണ്ട ജെന്റെസും വേണ്ട ബോഡി മാത്രം മതി`

2010-11-01T19:36:00.000-07:00

ലേഡീസും വേണ്ട ജെന്റെസും വേണ്ട ബോഡി മാത്രം മതി`
അസ്വാഭാവിക മരണം സംഭവിച്ച പെണ്‍കുട്ടിയുടെ മൃതദേഹത്തിനു ബോഡിന്ധബസ്‌ത്‌ ഡ്യൂട്ടിക്കായി ആശുപത്രിയിലെത്തിയതായിരുന്നു.സബ്ബ്‌ ഇന്‍സ്‌പെക്ടറും മറ്റു പോലീസുകാരും ഇന്‍ക്വസ്‌റ്റിലെ ചോദ്യാവലികള്‍ പൂരിപ്പിക്കുകയായിരുന്നു.ബോഡി പോസ്‌റ്റുമോര്‍ട്ടത്തിനായി കോഴിക്കോട്‌ മെഡിക്കല്‍ കോളേജിലേക്ക്‌ കൊണ്ടു പോകുന്നതിനായുള്ള ഒരക്കത്തിലായിരുന്നു ഞാന്‍.പോലീസിനെയും ബന്ധുക്കളേയും സഹായിക്കാനായി അയല്‍വായികളായ ചെറുപ്പക്കാരന്മാരോടൊപ്പം റുക്കിയ എന്നൊരു സ്‌ത്രീയും ഉണ്ടായിരുന്നു.ആംബുലന്‍സില്‍ ബോഡി കയറ്റിയ ശേഷം റുക്കിയയും ആംബുലന്‍സില്‍ കയറി.കോളനിയിലെ ആശാവര്‍ക്കറായിരുന്നു റുക്കിയ .ബോഡിയോടൊപ്പം മുഴുവന്‍പേരും പുരുഷന്മാരോയതുകൊണ്ടോ മുമ്പേ പോയി ശീലമുള്ളതുകൊണ്ടോ എന്തോ ആദ്യം തന്നെ റുക്കിയ ഗീര്‍ബോക്‌സിനു മുകളില്‍ സ്ഥാനം പിടിച്ചു.മോര്‍ച്ചറിയുടെ മുറ്റത്തു നിന്ന്‌ ഔദ്യോഗിക രേഖകള്‍ ശരിയാക്കുന്നതിനിടയില്‍ ഒരു ചെറുപ്പക്കാരന്‍ എന്നോട്‌ അടക്കിയ സ്വരത്തില്‍ ചോദിച്ചു.
"സാറേ മെഡിക്കല്‍കോളേജിലേക്ക്‌ ലേഡീസ്‌ വേണംന്ന്‌ണ്ടോ ?" അപ്പോഴാണ്‌ ആംബുലന്‍സിനുമുന്നില്‍ സ്ഥാനം പിടിച്ച റുക്കിയയെ ഞാന്‍ കാണുന്നത്‌,
"മെഡിക്കല്‍കോളേജിലേക്ക്‌ ലേഡീസും വേണ്ട ജെന്റെ്‌സും വേണ്ട ബോഡി മാത്രം മതി" ഞാന്‍ മറുപടി നല്‌കി.
"അല്ല അവരുടെ ആവശ്യമുണ്ടോ ?" റുക്കിയയെ ഉദ്ദേശിച്ചുകൊണ്ട്‌ അയാള്‍ ചോദിച്ചു.
"അവര്‍ വരുന്നതുകൊണ്ടെന്താ കുഴപ്പം "?ഞാന്‍ തിരിച്ചു ചോദിച്ചു.
"ഏയ്‌ ഒന്നൂല്ല ഞാന്‍ ചോദിച്ചൂന്നേ.യുള്ളൂ.................. " അയാള്‍ ചോദ്യം മതിയാക്കി ആംബുലന്‍സിലേക്കു കയറി

അത്രക്കോര്‍ത്തില്ല

2010-10-30T07:03:00.000-07:00

അത്രക്കോര്‍ത്തില്ല.
ത്രേസ്യാമ്മ ചാക്കോ പാസ്‌പോര്‍ട്ട്‌ നിയമപ്രകാരം അറസ്റ്റിലായി.കോടതി ജാമ്യം അനുവദിച്ചു.കേസ്‌ ആള്‍മാറാട്ടത്തിന്‌. ഐ.ഡി കാര്‍ഡ്‌ ശരിയാക്കിയത്‌ ഭര്‍ത്താവ്‌.വിവാഹം കഴിഞ്ഞ്‌ ഒരു വര്‍ഷത്തിനുള്ളില്‍ തന്നെ(ഭര്‍ത്താക്കന്മാരുടെ ഉത്തരവാദിത്തമാണല്ലോ അത്‌) .SSLC ബുക്കൊന്നും വേണ്ടി വന്നില്ല.ത്രേസ്യാമ്മ ചാക്കോ എന്ന പേരില്‍ ഐ.ഡി കാര്‍ഡും കിട്ടി.(ഭാര്യയെ തനിയെ വിട്ടാല്‍ വാലിനു വേണ്ടി പറയേണ്ടി വരും ചിലപ്പോളെങ്ങാനും എതിര്‍ത്താലോ അതു നാണക്കേടാകും.) എമര്‍ജന്‍സി വിസ പ്രകാരം ത്രേസ്യാമ്മചാക്കോ ദുബായിലെത്തി.2 വര്‍ഷത്തിനു ശേഷം നാട്ടില്‍ മടങ്ങിയെത്തിയപ്പോഴായിരുന്നു അറസ്‌റ്റ്‌.പാസ്‌പോര്‍ട്ടാഫീസിലെ രേഖപ്രകാരം ത്രേസ്യാമ്മ യോഹന്നാന്റെ (SSLC ബുക്കിലെ പേര്‌ അങ്ങനെയാണ്‌.)പാസ്‌പോര്‍ട്ടിലാണ്‌ ത്രേസ്യാമ്മചാക്കോ ദുബായിലെത്തുന്നത്‌.പോരെ പൂരം.പിന്നെ എന്തെല്ലാം നൂലാമാലകള്‍.വില്ലേജ്‌ ഓഫീസറുടെ സര്‍ട്ടിഫിക്കറ്റ്‌.സാഷികളുടെ സാക്ഷ്യപ്പെടുത്തല്‍ ....... ജാമ്യം കിട്ടി ത്രേസ്യാമ്മ പുറത്തിറങ്ങിയപ്പോള്‍ ഒരു ദീര്‍ഘനിശ്വാസത്തോടെ ചാക്കോ പറഞ്ഞു .അന്ന്‌ അത്രക്കോര്‍ത്തില്ല.

മേം ഞങ്ങളെന്തു ചെയ്യും

2010-10-28T02:22:00.000-07:00

മേം ഞങ്ങളെന്തു ചെയ്യും?മെസ്സില്‍ ഉച്ചഭക്ഷണം കഴിച്ചുകൊണ്ടിരിക്കെ ശബ്ദിച്ചഫോണ്‍ മനസ്സില്ലാമനസ്സോടെയാണ്‌ എടുത്തത്‌.ഞാന്‍ ഹലോ പറഞ്ഞതേ മറുതലക്കല്‍ ഒരു പെണ്‍കുട്ടിയുടെ നിസ്സഹായത മുട്ടി നില്‍ക്കുന്ന പരിദേവനം
"മേം ഞങ്ങളെന്തു ചെയ്യും?NCC Cadets ആയ ഞങ്ങള്‍ 12 പെണ്‍കുട്ടികളും 8 ആണ്‍കുട്ടികളും Election duty യിലെ Special police officer തസ്‌തികയിലേക്ക്‌ ഒരുമിച്ച്‌ അപേക്ഷിച്ചതാണ്‌.പക്ഷേ duty ക്ക്‌ കാര്‍ഡ്‌ വന്നത്‌ ആണ്‍കുട്ടികള്‍ക്കുമാത്രം.ഞങ്ങള്‍ 12 പെണ്‍കുട്ടികളേയും ഒഴിവാക്കി.മേം എന്തെങ്കിലും ചെയ്യണം ഞങ്ങള്‍ക്കും ഡ്യൂട്ടി ചെയ്യണം.പെണ്‍കുട്ടി നിര്‍ത്താന്‍ ഭാവമില്ലെന്നു കണ്ട്‌ ഞാന്‍ തുടര്‍ന്നു
"കരഞ്ഞിട്ടെന്തു കാര്യം?നിങ്ങളുടെ നല്ല മനസ്സിനെ കഴിവുകേടായി മാത്രമേ അധികാരികള്‍ കാണൂ എന്ന സത്യം ആദ്യം തിരിച്ചറിയുക.നിങ്ങള്‍ 12 പെണ്‍കുട്ടികളുടെ സ്ഥാനത്ത്‌ 12 ആണ്‍കുട്ടികളായിരുന്നെങ്കില്‍ അധികാരികള്‍ ഇപ്രകാരം പ്രവര്‍ത്തിക്കുമായിരുന്നോ ?ആത്മാഭിമാനം മുറിപ്പെട്ടാല്‍ ആണ്‍കുട്ടികളെന്താണ്‌ ചെയ്യാറുള്ളതെന്ന്‌ നിങ്ങള്‍ കാണാറുള്ളതല്ലേ ?ആത്മാഭിമാനം മുറിപ്പെടുമ്പോഴെങ്കിലും നിങ്ങള്‍ ആണ്‍കുട്ടികളുടെ ശൗര്യം ഓര്‍ക്കുക അതനുകരിക്കുകയെങ്കിലും ചെയ്യുക.ആരും നിങ്ങളുടെ ആത്മാഭിമാനത്തെ മുറിപ്പെടുത്താന്‍ ധൈര്യം കാണിക്കില്ല.എങ്ങനെയായാലും ഇക്കാര്യത്തില്‍ നിങ്ങള്‍ പ്രതികരിക്കണം .വഴി നിങ്ങള്‍ ആലോചിച്ച്‌ കണ്ടെത്തുക. അടുത്ത ഇലക്ഷനിലെങ്കിലും നിങ്ങള്‍ക്ക്‌ ആ ഡ്യൂട്ടിചെയ്യാം." ഞാന്‍ പറഞ്ഞു നിര്‍ത്തി.
ബൂത്ത്‌ ഏജന്റെുമാരായും പോളിംഗ്‌ ഓഫീസര്‍മാരായും പോലീസ്‌ ഉദ്യോഗസ്ഥരായും അനവധി സ്‌ത്രീകള്‍ ജോലി ചെയ്‌ത ഈ ഇലക്ഷനില്‍ നിന്നും ആ പെണ്‍കുട്ടികളെ മാറ്റി നിര്‍ത്തിയത്‌ ബന്ധപ്പെട്ട ഉദ്യോഗസ്ഥരുടെ അല്‌പത്തമല്ലാതെ മറ്റെന്താണ്‌

ഗതികേട്‌

2010-10-08T09:06:00.000-07:00

ഗതികേട്‌
പഞ്ചായത്ത്‌ തെരഞ്ഞെടുപ്പിന്‌ സ്ഥാനാര്‍ത്ഥിയായി നോമിനേഷന്‍ കൊടുത്ത ശേഷം വീടു കേറി വിവരം പറയാനെത്തിയ ജയയോട്‌ ഞാന്‍ ചോദിച്ചു.
" ഇത്ര കാലവും ജയ മാത്രമായി അറിയപ്പെട്ട ജയ ഇപ്പം ജയാ ബാലകൃഷ്‌ണനായി.സ്‌ത്രീകള്‍ സ്ഥാനാര്‍ത്ഥിളാകാന്‍ ഭര്‍ത്താവിന്റെ പേര്‌ വാലായി ചേര്‍ക്കണമെന്ന്‌ നിര്‍ബന്ധമുണ്ടോ ?"
അല്‌പം പരിഹാസ്യതയോടെയുള്ള എന്റെ ചോദ്യം കേട്ടയുടനെ വിഷയം മാറ്റാനെന്ന വണ്ണം കുടിക്കാന്‍ കുറച്ച്‌ വെള്ളം വേണമെന്നു പറഞ്ഞുകൊണ്ട്‌ ജയ അകത്തു കയറി.എന്നോടൊപ്പം അടുക്കളയിലെത്തിയ ശേഷം അടക്കിയ ശബ്ദത്തില്‍ പറഞ്ഞു
"സ്വന്തം പേരുമതിയെന്ന്‌ ഞാന്‍ പറഞ്ഞപ്പോ സെക്രട്ടറി പറഞ്ഞത്‌ ' പറയുന്നതങ്ങ്‌ കേട്ടാ മതീന്നാ ' പിന്നെ അതിനും വേണ്ടി എന്തെങ്കിലും പറഞ്ഞാ കിട്ടിയ സീറ്റു കൂടി പോകുമെന്നല്ലാതെ വേറൊരു ഗുണവും ഉണ്ടാകാന്‍ പോണില്ല.അതോണ്ടാ തര്‍ക്കിക്കാനൊന്നും പോകാഞ്ഞത്‌".
ജയയുടെ മറുപടി തന്നെയായിരിക്കും ഭൂരിപക്ഷം വരുന്ന ജയാാ ബാലകൃഷ്‌ണന്മാര്‍ക്കും.................

മോളേ അതു കൊള്ളാവോ.........

2010-09-21T17:51:00.000-07:00

മോളേ അതു കൊള്ളാവോ.........
അഡ്വക്കറ്റ്‌ മരിയുമായി സംസാരിച്ചുകൊണ്ടിരിക്കെ അവരുടെ ഓഫീസിലേക്ക്‌ 70 വയസ്സു പ്രായം തോന്നിക്കുന്ന ഒരു സ്‌ത്രീയും അവരുടെ മകളും കടന്നു വന്നു..കാഴ്‌ചയില്‍ മകള്‍ക്ക്‌ വളരെ വൃത്തിയും വെടിപ്പും ഉണ്ടായിരുന്നെങ്കിലും അമ്മക്ക്‌ വൃത്തി തൊട്ടു തീണ്ടിയിട്ടുപോലുമുണ്ടായിരുന്നില്ല.വന്നപാടേ അവര്‍ മരിയയോടു സംസാരിക്കാന്‍ തുടങ്ങി.
"മോളേ എന്റെ മൂത്ത മോളും ഭര്‍ത്താവും അവരുടെമകനും കൂടി എന്റെ ബാങ്ക്‌ അക്കൗണ്ടില്‍ നിന്നും ഒന്നര ലക്ഷം രൂപ എന്നെപ്പറ്റിച്ചെടുത്തു.എന്റൊരു കാപവന്റെ മോതിരവും ഞാന്‍ വാങ്ങിയ ടി.വിയും അവരുടെ കൈയ്യിലുണ്ട്‌.എന്റെ പണോം എന്റെ സാധനങ്ങളും മോളെനിക്ക്‌ വാങ്ങിത്തരണം."അവര്‍ തൊട്ടടുത്തിരുന്ന മകളുടെ ബാഗില്‍നിന്നും ഒരു പാസ്‌ബുക്കെടുത്ത്‌ മരിയയുടെ നേരെ നീട്ടി.മരിയയോടൊപ്പം ഞാനും ആ പാസ്‌ബുക്ക്‌ പരിശോധിച്ചു.10,000 രൂപ വെച്ച്‌ ഏകദേശം രണ്ടു വര്‍ഷം കൊണ്ടാണ്‌ തുക പിന്‍വലിച്ചിരിക്കുന്നത്‌.പാസ്‌ബുക്ക്‌ പരിശോധിച്ചതിനു ശേഷം മരിയ അവരോടായ്‌ വളരെ മയത്തില്‍ ചോദിച്ചു
"അമ്മച്ചിക്കെവിടുന്നാ ഇതിനുമാത്രം പൈസ" ?
"ഞാന്‍ തെണ്ടി ഉണ്ടാക്ക്യേതാ...മോളേ " അവര്‍ കണ്ണുതുടച്ചുകൊണ്ട്‌ പറഞ്ഞു.
"എന്നുവെച്ചാല്‍ " ? അറിയാതെ ഞാനും ഇടപെട്ടുപോയി
"അമ്മ പറഞ്ഞതു ശരിയാ അപ്പച്ചന്‍ മരിച്ചേപ്പിന്നെ അമ്മ വീട്ടല്‍ നിക്കാറില്ല.4 മക്കളുള്ളതില്‍ ചേച്ചിയുടെ അടുത്തുമാത്രമാണ്‌ വല്ലപ്പോഴും പോവുക." മകള്‍ ഇടപെട്ടു.
"അതെന്താ അമ്മച്ചി മൂത്ത മോളുടെ അടുത്ത്‌ മാത്രം പോയത്‌ " മരിയ കാര്യങ്ങള്‍ മനസിലാക്കാന്‍ ചോദിച്ചു.
"അവള്‍ടെ വീട്‌്‌ റോഡ്‌ സൈഡില്‍തന്ന്യാ.ഇവര്‌ടൊക്ക വീട്ടിലേക്ക്‌ കൊറേ നടക്കണം.
മോള്‍ അമ്മച്ചീനെ പറ്റിക്കുന്നെന്ന്‌ അമ്മച്ചിക്കെപ്പഴാ മനസിലായത്‌ ?
"ഞാനൊരു പള്ളിപ്പെരുന്നാളും കഴിഞ്ഞ്‌ മിനിഞ്ഞാന്ന്‌ വൈകിട്ടാണ്‌ മോള്‍ടെ അടുത്തെത്തിയത്‌.രാത്രി ഞാന്‍ കഞ്ഞികുടിക്കാന്‍ അകത്തേക്ക്‌ കയറുമ്പം അവളുടെ 22 വയസ്സുള്ള മകന്‍ അലമാരയില്‍ നിന്നും ഒരു പ്ലേറ്റ്‌ കഞ്ഞികുടിക്കാനെടുക്കുന്നതു കണ്ട്‌ അവന്റെ അമ്മ അതു പിടിച്ചു വാങ്ങിക്കൊണ്ട്‌ 'എടാ ആ പാത്രം എടുക്കല്ലേ അതാ തള്ളക്ക്‌ കൊടുക്കുന്നതാ ' എന്നു പറയുന്നതു ഞാന്‍കേട്ടു എനിക്ക്‌ സങ്കടം വന്നു.
മോളേ അവക്കതു പറയാന്‍ കൊള്ളാവോ " അവര്‍ പിന്നേയും പറ്റിക്കലിന്റെ കഥ തുടര്‍ന്നു .ബാക്കി ഭാഗം കേട്ടു നിന്‍ക്കാന്‍ സമയമില്ലാത്തതുകൊണ്ട്‌ ഞാന്‍ ഓഫീസ്‌ വിട്ടിറങ്ങി

അദ്ദേഹം

2010-09-14T03:34:00.001-07:00

അദ്ദേഹം
ബൈക്കോടിക്കുന്നതിനിടെ തുടര്‍ച്ചയായി മൊബൈല്‍ ശബ്ദിച്ചപ്പോള്‍ ഏതോ അത്യാവശ്യക്കാര്‍ ആയിരിക്കുമെന്നുകരുതി കോരിച്ചൊരിയുന്ന മഴ വകവെക്കാതെ ഒരു ചെറിയ ബസ്‌ വെയിറ്റിംഗ്‌ ഷെഡ്ഡിനു സമീപം വണ്ടി നിര്‍ത്തി ഞാന്‍ ഫോണെടുത്ത്‌ ഹലോ പറഞ്ഞു. എന്റെ അവസ്ഥയോ സാഹചര്യമോ അന്യേഷിക്കാതെ മറുവശത്ത്‌ പെണ്‍കുട്ടി സംസാരിക്കാന്‍ തുടങ്ങി
"മേഡം ഞാന്‍ മിനിയാണ്‌ കോട്ടയത്താണ്‌ വീട്‌.ഇപ്പോള്‍ കൈരളി ടി.വി യില്‍ മുന്‍ ജസ്‌റ്റിസ്‌ ശ്രീദേവി മേഡത്തിന്റെ പാചകമേള നടക്കുകയാണ്‌ (ഞാന്‍ നടു റോട്ടിലാണെന്നും ടി.വി തുറക്കാന്‍ നിവൃത്തിയില്ലെന്നും അറിയിച്ചപ്പോള്‍ അവള്‍ തുടര്‍ന്നു) അവര്‍ അവരുടെ ഭര്‍ത്താവിനിഷ്ടപ്പെട്ട ഭക്ഷണത്തെപ്പറ്റിയും അതവരുണ്ടാക്കികൊടുക്കുന്ന രീതിയും വിവരിക്കുകയാണ്‌. അതിനിടെ പത്തു തവണയെങ്കിലും അവര്‍ അദ്ദേഹം അദ്ദേഹം എന്നവരുടെ ഭര്‍ത്താവിനെ സംബോധന ചെയ്യുന്നു.മേഡം എനിക്ക്‌ നണക്കേടു തോന്നുന്നു അവര്‍ക്കെന്താ അയാള്‍ എന്നു പറഞ്ഞാല്‍. ഇത്രയും ഉയരത്തിലിരിക്കുന്ന ഒരു സ്‌ത്രീ ഇങ്ങനെ പറയുന്നത്‌ ഇവന്മാരുടെയൊക്കെ ഹുങ്ക്‌ കൂട്ടില്ലേ ?"
ഒറ്റ ശ്വാസത്തില്‍ മിനി പറഞ്ഞു നിര്‍ത്തി.കോരിച്ചൊരിയുന്ന മഴയില്‍ തണുത്തു വിറച്ചു നില്‍ക്കുന്നതിനിടയിലും എനിക്ക്‌ു ചിരിവന്നു ഞാന്‍ ശാന്തയായി മിനിയോടു പറഞ്ഞു
" മിനീ അവരൊക്കെ പ്രായമള്ളവരല്ലേ. അതവര്‍ ശീലിച്ചുപോയതാണ്‌.അതിനവരെ കുറ്റംപറയുന്നതു ശരിയല്ല.എല്ലാം ശരിയാകും മിനീ... . മിനിപോലും അയാളിലെത്തിയിട്ടേയുള്ളൂ അവന്‍ എന്നതിലെത്താനാണ്‌ ഞാന്‍ ശ്രമിക്കുന്നത്‌." ഞാന്‍ പറഞ്ഞത്‌ മിനിക്കു മനസ്സിലായോ എന്തോ മിനിയോട്‌ നന്ദി പറഞ്ഞ്‌ പെരും മഴയത്തു തന്നെ ഞനെന്റെ യാത്രതുടര്‍ന്നു.

സംഭാവന

2010-09-09T10:03:00.000-07:00

സംഭാവന
ട്രയിന്‍ യാത്രക്കിടയില്‍ ഒരു യുവാവ്‌ ഇങ്ങനെ ചോദിച്ചു
"നിങ്ങള്‍ പുരുഷനെ അനുകരിക്കുന്നതുകൊണ്ട്‌ പുരുഷവര്‍ഗ്ഗത്തിനെന്ത്‌ സംഭാവനയാണ്‌ കൊടുക്കുന്നത്‌ ?'
ഉത്തരം:- ഞാന്‍ സ്ഥിരമായി യാത്ര ചെയ്യുന്നത്‌ എന്റെ ഹീറോ ഹോണ്ട സ്‌പ്ലണ്ടര്‍ മോട്ടോര്‍ സൈക്കിളിലാണ്‌.(ഹെല്‍മറ്റ്‌ ധരിച്ചിരിക്കും)അതില്‍ യാത്ര ചെയ്യുമ്പോള്‍ ഒറ്റക്കും കൂട്ടായും നടന്നുപോകുന്ന പെണ്‍കുട്ടികളെ കാണുമ്പോള്‍ വണ്ടി ഒന്നു സ്ലോ ചെയ്‌ത്‌ അവര്‍ക്കരികിലെത്തി ചൂളം വിളിക്കുകയോ, വണ്ടി അവരെ തട്ടി എന്ന നിലയില്‍ പേടിപ്പിക്കുകയോ ചെയ്യും. ഇങ്ങനെയുള്ള പെരുമാറ്റം അവരില്‍ അറപ്പ്‌ ,പേടി, വെറുപ്പ്‌ എന്നിവ ഉണ്ടാക്കും.അതവര്‍ പ്രകടിപ്പിക്കുന്നത്‌ കണ്ണാടിയിലൂടെ കണ്ട്‌ ആസ്വദിക്കും.അങ്ങനെ കാലങ്ങളായി സ്‌ത്രീ വര്‍ഗ്ഗം പുരുഷന്മാരെക്കുറിച്ച്‌ വച്ചുപുലര്‍ത്തിക്കൊണ്ടിരിക്കുന്ന വിശ്വാസ്യത ഒന്നുകൂടി ഊട്ടിയുറപ്പിക്കുന്നതിന്‌ ഇത്തരത്തില്‍ എന്നാലാകും വിധം പ്രയത്‌നിച്ചു പോരുന്നു എന്നതാണ്‌ ഞാന്‍ നല്‌കുന്ന സംഭാവന

അണ്ടി കളഞ്ഞ അണ്ണാനെപ്പോലെ

2010-09-05T09:58:00.000-07:00

അണ്ടി കളഞ്ഞ അണ്ണാനെപ്പോലെ
ഡ്യൂട്ടിക്കിടയില്‍ കിട്ടിയ ചെറിയ ഇടവേളയില്‍ തൊട്ടടുത്ത ചായക്കടയില്‍ ചായകുടിക്കാന്‍ കയറിയതായിരുന്നു.ഒരു മേശക്കു ചുറ്റുമായി അഞ്ച്‌ ഓട്ടോറിക്ഷാ ഡ്രൈവര്‍മാര്‍ മാതൃഭൂമി മനോരമ ദേശാഭിമാനി തുടങ്ങിയ പത്രങ്ങളില്‍ വന്ന റാണി എന്ന പെണ്‍കുട്ടിയുടെ ആള്‍മാറാട്ടത്തെക്കുറിച്ചുള്ള വാര്‍ത്ത വായിച്ച്‌ ചിരിക്കുന്നതിനിടെ ഒരാള്‍ പറഞ്ഞു "എടാ.... ഇപ്പോ ആ പെണ്ണിന്റെ കൂടെ കള്ളുകുടിക്കാനും സിഗററ്റു വലിക്കാനും സിനിമ കാണാനും എല്ലാം പോയ അണ്ണന്മാരൊക്കെ ഒന്നു തൊടാന്‍ പോലും തോന്നാത്തതും ചിന്തിച്ച്‌ അണ്ടി കളഞ്ഞ അണ്ണാനെപ്പോലെ കണ്ണും മിഴിച്ചിരിക്കുന്നുണ്ടാവും.

ആണ്‍വേഷം കെട്ടി ലക്ഷങ്ങള്‍ തട്ടി ഒടുവില്‍ റാണി പിടിയിലായി

Posted on: 29 Aug 2010

കൊല്ലം: ആണ്‍വേഷത്തില്‍ മാസങ്ങളോളം ജോലി ചെയ്ത് സ്വകാര്യസ്ഥാപനത്തില്‍നിന്ന് ലക്ഷങ്ങള്‍ വെട്ടിച്ച യുവതി പോലീസിന്റെ പിടിയില്‍. തട്ടിപ്പിനെത്തുടര്‍ന്നു നടത്തിയ അന്വേഷണത്തിനൊടുവിലാണ് 'ആണ്‍കുട്ടി' പെണ്ണെന്നു തെളിഞ്ഞത്. അറസ്റ്റ് ചെയ്ത പ്രതിയെ വൈദ്യപരിശോധന നടത്തി 'സ്ത്രീ' എന്ന് സ്ഥിരീകരിച്ചു.

കൊല്ലം, കൈക്കുളങ്ങര നോര്‍ത്ത് രമാമന്ദിരത്തില്‍ റാണി(29)യാണ് ആള്‍മാറാട്ടത്തിലൂടെ തട്ടിപ്പ് നടത്തിയത്. കൊട്ടിയം, തഴുത്തല ആബ്‌സ് ടൈല്‍സ് എന്ന സ്ഥാപനത്തില്‍ 'കണ്ണന്‍' എന്ന 'ശ്രീകാന്ത് ' ആയി ജോലി ചെയ്തായിരുന്നു തട്ടിപ്പ്.

കടകളില്‍നിന്ന് പിരിച്ചെടുത്ത തുക അടയ്ക്കുന്നതില്‍ ക്രമക്കേട് കണ്ടെത്തിയതിനെത്തുടര്‍ന്നാണ് 'കണ്ണന്‍' എന്ന യുവതിയുടെ കള്ളി വെളിച്ചത്തായത്. സാമ്പത്തിക തിരിമറി നടത്തിയതിനെത്തുടര്‍ന്ന് കടയുടമ കൊട്ടിയം പോലീസില്‍ പരാതി നല്‍കിയിരുന്നു. തട്ടിപ്പ് നടത്തിയ കണ്ണനെ അന്വേഷിച്ച് പോലീസ് വീട്ടിലെത്തിയപ്പോഴാണ് കണ്ണന്‍ എന്ന ശ്രീകാന്ത് റാണിയാണെന്ന് അറിഞ്ഞത്.

ഏപ്രില്‍ മാസത്തിലാണ് ശ്രീകാന്ത് എന്ന പേരില്‍ റാണി ജോലിയില്‍ പ്രവേശിച്ചത്. കളക്ഷന്‍ ഏജന്‍റായിട്ടായിരുന്നു നിയമനം. അച്ഛനും അമ്മയ്ക്കുമൊപ്പം സ്ഥാപനത്തിലെത്തിയ 'യുവാവ് ' ശ്രീകാന്ത് എന്ന പേരിലുള്ള തിരിച്ചറിയല്‍ കാര്‍ഡിന്റെ പകര്‍പ്പും ബി.കോം ഡിഗ്രി സര്‍ട്ടിഫിക്കറ്റും ഹാജരാക്കിയതായി കടയുടമ പറഞ്ഞു. പിന്നീട് നടന്ന പരിശോധനയില്‍ ഇവ വ്യാജമാണെന്ന് തെളിഞ്ഞു. ആര്‍ക്കും സംശയം തോന്നാത്ത രീതിയിലാണ് 'കണ്ണന്‍' പെരുമാറിയിരുന്നത്.

ജോലിയില്‍ 'സമര്‍ത്ഥനാ'യിരുന്നതിനാല്‍ കൂടുതല്‍ ചുമതലകള്‍ കണ്ണന്‍ എന്ന ശ്രീകാന്തിനെ കടയുടമ ഏല്‍പ്പിച്ചു. എന്നാല്‍ ഓണത്തിനു മുമ്പുള്ള കച്ചവടത്തിരക്കിലാണ് കണ്ണന്റെ കണക്കിലെ കള്ളക്കളികള്‍ കടയുടമയുടെ ശ്രദ്ധയില്‍പ്പെട്ടത്. വിവിധ കടകളില്‍നിന്ന് പിരിച്ചെടുത്ത തുകകള്‍ പൂര്‍ണമായി കണ്ണന്‍ അടച്ചിട്ടില്ലെന്ന് പരിശോധനയില്‍ കണ്ടെത്തി. കാര്‍ബണ്‍ പേപ്പര്‍ ഉപയോഗിച്ച് രസീത് ബുക്കില്‍ കൃത്രിമം കാട്ടിയായിരുന്നു തട്ടിപ്പ്. ഈ തരത്തില്‍ അഞ്ചരലക്ഷം രൂപയോളം വെട്ടിച്ചതായി കടയുടമ പറഞ്ഞു.

സംഭവത്തെത്തുടര്‍ന്ന് 21ന് കടയുടമ കൊട്ടിയം പോലീസില്‍ പരാതി നല്‍കി. തുടര്‍ന്ന് പോലീസ് അന്വേഷിച്ച് നാട്ടിലെത്തിയപ്പോഴാണ് ആ വീട്ടില്‍ ആണ്‍മക്കളില്ലെന്നും മൂന്നു പെണ്‍കുട്ടികള്‍ മാത്രമാണെന്നും പരിസരവാസികള്‍ പറഞ്ഞത്. എന്നാല്‍ 'കണ്ണന്റെ' ഫോട്ടോ കാണിച്ചപ്പോള്‍ ആളുകള്‍ റാണിയെ തിരിച്ചറിഞ്ഞു. ഒടുവില്‍ വീട്ടില്‍നിന്ന് പ്രതിയെ പോലീസ് അറസ്റ്റ് ചെയ്തു.

ആണുങ്ങളെപ്പോലെ വേഷം ധരിച്ച്, മുടി പറ്റെ വെട്ടിയ റാണി മറ്റു പുരുഷന്മാര്‍ക്കൊപ്പം മദ്യപിക്കുകയും സിഗരറ്റ് വലിക്കുകയും ചെയ്യുമായിരുന്നെന്ന് സുഹൃത്തുക്കള്‍ പറയുന്നു. അഞ്ചുമാസം ഒപ്പം ജോലി ചെയ്ത 'കണ്ണന്‍' പെണ്‍കുട്ടിയാണെന്നറിഞ്ഞ ഞെട്ടലിലാണ് കടയുടമയും ജീവനക്കാരും.

പാല്‍ പായസവും കോളാമ്പിയും

2010-07-19T20:23:00.000-07:00

പാല്‍ പായസവും കോളാമ്പിയും
ഒരിക്കല്‍ സ്‌റ്റേഷന്‍ ചാര്‍ജ്ജു കിട്ടിയപ്പോള്‍ പോലീസ്‌ ജീപ്പെടുത്ത്‌ പുറത്തു പോവേണ്ടി വന്നു.സ്‌റ്റേഷനില്‍ ഡ്രൈവിംഗ്‌ അറിയുന്ന ആണ്‍ പോലീസുകാര്‍ ഉണ്ടായിട്ടും ഞാന്‍ വാഹനമോടിച്ചത്‌ സബ്ബ്‌ ഇന്‍സ്‌പെക്ടര്‍ക്ക്‌ ഇഷ്ടപ്പെട്ടില്ല. അതിനുള്ള ശിക്ഷയായി എന്നെ സ്റ്റേഷന്‍ ചാര്‍ജ്ജ്‌ ഡ്യൂട്ടിയില്‍ നിന്നും ഒഴിവാക്കി.ഇതിനെപ്പറ്റി സ്റ്റേഷനില്‍ നിന്നു ഞാന്‍ പ്രതികരിച്ചപ്പോള്‍ പോലീസുകാര്‍ ഒന്നടങ്കം അതു ഭാഗ്യമല്ലേ ഇപ്പോള്‍ ഉറക്കൊഴിയേണ്ടല്ലോ എന്നു പറഞ്ഞ്‌ ഗൗരവമായി എന്നെ സമാധാനിപ്പിച്ചു. കൂട്ടത്തിലൊരു പോലീസുകാരന്‍ ഇങ്ങനെ പറഞ്ഞു
"സാറിന്റെ സ്ഥാനത്ത്‌ ഞാനായിരുന്നെങ്കില്‍ സന്തോഷിക്കുമായിരുന്നു"
ഉടനെ തന്നെ ഞാന്‍ അയാളോടു ചോദിച്ചു" പാല്‍ പ്പായസം ഇഷ്ടമാണെന്നു കരുതി കോളാമ്പിയില്‍ വിളമ്പിയാല്‍ കഴിയാന്‍ പറ്റുമോ "?

ആണോ............എന്നാലൊരു ഗോപാലന്‍

2010-07-16T22:30:00.000-07:00

ആണോ............എന്നാലൊരു ഗോപാലന്‍

മകന്റെ സ്‌ക്കൂളിലെ PTAതിരഞ്ഞെടുപ്പിനോടനുബന്ധിച്ച മീറ്റിംഗ്‌്‌ .തുടക്കത്തിലെ പതിവു ചടങ്ങുകള്‍ക്കു ശേഷം തിരഞ്ഞെടുപ്പിനു മുന്നോടിയായ ചര്‍ച്ചയില്‍ പങ്കെടുത്തുകൊണ്ട്‌ ഞാനും സംസാരിച്ചു.300 പേര്‍ പങ്കെടുത്ത മീറ്റിംഗില്‍ ആകെ പങ്കെടുത്തത്‌ 30പരുഷന്മാര്‍ .ഇപ്രാവശ്യമെങ്കിലും സ്‌ത്രീകളുടെ ഭാഗത്തു നിന്നായിരിക്കണം നമ്മുടെ PTA പ്രസിഡണ്ട്‌.വളരെ ചുരുങ്ങിയ പുരുഷന്മാര്‍ വന്ന്‌ അവര്‍ക്കിടയില്‍ നിന്നു തന്നെ പ്രസിഡണ്ടിനെ തിരഞ്ഞെടുക്കുന്ന പതിവു ശൈലി ഒന്നു മാറ്റണം.അവര്‍ക്കും ഒരു അവസരം നല്‌കണം. ഞാന്‍ എന്റെ വാക്കുകള്‍ അവസാനിപ്പിച്ചു.ഞാന്‍ പറഞ്ഞതിനു മറുപടിയെന്നോണം തൊട്ടു പുറകേ തന്നെ ഹെഡ്‌മാസ്റ്റര്‍ സംസാരിച്ചു.

"എനിക്ക്‌ ഏതു സമയത്തും അത്യാവശ്യത്തിന്‌ വിളിച്ചാല്‍ കിട്ടുന്നവരായിരിക്കണം പ്രസിഡണ്ടായിരിക്കേണ്ടത്‌.എല്ലാവരും വിനയയേപ്പോലെ ആകില്ലല്ലോ.സ്‌ത്രീകളാണെങ്കില്‍ അവര്‍ക്ക്‌ വീട്ടില്‍ നിന്ന്‌ സമ്മതം വേണം.നാലു മണിക്കു ശേഷം എത്ര അമ്മമാര്‍ക്ക്‌ വീട്ടില്‍ നിന്ന്‌ വരാന്‍ കഴിയും ? Exicutie അംഗങ്ങളായി 8 പേരാണ്‌ വേണ്ടത്‌ അതില്‍ മൂന്നു പേര്‍ സ്‌ത്രീകളായിരിക്കണം."

അങ്ങനെ സ്‌ത്രീകളുടെ എല്ലാ ആത്മവിശ്വാസത്തേയും ഇകഴ്‌ത്തിയും മീറ്റിംംഗില്‍ പങ്കെടുത്ത എല്ലാ സ്‌ത്രീകളും നാലു മണിക്കു ശേഷം പുറത്തിറങ്ങാത്ത ഉത്തമ സ്‌ത്രീകളാണെന്ന്‌ സമ്മതിച്ചുകൊണ്ട്‌ 'ശരിയാണ്‌, ശരിയാണ്‌ ' എന്ന്‌ സ്വയം മന്ത്രിക്കുവാനും ഹെഡ്‌മാസ്റ്ററുടെ പ്രസംഗം പ്രേരണയായി.

ശേഷം ചിന്തിക്കാനിടം കൊടുക്കാതെ സ്റ്റാഫ്‌ സെക്രട്ടറി Exicutive കമ്മറ്റിയിലേക്കുള്ള അംഗങ്ങളുടെ പേരു പറയേണ്ടുന്നതിന്റെ നിബന്ധന വിവരിച്ചു." ഒരാള്‍ക്ക്‌ ഒരാളുടെ പേരേ നോമിനേറ്റ്‌ ചെയ്യാന്‍ പാടുള്ളൂ.Exicutive -ല്‍ 5 പുരുഷന്മാരും 3 സ്‌ത്രീകളുമാണ്‌ വേണ്ടത്‌."അല്ല മൂന്നു പേര്‍ സ്‌ത്രീകളായിരിക്കണം എന്നേയുള്ളൂ" ഹെഡ്‌മാസ്റ്റര്‍ തിരുത്തി. ആര്‍ക്കും തെല്ലും ചിന്തിക്കാനിടം നല്‌കാതെ " ആ പെട്ടന്ന്‌ തീര്‍ക്കണം സമയം വൈകി പേരു പറയ്‌ പേരു പറയ്‌ .സ്റ്റാഫ്‌ സെക്രട്ടറി ധൃതി കൂട്ടി.

''ആയിഷ..... ''ഞാന്‍ ഒരു സ്‌ത്രീയുടെ പേരു പറഞ്ഞു .

''വനജ'' മറ്റൊരു സ്‌ത്രീ സ്വയം എഴുന്നേറ്റു നിന്ന്‌ അവരുടെ പേരു തന്നെ പറഞ്ഞു.അപ്പോഴേക്കും നാലു പുരുഷന്മാര്‍ മറ്റു നാലു പുരുഷന്മാരുടെ പേരു പറഞ്ഞു കഴിഞ്ഞിരുന്നു.

ഉടനെ തന്നെ ഞാന്‍ വിളിച്ചു പറഞ്ഞു "നാരായണന്‍ "

" നാരായണന്റെ പേര്‌ മുമ്പേ പറഞ്ഞതാണ്‌ " സ്റ്റാഫ്‌ സെക്രട്ടറി ഗൗരവത്തോടെ എന്നെ നോക്കി പറഞ്ഞു

" ആണോ ................... എന്നാലൊരു ഗോപാലന്‍ " ഞാന്‍ തിരിച്ചടിച്ചു.വേദിയിലും സദസ്സിലും പൊട്ടിച്ചിരി ഉയര്‍ന്നു."ആരായാലെന്താ................ നിങ്ങള്‍ക്കു വേണ്ടത്‌ ഒരാണിന്റെ പേരല്ലേ...? തിരഞ്ഞെടുപ്പിന്റെ ബാക്കിചടങ്ങുകള്‍ക്ക്‌ നില്‌ക്കാതെ എന്റെ വികാരം പ്രകടമാക്കി എല്ലാവരോടുമൊന്നിച്ച്‌ ചിരിച്ചുകൊണ്ടു തന്നെ ഞാന്‍ ഹാള്‍ വിട്ടിറങ്ങി.

ആരും അക്കൗണ്ട്‌ ആക്കുന്നില്ല

2010-07-09T08:43:00.001-07:00

ആരും അക്കൗണ്ട്‌ ആക്കുന്നില്ല
രണ്ടു കുട്ടികളുള്ള ഒരു സ്‌ത്രീ മൂന്നു വയസ്സുള്ള ഒരു കുട്ടിയും ഭാര്യയുമുള്ള ഒരാളുടെ കൂടെ ഒളിച്ചോടി.പെണ്ണിന്റെ വീട്ടുകാര്‍ കൊടുത്ത പരാതിയുടെ അടിസ്ഥാനത്തില്‍ പോലീസ്‌ അവരെ പിടികൂടി കോടതിയില്‍ എത്തിച്ചു.കോടതിയില്‍ വെച്ച്‌ സ്വന്തം ഇഷ്ടപ്രകാരം വിട്ടയച്ചവര്‍ കോടതിക്കു പുറത്തുവെച്ച്‌ ബന്ധുക്കളുടേയും സ്‌നേഹിതരുടേയും കൃത്യമായ ഇടപെടലിനെത്തുടര്‍ന്ന്‌ രണ്ടു കുടുംബവും പഴയ ബന്ധങ്ങളിലേക്കു തന്നെ തിരിച്ചുപോയി. ആ ഇടപെടലില്‍ നിര്‍ണ്ണായകമായ ഉപദേശം എന്നെ ഏറെ ചിന്തിപ്പിക്കുകയും അത്ഭുതപ്പെടുത്തുകയും ചെയ്‌തു.വഴി തിരിച്ചുവിട്ട ആ ഉപദേശം നല്‌കിയ ആള്‍ക്ക്‌ ഏകദേശം നാല്‌പതു വയസ്സ്‌ പ്രായം കാണും. മറ്റുള്ളവരുടെ കുറ്റപ്പെടുത്തലിന്റേയും ഉപദേശത്തിന്‍േയും ഇടക്ക്‌ അയാള്‍ പറഞ്ഞു " നിങ്ങള്‍ വെറും പാവങ്ങളാണ്‌.ലോകത്തില്‍ ഇതു പോലുള്ള ബന്ധങ്ങളൊക്കെ എല്ലാവര്‍ക്കും ഉണ്ടാകും.പക്ഷേ ആരും നിങ്ങളെപ്പോലെ അക്കൗണ്ട്‌ ആക്കുന്നില്ല അത്രേയുള്ളൂ"

ബോധമില്ലാത്തവര്

2010-07-04T22:20:00.000-07:00

ബോധമില്ലാത്തവര്
‍ഡ്യൂട്ടി കഴിഞ്ഞ്‌ വീട്ടിലേക്ക്‌ വരും വഴി വിശാലിന്‌ (മകന്‍) ജാകിരി വാങ്ങിക്കാന്‍ ടൗണിലിറങ്ങിയതായിരുന്നു.ബസ്‌റ്റോപ്പിനോടു ചേര്‍ന്ന്‌ കെട്ടിയുണ്ടാത്തിയ വലിയസ്‌ക്രീനില്‍ ലോകകപ്പ്‌ ഫുട്‌പോള്‍ ആവേശത്തോടെ കാണുന്നവര്‍ക്കിടയിലൂടെ ഞാന്‍ ബേക്കറിയിലേക്കു കയറി .ജാകിരി വാങ്ങി ഇറങ്ങാന്‍ തുടങ്ങവേ ബസ്‌റ്റോപ്പില്‍ നിന്നും വിട്ട്‌ രണ്ടു സ്‌ത്രീകള്‍ അബദ്ധത്തില്‍ പോലും ആ സ്‌ക്രീനിലേക്കൊന്നു നോക്കാതെ വളരെ കാര്യമായി എന്തോ സംസാരിച്ചു കൊണ്ടു നില്‍ക്കുന്നുണ്‌ടായിരുന്നു. വണ്ടിയില്‍ കയറാന്‍ തുടങ്ങവേ എന്റെടുത്ത്‌ കളി കണ്ടു നില്‍ക്കുന്നവരിലൊരാള്‍ ആ സ്‌ത്രീകളെ നോക്കികൊണ്ടു പറഞ്ഞു "ആര്‌ ജയിച്ചാലെന്ത്‌ തോറ്റാലെന്ത്‌ ഒരു പ്രശ്‌നവുമില്ല അങ്ങനെയാകണം "എല്ലാവരും ചിരിച്ചു അടുത്ത കമന്റെ്‌ ആരംഭിക്കുന്നതിനുമുമ്പേ വണ്ടി സ്റ്റാര്‍ട്ടാക്കുന്നതിനിടയില്‍ ഞാന്‍ പറഞ്ഞു"അതുപോലെ ബോധമില്ലാത്ത കുറേപ്പേരുള്ളതുകൊണ്ടാണ്‌ നിങ്ങള്‍ക്കൊക്കെ ബോധത്തോടെ നില്‍ക്കാന്‍ കഴിയുന്നത".

സൗഹൃദം

2010-07-03T06:58:00.000-07:00

സൗഹൃദം
എന്തും പറയാനുള്ള സ്വാതന്ത്ര്യമല്ലഎന്തും പറയാതിരിക്കാനുള്ള സ്വാതന്ത്ര്യമാണത്‌

ഈ പെങ്കുട്ടികളിതെന്തു കാണാന്‍ പോയതാ.....

2010-06-28T09:48:00.000-07:00

ഈ പെങ്കുട്ടികളിതെന്തു കാണാന്‍ പോയതാ.....
താമരശ്ശേരി ചുരത്തില്‍ ബ്ലോക്ക്‌ വന്നപ്പോള്‍ നിര്‍ത്തിയിട്ട കെ.എസ്‌.ആര്‍.ടി ബസ്‌ ബ്ലോക്കൊഴിഞ്ഞ ഉടനെ എടുക്കാന്‍ നോക്കിയതേ കണ്ടക്ടര്‍ തിരക്കി
"എല്ലാരും ആയില്ലേ ".
"ഇല്ലില്ല രണ്ടു പെണ്‍കുട്ടികള്‍ വരാനുണ്ട്‌ " ഉടനെ ഒരാള്‍ മറുപടി പറഞ്ഞു.
ബസ്‌ നിര്‍ത്തിയതിനു ശേഷം കുറേശ്ശെകുറേശ്ശെയായി മിക്ക ആണുങ്ങളും റോഡിലിറങ്ങിയിരുന്നു.മറ്റു ചിന്തയൊന്നും വരാത്തതുകൊണ്ട്‌ പുറത്തേക്ക്‌ നോക്കിയിരുന്ന എന്നെ ഉണര്‍ത്തിയത്‌ എന്റെ തൊട്ടചുത്തിരുന്ന മധ്യവയസ്‌ക്കന്റെ പ്രതികരണമായിരുന്നു " അല്ല ഇപ്പെങ്കുട്ടികളിതെന്തു കാണാന്‍ പോയതാ.... " അയാള്‍ പറഞ്ഞുതീരുംമുമ്പേ രണ്ടു പെണ്‍കുട്ടികള്‍ ചടുലതയോടെ ബസ്സിലേക്കു പാഞ്ഞു കയറി.കണ്ടക്ടര്‍ ബെല്ലടിച്ചു.

ആ റിംഗ്‌ടോണൊന്ന്‌ മാറ്റാന്‍ പറയോ..................

2010-06-21T08:30:00.000-07:00

ആ റിംഗ്‌ടോണൊന്ന്‌ മാറ്റാന്‍ പറയോ..................
.വൈകിട്ട്‌ പച്ചക്കറി വാങ്ങി ബൈക്കില്‍ വെച്ച്‌ പോകാനൊരുങ്ങുമ്പോഴാണ്‌ ജമാലും ഭാര്യയും എതിരെ വരുന്നത്‌.ജമാല്‍ ഓട്ടോ ഡ്രൈവറാണ്‌. എന്റെടുത്തത്തിയ ഉടനെ ജമാല്‍ ഭാര്യയെ എനിക്കു പരിചയപ്പെടുത്തി.ഞങ്ങള്‍ ലോഹ്യം പറയുന്നതിനിടയില്‍ ഒരു കാര്‍ അല്‌പം മുന്നിലായി നിര്‍ത്തി ഡ്രൈവര്‍ ജമാലിനെ പേരുചൊല്ലി വിളിച്ചു. ജമാല്‍ പോയ ഉടനെ തന്നെ ഞാന്‍ മുമ്പൊരിക്കല്‍ പോലും കാണാത്ത ജമാലിന്റെ ഭാര്യ ഏറെ പരിചയമുള്ളതു പോലെ സ്വകാര്യമായി എന്നോടു പറഞ്ഞു "നോക്കി ഓലോട്‌ ഇങ്ങളാ റിംഗ്‌ടോണ്‍ ഒന്ന്‌ മാറ്റാന്‍ പറയണേ" എനിക്ക്‌ കാര്യം മനസ്സിലായില്ല.അപ്പോഴേക്കും ജമാല്‍ അടുത്തെത്തിയിരുന്നു.ഞാന്‍ അന്യേഷിക്കുന്ന കേസിലെ പ്രതിയുടെ വീട്‌ ജമാലിന്റെ വീടിനടുത്താണെന്നത്‌ ഞാനപ്പോള്‍ ഓര്‍ത്തു.അയാളെപ്പറ്റി കുറച്ചു കാര്യങ്ങളറിയണംഎന്നു കള്ളം പറഞ്ഞ്‌ ഞാന്‍ ജമാലിന്റെ ഫോണ്‍ നമ്പര്‍ വാങ്ങി.രാത്രി ാെന്‍പതു മണിയോടെ ഞന്‍ ജമാലിന്റെ മൊബൈല്‍ നമ്പര്‍ ഡയല്‍ ചെയ്‌തു.അപ്പോള്‍ മാത്രമാണ്‌ പെണ്‍കുട്ടിയുടെ പരിഭവത്തിന്റെ കാര്യം എനിക്ക്‌ പിടികിട്ടിയത്‌. "ഞാന്‍ കെട്ടിയ പെണ്ണിന്നിത്തിരി ചന്തം കുറവാണ്‌.
എന്നാലും അവളിന്നെന്നുടെ സുന്ദരിയല്ലേ.................".

വലുത്‌

2010-05-26T08:35:00.002-07:00

വലുത്‌

ശര്‍ദ്ദിയും വയറ്റിളക്കവും ബാധിച്ച അമ്പലവയല്‍ വരിപ്ര പണിയകോളനിയിലെ 4 കുട്ടികളെ ആശാവര്‍ക്കര്‍മാര്‍ ആശുപത്രിയിലെത്തിച്ചു.അതില്‍ 8 വയസ്സുള്ള കീരന്‍ എന്ന കുട്ടി ബത്തേരി ആശുപത്രിയിലെത്തിയ ഉടനെ തന്നെ മരിച്ചു.മരണ കാരണം പട്ടിണിയെന്ന്‌ പോസ്‌റ്റ്‌മോര്‍ട്ടം റിപ്പോര്‍ട്ട്‌ .മറ്റു മൂന്നു കുട്ടികളേയും മാനന്തവാടി ജില്ലാ ആശുപത്രിയിലേക്കുമാറ്റി.അവരിപ്പോള്‍ അപകട നില തരണം ചെയ്‌തു.കീരന്‍ സ്‌ക്കൂളില്‍ പോയിരുന്നില്ല.രാഷ്ട്രീയ പ്രവര്‍ത്തകര്‍, ആശാവര്‍ക്കര്‍മാര്‍ , ജനമൈത്രി പോലീസ്‌ബീറ്റ്‌ , കുടുംബശ്രീകള്‍, ഹെല്‍ത്ത്‌ വര്‍ക്കേഴ്‌സ്‌....... തുടങ്ങി ആദിവാസികള്‍ക്കിടയില്‍ ബോധവത്‌ക്കരണവും സാമൂഹ്യസേവനവും നടത്തുന്ന എന്തെല്ലാം സര്‍ക്കാര്‍ സര്‍ക്കാരിതര സംവിധാനങ്ങള്‍ !കീരന്റെ വീട്ടില്‍ ഒരാഴ്‌ചയായിട്ട്‌ റേഷന്‍ വാങ്ങിയിട്ടില്ലായിരുന്നു.ഏഴുകുട്ടികള്‍ക്കും ഏഴ്‌ അച്ഛന്‍മാരാകുമ്പോള്‍ അച്ഛന്റെ റോളിന്‌ പ്രസക്തിയുമില്ല.അമ്മക്ക്‌ കൊടകില്‍ പണിക്കുപോകണം.കുട്ടികളെ പ്രസവിക്കുകമാത്രമാണ്‌ തന്റെ ബാധ്യതയെന്ന്‌ ആ സ്‌ത്രീ നിനച്ചിട്ടുണ്ടാവും.അങ്ങനെ അമ്മക്കും നാട്ടുകാര്‍ക്കും അംഗനവാടിക്കാര്‍ക്കും ആര്‍ക്കും വേണ്ടാത്ത നിസ്സഹായനായ ആ കുഞ്ഞ്‌ പട്ടിണികിടന്നു മരിക്കുകയല്ലാതെ മറ്റെന്തു ചെയ്യാന്‍ .ഞാന്‍ ഡയറ്റ്‌കണ്‍ട്രോളിലാണ്‌ എന്നു പറയുന്നവര്‍ ഞാന്‍ മറ്റുള്ളവരുടെ ഭക്ഷണം അപഹരിക്കുന്നതു നിര്‍ത്തി എന്നു മാറ്റിപ്പറയേണ്ടിയിരിക്കുന്നു.

" ആശയമല്ല ആമാശയമാണ്‌ " വലുത്‌

അതിനിപ്പോഴെന്താ.................

2010-05-26T08:35:00.001-07:00

അതിനിപ്പോഴെന്താ.................

ഒരു ദിവസം പുലര്‍ച്ചെ 'മാര്‍ക്കറ്റില്‍ അടി നടക്കുന്നു പെട്ടന്നു തന്നെ അവിടെ എത്തണം' എന്ന ഫോണ്‍ കോള്‍ വന്നപ്പോള്‍ സ്‌റ്റേഷന്‍ ചാര്‍ജ്ജിലുണ്ടായ ഞാന്‍ മറ്റൊരു പോലീസുകാരനേയും കൂട്ടി സ്‌റ്റേഷനില്‍ നിന്നും ഏഴു കിലോമീറ്റര്‍ അകലെയുള്ള മാര്‍ക്കറ്റു വരേയും മാര്‍ക്കറ്റിലെ പ്രശ്‌നം പരിഹരിച്ചതിനുശേഷം തിരിച്ചു സ്‌റ്റേഷന്‍വരേയും സ്റ്റേഷന്‍ ജീപ്പോടിച്ചു. ഒരിക്കല്‍ എനിക്കയിത്തം കല്‌പിച്ച ആ വാഹനം ഞാനെടുത്ത്‌ ഓടിച്ചിട്ടും പറയത്തക്ക ഒരു ചര്‍ച്ചപോലും ഉണ്ടായില്ല എന്നുമാത്രമല്ല ഞാന്‍ തന്നെ അതെപ്പറ്റി പറഞ്ഞപ്പോള്‍" അതിനിപ്പോഴെന്താ നിങ്ങള്‍ക്ക്‌ ഓതറൈസേഷന്‍ ഉള്ളതല്ലേ " എന്നായിരുന്നു ഒരു സഹപ്രവര്‍ത്തകന്റെ മറുപടി.

കോലം മാറുക.

2010-05-13T21:42:00.000-07:00

കോലം മാറുക.
സഹപ്രവര്‍ത്തകയായ പോലീസുകാരിയെ ഏതോ രണ്ട്‌ ഓട്ടോറിക്ഷാ ഡ്രൈവര്‍മാര്‍ ബസ്‌റ്റാറെിലിരിക്കെ അശ്ലീലം പറഞ്ഞു.വിവരം ഫോണ്‍ മുഖേനെ അറിയിച്ച ഉടനെ തന്നെ പോലീസ്‌ ജീപ്പുമായി പോയി കക്ഷികളെ സ്‌റ്റേഷനിലെത്തിച്ചു.പിന്നീട്‌ അനുകൂലിച്ചും പ്രതികൂലിച്ചും ചര്‍ച്ചകള്‍.ഒരു കമ്‌#റെടിക്കു പോലും സ്വയം പരിഹാരം കാണാന്‍ കഴിയാത്തത്‌ ഒരു പോരിമയായി എനിക്കും തോന്നിയില്ല.താന്‍ കേട്ട അശ്ലീലം മറ്റു നാലുപേരോടുകൂടി പറഞ്ഞ്‌ അതിന്റെ ചെലവില്‍ അവരും കുറേ അശ്ലീലം പറഞ്ഞ്‌ അതിന്റെ വ്യാപ്‌തി കൂട്ടുന്നതിലും ഭേദം തന്റെ കഴിവുകേട്‌ അംഗീകരിച്ച്‌ സഹിക്കുന്നതു തന്നെയല്ലേ.?
ഇതു രണ്ടിനും കഴിയുന്നില്ലെങ്കില്‍ പെണ്ണിന്‌ സമൂഹം കല്‌പിച്ചു തന്ന കോലം (മുടി, വസ്‌ത്ര ധാരണ രീതി )മാറ്റാന്‍ തയ്യാറായി എന്നെപ്പോലെ ആണ്‍ കോലത്തില്‍ നടക്കുക. ഏതു തിരക്കിലും ഒരാളും തോണ്ടാനോ ,പിടിക്കാനോ , അശ്ലീലം പറയാനോ വരില്ല .പേഴ്‌സ്‌ ഒഴികെ ഒന്നും ശ്രദ്ധിക്കാതെ എവിടെ വേണമെങ്കിവും കിടന്നുറങ്ങാം.ആണ്‍ രൂപത്തില്‍ മാത്രമേ ആണിന്‌ പെണ്‍ ശരീരത്തോടുള്ള ആര്‍ത്തിയും ആക്രാന്തവും ഒഴിവാക്കാനാകൂ എന്ന്‌ ബോധ്യമായാല്‍ അവരോട്‌ യുദ്ധം ചെയ്യാതെ അവരുടെ തന്നെ പ്രതിരൂപമാകുക (ആണും പെണ്ണും ഒറ്റ നോട്ടത്തില്‍ ഒരു പോലെയായാല്‍ ആണിനെങ്ങിനെ ചൂഷണം ചെയ്യാനാകും?)മറ്റൊന്നിനുമല്ല അവരുടെ അറക്കുന്ന വാക്കുകളും സ്‌പര്‍ശനങ്ങളും ഒഴിവാക്കുകയെങ്കിലും ചെയ്യാമല്ലോ.
നമ്മുക്ക്‌ ആനന്ദിക്കാനും നമ്മെ ആനന്ദിപ്പിക്കാനും ഉപാധിയാകേണ്ട നമ്മുടെ ശരീരം നമ്മെ പേടിപ്പിക്കാനും നമ്മുക്ക്‌ പേടിക്കാനുമുള്ള ഒന്നായിതീരുമ്പോള്‍ നാം അതിനെ അവഗണിക്കുക തന്നെ വേണം.

വിധിക്കപ്പെട്ട വര്‍ഗ്ഗം

2010-05-01T07:27:00.000-07:00

വിധിക്കപ്പെട്ട വര്‍ഗ്ഗം
കേരളാ പോലീസ്‌ അസോസിയേഷന്റെ തൃശ്ശൂര്‍ ഘടകം സംഘടിപ്പിച്ച ചര്‍ച്ച വിഷയം സിനിമയിലെ പോലീസും യഥാര്‍ത്ഥപോലീസും. വേദിയില്‍ എന്നെക്കണ്ടതുകൊണ്ടോ എന്തോ പ്രാസംഗികരിലൊരാള്‍ തന്റെ അഭിപ്രായപ്രകടനത്തില്‍ "ഈയിടെ നടന്ന ഒരു സിനിമാനടിയുടെ വിവാഹത്തോടനുബന്ധിച്ച്‌ മൊബൈല്‍ ഫോണില്‍ വ്യാപകമായി വന്ന ഒരു മെസേജ്‌ നിങ്ങളും കണ്ടു കാണുമല്ലോ......... ? ഒരു പൊതുമേഖലാ സ്ഥാപനം കൂടി സ്വകാര്യവല്‍ക്കരിച്ചിരിക്കുന്നു. സദസ്സില്‍ കൂട്ടച്ചിരി.വിഷയത്തില്‍ അധിഷ്ടിതമായും അല്ലാതേയും വളരെ ഗൗരവമായി സംസാരിച്ച്‌ അയാള്‍ തന്റെ വാക്കുകള്‍ അവസാനിപ്പിച്ചു .എന്റെ ഊഴത്തില്‍ ഞാന്‍ ഇങ്ങനെ തുടങ്ങി.first I am a woman ,then i am a police.അതുകൊണ്ടു തന്നെ എനിക്ക്‌ ഇപ്പോള്‍ പറഞ്ഞ ആ സ്വകാര്യവത്‌ക്കരണത്തെക്കുറിച്ച്‌ പറഞ്ഞേ മതിയാകൂ......... പുരുഷന്‍ എപ്പോഴും വിശ്വാസത്തിന്റെ ലോകത്തിലാണ്‌. അവന്‌ വിശ്വസിക്കാന്‍ മാത്രമേ നിര്‍വ്വാഹമുള്ളൂ.വിവാഹം കഴിയുന്നതോടെ സ്‌ത്രീ സ്വകാര്യസ്വത്തായി മാറി എന്നതു പുരുഷന്റെ വിശ്വാസം മാത്രമാണ്‌.നിങ്ങളുടെ പ്രണയിനി മറ്റൊരാളെ വിവാഹം കഴിച്ചു എന്നുവെച്ച്‌ നിങ്ങള്‍ അവളോട്‌ സംസാരിക്കാതിരിക്കുന്നുണ്ടോ ? അവള്‍ക്ക്‌ മെസേജുകള്‍ അയക്കാതിരിക്കുന്നുണ്ടോ ?.അതുപോലെ തിരിച്ചും .കുടുംബത്തിന്റെ സമാധാനം പരിഗണിച്ച്‌ രണ്ടുകൂട്ടരും പരസ്‌പരം ചര്‍ച്ച ചെയ്യുന്നില്ലെന്നു മാത്രം.കാക്കയുടെ കൂട്ടില്‍ കുയിലിന്റെ മുട്ടയാണോ എന്ന്‌ കാക്കയെങ്ങനെ അറിയും.അത്‌ കൃത്യമായ വേര്‍തിരിവ്‌ കാണിക്കും വരെയെങ്കിലും കാക്കക്ക്‌ വിശ്വസിക്കുകമാത്രമേ നിര്‍വ്വാഹമുള്ളൂ.പാവം കാക്ക വിശ്വസിക്കാന്‍ മാത്രം വിധിക്കപ്പെട്ട വര്‍ഗ്ഗം. ഇനി നമ്മുക്ക്‌ വിഷയത്തിലേക്കു കടക്കാം.പിന്നീട്‌ ചര്‍ച്ചയുടെ വിഷയത്തില്‍ നിന്നുകൊണ്ടുമാത്രം സംസാരിച്ച്‌ ഞാന്‍ അവസാനിപ്പിച്ചു.

വര നിയമം

2010-04-24T09:45:00.000-07:00

വര നിയമം
എന്റെ വിവാഹം കഴിഞ്ഞ്‌ അഞ്ചാം നാള്‍ രാത്രിയില്‍ അമ്മയും നാത്തൂനും ദാസേട്ടനും കൂടി കാര്യമായ ചര്‍ച്ചയിലാണ്‌.തറവാട്ടിലെ ആണുങ്ങള്‍ എങ്ങനെയായിരിക്കണം എന്നതാണ്‌ വിഷയം.
"രാജനെ കണ്ടില്ലേ................. ഓന്‍ വരച്ച വരേമ്മല്‌ നിര്‍ത്തും ഓള....(അവളെ),കൃഷ്‌ണന്റെ കാര്യെന്താ മോശാ.... നെലക്ക്‌ നിന്നില്ലേല്‌ ഓള്‌ വിവരറിയും.ഇവിടുത്തെ പെങ്കുട്ടികള്‌ ഭര്‍ത്താക്കന്മാര്‌ വരച്ച വരേന്റെ അപ്പറം കടക്കൂല................. "
ഏതോ സത്‌ക്കാരം കഴിഞ്ഞ്‌ ക്ഷീണിച്ചെത്തി കുളി കഴിഞ്ഞ്‌ കിടക്കാന്‍ തുടങ്ങവേയാണ്‌ ചര്‍ച്ച.ക്ഷീണം കാരണം ഞാന്‍ ആരേയും തന്നെ കാര്യമായി ഗൗനിക്കാതെ കിടന്നു.എന്റെ കട്ടിലിന്റെ കാല്‍ ഭാഗം അറ്റത്തയി്‌ട്ടാണ്‌ ദാസേട്ടന്‍ഇരുന്നിരുന്നത്‌.അമ്മയും നാത്തൂനും തൊട്ടടുത്ത മുറിയിലെ കട്ടിലിന്റെ അറ്റത്തും.കാഴ്‌ചയിലും പെരുമാറ്റത്തിലും അല്‌പം തന്റേടിയായ എനിക്കുള്ള മുന്നറിയിപ്പാണത്‌ എന്നു മനസ്സിലാക്കാന്‍ പ്രത്യേകിച്ച്‌ ചിന്തിക്കേണ്ട ആവശ്യമില്ലായിരുന്നു.പുതക്കാനായി കാല്‍ ഭാഗത്ത്‌ മടക്കിയിട്ടിരുന്ന കമ്പിളി എടുക്കാനെന്നവണ്ണം എഴുന്നേറ്റ്‌ ആ കമ്പിളി നിവര്‍ത്തികൊണ്ട്‌ തെല്ലുച്ചത്തില്‍ തന്നെ പറഞ്ഞു
"അമ്മേ വര നിയമം ഒന്നും ഇനിയും മാറ്റണ്ട ഒരു ചെറിയ വ്യത്യാസം മാത്രം ഞാന്‍ നില്‌ക്കുന്നിടത്തൊക്കെവന്ന്‌ ദാസേട്ടന്‍ വരക്കണം " കമ്പിളിയുടെ മടക്കുകള്‍ നിവര്‍ത്തി സുഖമായി പുതച്ച്‌ ഞാന്‍ കിടന്നു. ചര്‍ച്ചയുടെ ഒഴുക്ക്‌ പെട്ടന്ന്‌ മുറിഞ്ഞു.കല്ല്യാണച്ചിലവും , വരാത്ത ആളുകളുടെ പേരുകളും അങ്ങിനെ പലതും പറഞ്ഞ്‌ രണ്ടു മിനിട്ടുകൊണ്ട്‌ ആ സംഭാഷണം അവസാനിപ്പിച്ച്‌ എല്ലാവരും കിടന്നു.

പര്‍ദ്ദകള്‍ വാടകക്ക്‌

2010-04-09T10:32:00.000-07:00

പര്‍ദ്ദകള്‍ വാടകക്ക്‌

സുഹൃത്തിനോടൊപ്പം മുംബെ കാണാനായി പോയതായിരുന്നു.തിരക്കേറിയ വാശി റയില്‍വേസ്‌റ്റേഷനിലെ കാഴ്‌ചകള്‍ കണ്ടുകൊണ്ട്‌ ഒരു ബെഞ്ചില്‍ ഞങ്ങള്‍ ഇരുന്നു. രണ്ടു സ്‌ത്രീകള്‍ വളരെ സാവധാനം ഞങ്ങള്‍ക്കരികിലായി ഇരുന്നു.അവരുടെ രണ്ടു പേരുടെ കൈയ്യിലും ഓരോ സ്യൂട്ട്‌കേയ്‌സ്‌ ഉണ്ടായിരുന്നു.കാഴ്‌ചയില്‍ അമ്മയും മകളുമാണെന്ന്‌ തോന്നുന്ന അവര്‍ സാരിയും ചുരിതാറുമാണ്‌ ധരിച്ചിരുന്നത്‌ . അവരേറെ ആഹ്ലാദഭരിതരായിരുന്നു.ശബ്ദം കൂട്ടിയും കുറച്ചും സംസാരിച്ചും ഇടക്കൊക്കെ പൊട്ടിച്ചിരിച്ചുകൊണ്ടുമാണ്‌ അവര്‍ ഞങ്ങളുടെ അടുത്തെത്തിയത്‌.വന്നയുടനെ അവര്‍ രണ്ടുപേരും സംസാരിച്ചുകൊണ്ടു തന്നെ സ്യൂട്ട്‌കെയ്‌സിന്റെ സിബ്ബ്‌ തുറന്ന്‌ അതില്‍ വെച്ചിരുന്ന പര്‍ദ്ദയെടുത്തു.ശേഷം യാതൊരു വിധ സങ്കോചവും കൂടാതെ കണ്ണൊഴികെ ബാക്കി ഭാഗങ്ങള്‍ മറച്ചു. പിന്നീടവര്‍ മറ്റു രണ്ടു വ്യക്തികളായി അവിടെ നിന്നും നടന്നു നീങ്ങി.ഈ കാഴ്‌ച എന്നെ അത്ഭുതപ്പെടുത്തി.എന്റെ അത്ഭുതം ഞാന്‍ സുഹൃത്തിനെ അറിയിച്ചപ്പോള്‍ അവര്‍ വളരെ നിസ്സാരമായി പറഞ്ഞു " മാഡം ഇതൊക്കെ ഇവിടെ പതിവാ.................... അവര്‍ വല്ല ബന്ധുവീട്ടിലും പോകുകയായിരിക്കും.അവരുടെ കണ്ണില്‍ പൊടിയിടാനാ.............. ഒരു പര്‍ദ്ദയുടെ ഇരട്ടി വിലകൊടുത്താല്‍ പര്‍ദ്ദകള്‍ വാടകക്ക്‌ കിട്ടുന്ന അനവധി കടകളിവിടുണ്ട്‌.മടക്കികൊടുക്കുമ്പോള്‍ പകുതി വില തിരിച്ചുകൊടുക്കും" അവര്‍ നിസ്സാരമട്ടില്‍ പറഞ്ഞു.

അതിനെന്താ കുടുംബശ്രീയില്ലേ............

2010-04-01T08:48:00.000-07:00

അതിനെന്താ കുടുംബശ്രീയില്ലേ............

പോലീസ്‌ പൊതുജന സൗഹൃദസദസിലേക്ക്‌ പഞ്ചായത്ത്‌ പ്രസിഡണ്ടിനെ ക്ഷണിക്കാനും പഞ്ചായത്തിന്റെ സഹകരണം ഉറപ്പുവരുത്താനുമായി പോലീസ്‌ അസോസിയേഷന്റെ ഭാരവാഹികളൊപ്പം പോയതായിരുന്നു.പോലീസ്‌ അസോസിയേഷന്റെ സെക്രട്ടറി പരിപാടിയില്‍ പങ്കെടുക്കാന്‍ പ്രസിഡണ്ടിനെ ക്ഷണിച്ചതിനു ശേഷം പറഞ്ഞു

" പ്രസിഡണ്ടേ........... ഇത്‌ നമ്മുടെ പരിപാടിയാണ്‌.അതുകൊണ്ട്‌തന്നെ ഇത്‌ വിജയിപ്പിക്കേണ്ടതും നമ്മളാണ്‌.മന്ത്രിയും, എംപിയും, എം എല്‍ എ യും എല്ലാം പങ്കെടുക്കുന്ന പ്രോഗ്രാമാണ്‌ നല്ല ഓഡിയന്‍സ്‌ ഉണ്ടായിരിക്കണം " സെക്രട്ടറി പറഞ്ഞു തീര്‍ന്നില്ല പ്രസിഡണ്ട്‌ ഗൗരവത്തോടെ പറഞ്ഞു

" അതിനെന്താ കുടുംബശ്രീ ഇല്ലേ................. പഞ്ചായത്തില്‍ 250 കുടുംബശ്രീയുണ്ട്‌.ഒരാളുവീതം വന്നാലും 250 പേരായില്ലേ. നിര്‍ബന്ധമായും പങ്കെടുക്കാന്‍ ഞാന്‍ പറയാം" .കാര്യകാരണങ്ങളറിയാതെ ഏതു പദ്ധതികളും മീറ്റിംഗുകളും വിജയിപ്പിക്കാന്‍ വിധിക്കപ്പെട്ട കുടുബശ്രീയുടെ പങ്കാളിത്തം ഉറപ്പു വരുത്തി ഞങ്ങളും സന്തോഷത്തോടെ മടങ്ങി.

ഒന്ന്‌ സഹായിക്കാതിരുന്നാല്‍ മാത്രം മതി..............................

2010-03-28T10:33:00.000-07:00

ഒന്ന്‌ സഹായിക്കാതിരുന്നാല്‍ മാത്രം മതി..............................

ഹൈസ്‌ക്കൂളില്‍ പഠിച്ചപ്പോള്‍ മിടുക്കിയായിരുന്ന പുഷ്‌പ ഏറെ തളര്‍ന്നാണ്‌ എന്റെടുത്തെത്തിയത്‌.ഭര്‍ത്താവിന്റെ ഉപദ്രവം തന്നെയായിരുന്നു കാരണമെങ്കിലും ആദ്യം അയാളുടെ ഉപദ്രവത്തില്‍ നിന്നും രക്ഷപ്പെടുത്തിയവര്‍ ഇന്ന്‌ അയാളുടെ കൂടെ നില്‍ക്കാന്‍ ബുദ്ധിമുട്ടിക്കുകയാണെന്നുംനാട്ടുകാരേയും വീട്ടുകാരേയും മുഷിപ്പിക്കാതെ താന്‍ സ്വന്തമായി പണിത തന്റെ വീ്‌ടില്‍ രണ്ടുകുഞ്ഞുങ്ങളോടൊത്ത്‌ ഇനിയുള്ള കാലം മനസമാധാനത്തോടെ ജീവിക്കണം എന്നതാണ്‌ പുഷ്‌പയുടെ ആവശ്യം.മുഴുക്കുടിയനും ഉപദ്രവകാരിയുമായിരുന്ന ഭര്‍ത്താവ്‌ നാട്ടുകാരുടെ ഇടപെടലും പുഷ്‌പ കൊടുത്ത പോലീസ്‌ കേസും നിമിത്തം രണ്ടു വര്‍ഷമായി അയാളുടെ നാടായ തിരുവനന്തപുരത്തായിരുന്നു.രണ്ടുമാസം മുമ്പ്‌ നാട്ടില്‍ വന്ന അയാള്‍ നാട്ടുകാരേയും വീട്ടുകാരേയും കൈയ്യിലെടുത്തു.അയാള്‍ പോട്ടയില്‍ പോയി ധ്യാനം ചെയ്‌തെന്നും തത്‌ഫലമായി മാനസാന്തരപ്പെട്ടെന്നുമാണ്‌ അയാളും നാട്ടുകാരും വീട്ടുകാരും പറയുന്നത്‌.മാനസാന്തരപ്പെട്ടവന്‌ ഒരവസരം കൊടുത്തുകൂടേ എന്നതാണ്‌ അവരുടെ ഭാഷ്യം .രാവിലത്തെ തിരക്കും പതിവു ഡ്യൂട്ടികളും എന്നെ അക്ഷമയാക്കി. പുഷ്‌പയുടെ കഥക്ക്‌ വിരാമമിടാനെന്നവണ്ണം അവര്‍ ഉദ്ദേശിക്കുന്ന പരിഹാരമറിയാനായി ചോദിച്ചു."തനിക്ക്‌ എന്ത്‌ സഹായമാണ്‌ അയാളില്‍നിന്നും വേണ്ടത്‌ " അങ്ങനെ ചോദിക്കാനുള്ള കാരണം സാധാരണയായി സ്‌ത്രീകള്‍ ചിലവിനു കിട്ടാനും അയാളുടെ(ഭര്‍ത്താവിന്റെ) പേരിലുള്ള സ്വത്തിന്റെ വിഹിതം നേടുക തുടങ്ങിയവക്കുള്ള നിയമോപദേശവും മറ്റുമാണ്‌ ചോദിക്കുക.അയാള്‍ക്ക്‌ തിരുവനന്തപുരത്ത്‌ ലക്ഷങ്ങള്‍ വിലമതിക്കുന്ന അഞ്ച്‌ സെന്റെ ഭൂമിയുണ്ടെന്നവള്‍ സംസാരമധ്യേ സൂചിപ്പിച്ചത്‌കൂടി മനസ്സില്‍ വെച്ചാണ്‌ ഞാന്‍ അപ്രകാരം ചോദിച്ചത്‌.എന്റെ ചോദ്യം കഴിഞ്ഞുതീരും മുമ്പ്‌ പുഷ്‌പ മറുപടി പറഞ്ഞു"വിനയേ............... വേറൊന്നും വേണ്ട അയാളെന്നെയൊന്ന്‌ സഹായിക്കാതിരുന്നാല്‍ മാത്രം മതി..............

അവളിപ്പോഴും സൂ................പ്പര്‍

2010-03-25T06:46:00.000-07:00

അവളിപ്പോഴും സൂ................പ്പര്‍

രണ്ടു ദിവസത്തെ വിശ്രമമില്ലാത്ത ഔദ്യോഗിക ഡ്യൂട്ടിയില്‍ എന്നെ ഏറെ സഹായിച്ച ചടുലതയുള്ള ചെറുപ്പക്കാരനായിരുന്നു ജലീല്‍ .തിരിച്ചൊന്നും പ്രതീക്ഷിക്കാതെ ഇത്രയേറെ കഷ്ടപ്പെടാനും ത്യാഗം ചെയ്യാനുമുള്ള ജലീലിന്റെ നല്ല മനസ്സ്‌ ഭൂമിയിലിപ്പോഴും നന്മ വറ്റിയിട്ടില്ലെന്നതിന്റെ തെളിവായി എനിക്കു തോന്നി.മിതഭാഷിയായ ജലീല്‍ ഏറെ തിരക്കും ഉത്തരവാദിത്തങ്ങളും ഉള്ള വ്യക്തിയാണെന്നും ആര്‍ക്കൊക്കയോ ഏറെ വേണ്ടപ്പെട്ടവനാണെന്നും അയാളുടെ ഫോണ്‍ സന്ദേശങ്ങളിലൂടേയും,ആളുകള്‍ അയാളോട്‌ പെരുമാറുന്ന രീതിയില്‍ നിന്നും എനിക്ക്‌ ബോധ്യമായി.രണ്ടാമത്തെ ദിവസം ഉച്ചയോടെ ജലീലിന്റെ കുടുംബത്തെക്കുറിച്ചന്യേഷിച്ചു.

" ജലീല്‍ married അല്ലേ , കുട്ടികള്‍ "?

"അതെ. " ജലീല്‍ ഉത്തരം പറഞ്ഞ്‌ നിര്‍ത്തി.

"കുട്ടികളില്ലേ" സ്വാഭാവികമായ ജിജ്ഞാസയോടെ ഞാന്‍ ചോദിച്ചുപോയി.

"ഉം............ " ജലീല്‍ ഒരു മൂളലില്‍ നിര്‍ത്തി.

"എത്ര പേരുണ്ട്‌ "? ഞാന്‍ ശീലിച്ച രീതിയില്‍ തുടര്‍ന്നു.

" പന്ത്രണ്ട്‌ " വളരെ നിസ്സാര ഭാവത്തില്‍ പറഞ്ഞ്‌ ജലീല്‍ ഡ്രൈവിംഗ്‌ തുടര്‍ന്നു.

"ന്റെമ്മോ............ പന്ത്രണ്ടോ...... അവരാകെ തളര്‍ന്നിട്ടുണ്ടാകുമല്ലോ " ഒരു നിമിഷം എന്റെ ശ്വാസം പോലും നിന്നുപോയിഎന്റെ അത്‌ഭുതത്തെ ഒന്നുകൂടി അത്ഭുതപ്പെടുത്തിക്കൊണ്ട്‌ ഡ്രൈവിംഗിനിടെ വലതുകൈയ്യുയര്‍ത്തി തള്ളവിരല്‍ പുറകോട്ടു മടക്കി വീറോടെ ജലീല്‍ പറഞ്ഞു " ഉം....................... അവളിപ്പോഴും സൂ....................പ്പര്‍ "

അഭ്യര്‍ത്ഥന

2010-03-16T21:43:00.000-07:00

അഭ്യര്‍ത്ഥന

തിരുവന്തപുരത്തുള്ള ഹിന്ദികോളേജിലെ ഒരു ചടങ്ങ്‌ . അഥിതിയായി എന്നെ കൂടാതെ വേദിയില്‍ ആറു പുരുഷന്മാരും ഉണ്ടായിരുന്നു.(മുപ്പതിനും എഴുപതിനും മധ്യേ പ്രായമുള്ളവര്‍)സ്വാഗത പ്രാസംഗികന്‍ ഓരോരുത്തര്‍ക്കും സ്വാഗതമരുളുമ്പോള്‍ സ്‌റ്റേജിനു പിന്നില്‍ നിന്നും സെറ്റു സാരി ധരിച്ച്‌ മുല്ലപ്പൂ ചൂടി ചന്ദനക്കുറി അണിഞ്ഞ സുന്ദരികളായ യുവതികള്‍ സ്വാഗതമരുളുന്ന വ്യക്തികള്‍ക്ക്‌ റോസാപ്പൂകൊണ്ടുള്ള ഓരോ ബൊക്കെകള്‍ കൊടുത്തു.അഞ്ചാമതായിട്ടാണ്‌ എനിക്ക്‌ സ്വാഗതം പറഞ്ഞത്‌.എനിക്കും കിട്ടി സുന്ദരിയില്‍ നിന്നും ഒരു ബൊക്കെ.എന്റെ പ്രസംഗവേളയില്‍ ഞാന്‍ ഇങ്ങനെ തുടങ്ങി.

"എന്നെ വിളിച്ചതില്‍ എനിക്കു സന്തോഷമുണ്ടെങ്കിലും നിങ്ങളുടെ ബൊക്കെ തന്ന രീതിയില്‍ ഞാന്‍ തീര്‍ത്തും നിരാശവതിയാണ്‌. ഇവിടിരിക്കുന്ന പ്രായഭേദമന്യേ എല്ലാ പുരുഷന്മാര്‍ക്കും സുന്ദരികളായ യുവതികള്‍ ബൊക്കെ കൊടുക്കുന്നതും അവരെല്ലാം ആ സുനദരിമാരോട്‌ ചിരിച്ച്‌ ചാരിതാര്‍ത്ഥ്യത്തോടെ ബൊക്കെ വാങ്ങുന്നതും കണ്ടപ്പോള്‍ ഞാനും കൊതിയോടെ കാത്തിരുന്നു, കൗപീനം നിഴലിക്കുന്ന ഒറ്റമുണ്ടുടുത്ത്‌ രണ്ടാം മുണ്ടും തോളിലിട്ട്‌ ചന്ദനക്കുറിയണിഞ്ഞ ഒരു സുന്ദരന്‍.ആ സുന്ദരന്റെ വിരലുകളില്‍ മനപ്പൂര്‍വ്വമല്ലാതെന്നവണ്ണം നന്നായിട്ടൊന്ന്‌ സ്‌പര്‍ശിച്ച്‌ സായൂജ്യമടയാന്‍ ഞാനും വല്ലാതെ മോഹിച്ചുപോയി.തീര്‍ച്ചയായും ഞാന്‍ നിരാശപ്പെട്ടു.അടുത്ത തവണ നിങ്ങള്‍ എന്നെ വിളിക്കുകയാണെങ്കില്‍ ബൊക്കെ തരാന്‍ ഒരു സുന്ദരനെ ശട്ടംകെട്ടണേ...... ഞാന്‍ അവരോടഭ്യര്‍ത്ഥിച്ചു.

മിഠായി

2010-03-09T09:59:00.000-08:00

മിഠായി
രാജ്യസഭയില്‍ വനിതാബില്‍ പാസായതിനെത്തുടര്‍ന്ന്‌ ' ചരിത്രപരമായ നിമിഷം ' എന്ന ടെലിവിഷന്‍സ്ലൈഡ്‌ കണ്ട്‌ ഞാന്‍ എന്റെ ഗ്രാമമായ മാടക്കരരയിലേക്കോടി.പ്രതീക്ഷിച്ചതായ യാതൊരുവിധ ആരവങ്ങളോ , ജയ്‌ വിളിയോ ഇല്ലാതെ ആണുങ്ങള്‍ കൂട്ടം കൂട്ടമായി നാട്ടുകാര്യങ്ങള്‍ പറയുന്നു.ഞാന്‍ സനിക ബേക്കറിയില്‍ നിന്നും കുറച്ചു മിഠായി വാങ്ങി ടൗണിലുള്ള ആണ്‍കൂട്ടങ്ങള്‍ക്ക്‌ വിതരണം ചെയ്‌തു.ഓരോരുത്തരും കാര്യം തിരക്കി.വനിതാ ബില്ല്‌ പാസായതിന്‌ എന്നു ഞാന്‍ മറുപടിയും കൊടുത്തു.ടൗണില്‍ മിഠായി വിതരണം നടത്തി ഞാന്‍ വീട്ടിലെത്തി.അല്‌പം കഴിഞ്ഞപ്പോള്‍ എന്നെകാണാന്‍ ജോര്‍ജ്ജേട്ടന്‍ എത്തി.ഞാന്‍ ജോര്‍ജ്ജേട്ടനോട്‌ കാര്യം തിരക്കി.(മിനിട്ടുകള്‍ക്കു മുമ്പ്‌ കണ്ടതുകൊണ്ട്‌ )"മാഡം ഞാന്‍ നിങ്ങളെയൊന്ന്‌ അഭിനന്ദിക്കാന്‍ വന്നതാ..... " " എന്തിനാ ജോര്‍ജ്ജേട്ടാ വനിതാ ബില്ല്‌ പാസായ വകയിലാ " ഞാന്‍ എന്റെ സംശയം തുറന്നു ചോദിച്ചു." അതിനു മാത്രമല്ല ആ സമയം വരെ ആര്‍ക്കും ഒരു വിഷയം പോലുമല്ലാതിരുന്ന വനിതാബില്‍ ആ മിട്ടായി വിതരണത്തിനുശേഷം എല്ലാവരുടേയും മുഖ്യ വിഷയമായി മാറി.മാടക്കരയിലിപ്പോള്‍ എല്ലാവരും ചര്‍ച്ച ചെയ്യുന്നതുതന്നെ വനിതാബില്ലാണ്‌.ഒരു മിഠായിക്ക്‌ ഇത്രയും കഴിവുണ്ടെന്നിപ്പഴാ മനസ്സിലായത്‌. ജോര്‍ജ്ജേട്ടന്‍ ചിരിച്ചു.ജോര്‍ജ്ജേട്ടന്‍ പറഞ്ഞപ്പോള്‍ മാത്രമാണ്‌ ആ മിഠായി വിതരണത്തിന്റെ ഉദ്ദേശം ഞാനും ഓര്‍ത്തത്‌.

എന്തെല്ലാം പഠനങ്ങള്‍.......

2010-03-07T06:23:00.000-08:00

എന്തെല്ലാം പഠനങ്ങള്‍.......!വ്യക്തികളുടെ വിലാസം അവരെ തിരിച്ചറിയാന്‍ മാത്രമാണെന്നാണ്‌ ഞാന്‍ കരുതിയിരുന്നത്‌.സ്‌ത്രീയുടെ വിലാസം എഴുതുന്ന രീതിയില്‍ തന്നെ പുരുഷന്റെ വിലാസവും എഴുതാം എന്നാണെങ്കില്‍ അത്‌ വെറും വ്യാമോഹം.കാര്യത്തോടടുക്കുമ്പോളറിയാം സ്‌ത്രീയും പുരുഷനും ഒരേ നാണയത്തിന്റെ രണ്ടു വശങ്ങളാണെന്നൊക്കെ വീമ്പു പറയുന്ന മനുഷ്യസ്‌നേഹികളുടെ യഥാര്‍ത്ഥമുഖം .ഇക്കാര്യം ഞാനറിയാന്‍ തുടങ്ങിയിട്ട്‌ ശ്ശി കാലമായെങ്കിലും രണ്ടു മാസങ്ങള്‍ക്കു മമ്പാണ്‌ അതിന്റെ ശക്തി വളരെ നേരിട്ട്‌ അനുഭവിക്കാനുള്ള 'ഭാഗ്യം' ഉണ്ടായത്‌.സ്ഥലം എന്റെ തൊഴിലിടം തന്നെ.ഞാന്‍ പുരുഷന്മാരുടെ വിലാസമെഴുതുന്ന രീതിയാണ്‌ എന്റെ പുരുഷ സഹപ്രവര്‍ത്തകരേയും പുരുഷമേലുദ്യോഗസ്ഥരേയും ചൊടിപ്പിച്ചത്‌."സീത w/o(Wife of) രാമന്‍, തെക്കേടത്ത്‌ (വീട്‌) മാങ്കൊമ്പ്‌ ,അമ്പലവയല്‍ ഈ വിലാസമെഴുതിയ രീതി ശരിയാണ്‌ അംഗീകരിക്കത്തക്കതാണ്‌.രാമന്റെ വിലാസമാണ്‌ പ്രകോപനമുണ്ടാക്കിയത്‌."രാമന്‍ H/o(Husbend of)സീത,തെക്കേടത്ത്‌ വീട്‌ മാങ്കൊമ്പ്‌ അമ്പലവയല്‍ (പേരുകള്‍ സാങ്കല്‍പികം) വിലാസം ശ്രദ്ധയില്‍ പെട്ട മാത്രയില്‍ സ്റ്റേഷനിലെ പുരുഷാധിപത്യത്തിനു വിള്ളലേറ്റു.അവര്‍ പ്രതികരിച്ചു.മാറ്റിയെഴുതണം. സ്‌ത്രീകള്‍ അറിയപ്പെടാത്തവരാണ്‌.പുരുഷന്‍ അറിയപ്പെടേണ്ടത്‌ അവന്റെ അച്ഛന്റെ പേരിലാണ്‌.... ന്യായങ്ങള്‍ പലവിധം.എവിടെയോ കിടന്ന ഒരു രാമനു വേണ്ടി ഒത്തിരി രാമന്‍മാര്‍ ശബ്ദിച്ചു.മാറ്റി എഴുതണമെങ്കില്‍ അതിലെ തെറ്റു കാണിച്ച്‌ മെമ്മോ തരണമെന്നും,രേഖാപരമായി ആവശ്യപ്പെട്ടാലല്ലാതെ തിരുത്താനാകില്ലെന്ന്‌ ഞാനും ശഠിച്ചു.പ്രശ്‌നം ഉന്നത(പുരുഷ)ാധികാരികളുടെ മുന്നിലും എത്തിച്ചു.ഇപ്പോള്‍ സ്വതന്ത്രമായ എല്ലാ ചുമതലകളില്‍ നിന്നും ഒഴിവാക്കി ഒരു കാഴ്‌ചവസ്‌തുവായി സ്‌റ്റേഷന്റെ മുന്നിലരുത്തി മറ്റുള്ളവരുടെ തിരക്കിട്ട ജോലികളും ചര്‍ച്ചകളും ശ്രദ്ധിച്ച്‌ അവഗണനയുടെ തീഷ്‌ണത എത്രത്തോളം സഹിക്കാമെന്ന്‌ അനുഭവിച്ച്‌ പഠിക്കാന്‍ ശ്രമിക്കുന്നു.എന്തെല്ലാം പഠനങ്ങള്‍......!

സത്‌പേര്‌ കാക്കുന്ന മൂപ്പന്‍ പെണ്‍കുട്ടികള്‍

2010-03-02T09:15:00.000-08:00

സത്‌പേര്‌ കാക്കുന്ന മൂപ്പന്‍ പെണ്‍കുട്ടികള്‍
വയനാട്ടിലെ ആദിവാസികളാണ്‌ മൂപ്പന്‍മാര്‍.കുറുമര്‍ എന്നും പറയും.ഇവരുടെ കുടുംബങ്ങള്‍ സ്‌ത്രീകളെ വ്യാപകമായ ചൂഷണത്തിനു വിധേയമാക്കുന്നതിനുപയോഗിക്കുന്ന ഒരു ആചാരമാണ്‌ കുലം.ഒരു പെണ്‍കുട്ടിക്ക്‌ ഏതെങ്കിലും വിധത്തില്‍ ഒരു വിവാഹം ആരെങ്കിലും തരപ്പെടുത്തുമ്പോള്‍ കുലം ചേരില്ലെന്നു പറഞ്ഞ്‌ കാരണവന്‍മാര്‍ വളരെ എളുപ്പത്തില്‍ ആ വിവാഹം മുടക്കുന്നു. ഒരു പുരുഷനും കുലം ചേരാത്തതിന്റെ പേരില്‍ വിവാഹം കഴിക്കാതേയുമിരിക്കുന്നില്ല എന്നതാണ്‌ ഇതിലെ പൊള്ളത്തരം. ചൊവ്വാദോഷത്തന്റേയും ശുദ്ധ ജാതകത്തിന്റേയും പേരില്‍ വിവാഹം മുടങ്ങുന്ന മേല്‍ജാതിക്കാരില്‍ ആണും പെണ്ണും ഒരുപോലെയുണ്ട്‌ എന്നതും ഈ അവസരത്തില്‍ നാം ഓര്‍ക്കേണ്ടതുണ്ട്‌. ഇന്ന്‌ ഏതൊരു മൂപ്പന്‍ കോളനിയെടുത്താലും മുപ്പതു വയസ്സില്‍ ഏറെ പ്രായമുള്ള അവിവാഹിതരായ നാലും അഞ്ചും യുവതികളെ നമ്മുക്ക്‌ കാണാനാകും.ഇവരുടെ സ്വത്തും അധ്വാനവും ഇവര്‍ കുടുംബത്തിനു വേണ്ടി തന്നെ ഉപയോഗിച്ച്‌ യാതൊരു മാനസീകാനന്ദവും കണ്ടെത്താനാകാതെ നിസ്സഹായരായി ജീവിക്കന്നത്‌ ആരിലും സഹതാപം ഉളവാക്കും. സമുദായത്തിന്റെ വിലക്കും പുറത്താക്കലും ഭയന്ന്‌ ഇവര്‍ പ്രേമിക്കാന്‍ പോലും മടിക്കുന്നു. ഇവരില്‍ ഏതൊരു സ്‌ത്രീയോടും നമ്മള്‍ സ്വകാര്യമായി ചോദിച്ചാല്‍ അവരുടെ ചെറുപ്പകാലത്ത്‌ ഒരു നിബന്ധനയുമില്ലാതെ അവരെ വിവാഹം കഴിക്കാന്‍ തയ്യാറായ പുരുഷന്മാരെ കുറിച്ച്‌ അവര്‍ക്ക്‌ പറയാന്‍ മധുരിക്കുന്ന ഒരു കഥയുമുണ്ടാകും.ബ്രോക്കര്‍ മാരില്ല എന്നതാണ്‌ ഇവര്‍ക്കിടയിലെ മറ്റൊരു കാര്യം.പെണ്ണിനെ തേടി ആണ്‌ വരികതന്നെ വേണം.തന്റെ വീട്ടില്‍ ഒരു പെണ്ണുണ്ട്‌ എന്ന്‌ വീട്ടുകാര്‍ മറ്റുള്ളവരെ അറിയിക്കുക എന്നത്‌ ഒരു കുറച്ചിലായും ഇവര്‍ കാണുന്നു.വീട്ടിലുള്ള ആണ്‍കുട്ടികള്‍ ഇരുപതു വയസ്സാകുമ്പോഴേക്കും പെണ്ണു തേടി ഇറങ്ങും. ഇരുപത്തഞ്ചു വയസ്സാകുമ്പോഴേക്കും അവരുടെ വിവാഹവും തരപ്പെടും.സമൂഹവിവാഹത്തിലും ഇവര്‍ക്ക്‌ കാര്യമായ യാതൊരു പങ്കും ഇല്ല.അത്‌ തികച്ചും ആലോചിക്കാനും ചിന്തിക്കാനും ആളുകളുള്ള മേല്‍ജാതിക്കാര്‍ക്കു മാത്രമുള്ളതാകുന്നു.കുടുംബ ജീവിതത്തെപ്പറ്റി ചോദിക്കാനും പറയാനും ആരുമില്ലാത്ത ഈ യുവതികള്‍ ഈ കുടുംബങ്ങളുടെയെല്ലാം സത്‌പേരും നിലനിര്‍ത്തി തങ്ങളുടെ യൗവ്വന ചിന്തകള്‍ സ്വന്തം മനസ്സില്‍ തന്നെ കുഴിച്ചുമൂടി കാലം കഴിക്കുന്നു.

കുണ്ടപേറണം......................

2010-02-25T09:46:00.000-08:00

കുണ്ടപേറണം......................
പുലര്‍ച്ചെ മൂന്നുമണിക്ക്‌ ഡ്യൂട്ടി കഴിഞ്ഞ ഉടനെ ഞാനെന്റെ ബൈക്കെടുത്ത്‌ വീട്ടിലേക്ക്‌ തിരിച്ചു.കിട്ടുന്ന എട്ടു മണിക്കൂര്‍ റെസ്റ്റില്‍ കുട്ടികളുടെ അടുത്തെത്താമല്ലോ എന്ന ചിന്തയാണ്‌ ഒന്നര മണിക്കൂര്‍ ബൈക്കോടിച്ച്‌ വീട്ടിലേക്കോടാന്‍ എന്നെ നിര്‍ബന്ധിച്ചത്‌.യാത്രക്കിടയിലാണ്‌ അതേ റൂട്ടില്‍ തന്നെ വീടുള്ള സഹപ്രവര്‍ത്തകയെ വിളിക്കാന്‍ മറന്നുപോയ കാര്യം ഓര്‍ക്കുന്നത്‌. പിറ്റേന്ന്‌ (അന്നു തന്നെ) അവരെ കണ്ടപ്പോള്‍ ............ പോകുമ്പോള്‍ വിളിക്കാന്‍ മറന്നുപോയി...എന്ന്‌ ഒരു കുറ്റബോധത്തോടെ ഞാന്‍ പറഞ്ഞപ്പോള്‍ അവരുടെ മറുപടി ഇപ്രകാരമായിരുന്നു.` സാറേ.................. ഞാനറഞ്ഞിരുന്നു സാറ്‌ പോകുന്നതൊക്കെ എന്തിനാപ്പം വീട്ടീ പോയിട്ട്‌ എന്തായാലും ഒറങ്ങാന്‍ പറ്റില്ല.പിന്നെ വെറുതെ പോയി കുണ്ട പേറാനോ.ഇവിടെത്തന്നെ ഇരുന്നതുകൊണ്ട്‌ മനസമാധാനത്തോടെ ഉറങ്ങി.ഭക്ഷണം കഴിച്ചു.കുളിച്ചു.അതുകൊണ്ടെന്താ നല്ല ഫ്രഷായി ഡ്യൂട്ടി ചെയ്യാം.സാറിനെന്ത്‌ റെസ്റ്റാ കിട്ടിയത്‌ ? സാറിന്‌ പിന്നൊന്നുമല്ലെങ്കിലും സ്വന്തം വീടാ....എനിക്കതുപോലല്ല തറവാടാ..ഇത്ര കഷ്ടപ്പെട്ട്‌ അവടെച്ചെന്ന്‌ നൂറ്‌ കുറ്റോം കേട്ട്‌ തിരിച്ചിങ്ങോട്ടോടണം.ആദ്യമൊക്കെ ഞാന്‍ ഇതുപോലെ ഡ്യൂട്ടി റെസ്റ്റില്‍ വീട്ടിലേക്കോടുമായിരുന്നു.ചെയ്‌ത ഡ്യൂട്ടിക്ക്‌ അനുവദിക്കുന്ന റെസ്‌റ്റ്‌ ചെയ്‌ത ഡ്യൂട്ടിയുടെ ക്ഷീണം തീര്‍ക്കാന്‍ തന്നെ ഉപയോഗിക്കണം സാറേ.......................` ഒരു തത്വചിന്തകയുടെ ഭാവത്തോടെ അത്രയും പറഞ്ഞ്‌ ലത്തിയുമെടുത്ത്‌ സാവധാനം ഡ്യൂട്ടിക്കായി അവള്‍ പുറത്തേക്കുപോയി.തിരക്കിട്ട്‌ യൂണിഫോം ധരിച്ച്‌ ഓടിക്കിതച്ച്‌ ഞാനും അവള്‍ക്കൊപ്പം കൃത്യ സമയത്തു തന്നെ ഡ്യൂട്ടിക്കെത്തി.

പ്രതികാരം

2010-02-17T09:54:00.000-08:00

പ്രതികാരം

തുടര്‍ച്ചയായി തന്റെ വീട്ടിലെ മഴവെള്ള സംഭരണി ആരോ തുറന്നു വിടുന്നു എന്ന പരാതിയുമായി ഇടക്കിടെ ഒരു വൃദ്ധന്‍ സ്റ്റേഷനില്‍ വരാറുണ്ടായിരുന്നു. അപ്രകാരം ചെയ്യുന്നത്‌ അടുത്ത വീട്ടിലുള്ള ഒരു സ്‌ത്രീയാണെന്നും താനതു കണ്ടു പിടിച്ചെന്നും സാറ്‌ അവരെ വിളിച്ചൊന്ന്‌ ചോദിക്കണമെന്നും അയാള്‍ സ്റ്റേഷനില്‍ വന്നു പറഞ്ഞപ്പോള്‍ .ഇരു കൂട്ടരേയും അന്നു നാലു മണിക്കു തന്നെ സ്‌റ്റേഷനിലെത്തിക്കാന്‍ ഒരു പോലീയുകാരനെ ചുമതലപ്പെടുത്തി.കൃത്യ സമയത്തു തന്നെ സ്റ്റേഷനിലെത്തിയ അവരോട്‌ എസ്‌.ഐ കാര്യം തിരക്കി, ജല സംഭരണി തുറന്നു വിട്ടത്‌ താന്‍ തന്നെ ആണെന്നവര്‍ സമ്മതിച്ചു. കാരണം ചോദിച്ചപ്പോള്‍ അവര്‍ പറഞ്ഞ മറുപടി ഇപ്രകാരമായിരുന്നു.`സാറേ എനിക്ക്‌ കെട്ട്യോനില്ല. ഞാന്‍ കൂലിപ്പണിക്ക്‌ പോയാണ്‌ കുട്ടികളെ പോറ്റുന്നത്‌.എനിക്ക്‌ കടയുടെ മുന്നിലൂടെ തന്നെ വേണം പണിക്കു പോകാന്‍. വൈകിട്ട്‌ സാധനങ്ങള്‍ വാങ്ങാനും കടയില്‍ വരണം.ഞാനെപ്പൊ അതിലൂടെ പോകുമ്പളും ഇയാള്‍ അനാവശ്യം പറയും കൊറേ പ്രാവശ്യം എന്നെ അനാവശ്യം പറയരുതെന്ന്‌ ഇയാളോട്‌ ഞാന്‍ പറഞ്ഞിട്ടുമുണ്ട്‌ .ഇയാള്‌ നിര്‍ത്തണ്ടേ.... സഹിക്കാന്‍ പറ്റാഞ്ഞിട്ടാ സാറേ... ഇനി എന്നെ അനാവശ്യം പറയരുതെന്ന്‌ സാറ്‌ ഇയാളോട്‌ പറയണം... പരാതി രമ്യമായി പരിഹരിച്ചു.എന്തായാലും പിന്നീടയാള്‍ പരാതിയുമായി സ്‌റ്റേഷനില്‍ വന്നിട്ടില്ല.

ആണുങ്ങളായാല്‍ പെണ്ണുങ്ങളെ തല്ലും.

2010-02-10T15:41:00.000-08:00

ആണുങ്ങളായാല്‍ പെണ്ണുങ്ങളെ തല്ലും.

അച്ഛനും ആങ്ങളയും അമ്മയെ അടിക്കും.അവനേയും അച്ഛനേയും വിളിച്ചൊന്നു ഞെട്ടിക്കണം എന്നആവശ്യവുമായിട്ടാണ്‌ ജയ സ്റ്റേഷനിലേക്കു വന്നത്‌.കാര്യങ്ങള്‍ ചോദിച്ചു മനസിലാക്കിയപ്പോള്‍ അപ്പനും മോനും പലപ്പോഴും ജയയുടെ അമ്മയെ അടിക്കാറുണ്ടെന്നു മനസ്സിലായി.വിവാഹം കഴിഞ്ഞ്‌ ഭര്‍ത്താവിന്റെ വീട്ടില്‍ താമസിക്കുന്ന ജയയോട്‌ നേരിട്ടും ഫോണിലും പലപ്പോഴും ആങ്ങള പറയുന്നത്‌

"അമ്മടെ കൈയ്യിലിരിപ്പ്‌ ശരിയല്ല ഇന്നും അപ്പനെടുത്തിട്ട്‌ നല്ലണം കൊടുത്തു.ഞാനും കൊടുത്തു രണ്ടെണ്ണം" എന്നാണെന്ന്‌ ജയ വിഷമത്തോടെ പറഞ്ഞപ്പോള്‍ ആങ്ങളയെ സ്‌റ്റേഷനിലേക്ക്‌ വിളിപ്പിച്ചു.എസ്‌.ഐ പുറത്തുപോയതായതുകൊണ്ട്‌ അയാളെ സ്‌റ്റേഷനില്‍ ഇരുത്തി.അല്‌പം കഴിഞ്ഞപ്പോള്‍ അയാളുടെ അച്ഛന്‍ സ്‌റ്റേഷനിലേക്ക്‌ കയറിവന്ന്‌ "എന്തിനാണ്‌ എന്റെ മോനെ സ്‌റ്റേഷനില്‍ പിടിച്ചു വെച്ചതെന്നു പറഞ്ഞ്‌ ബഹളം വെച്ചു.ഇതിനിടെ തന്നെ മുറ്റത്തുനിന്ന പോലീസുകാരുമായി അയാള്‍ സംസാരിക്കുന്നതും ഞാന്‍ ശ്രദ്ധിച്ചിരുന്നു.

".............അവനെന്ത്‌ തെറ്റ്‌ ചെയ്‌തിട്ടാ.... ....................."എന്നെല്ലാം പറഞ്ഞ്‌ പ്രകോപിതനായി സ്റ്റേഷനിലേക്ക്‌ കയറി വന്ന അയാളോട്‌ "പെണ്ണുങ്ങളെ അടിച്ചു നന്നാക്കാന്‍ നിങ്ങള്‍ക്കാരാ അധികാരം തന്നത്‌്‌ ?" എന്ന്‌ അല്‌പം പരുഷമായിത്തന്നെ ഞാന്‍ ചോദിച്ചപ്പോള്‍ അയാള്‍ ഒരു അധ്യാപകന്റെ ഭാവത്തോടെ എന്നെനോക്കി പറഞ്ഞു "ആണുങ്ങളായാല്‍ പെണ്ണുങ്ങളെ തല്ലും"

ഓതറൈസേഷന്‍ എന്ന കടലാസുപുലി

2010-02-07T09:16:00.000-08:00

ഓതറൈസേഷന്‍ എന്ന കടലാസുപുലി

ഡിപ്പാര്‍്‌ട്ടുമെന്റെ ജീപ്പ്‌ ഓടിക്കുക എന്ന മോഹം ഏറെക്കാലമായി പ്രകടിപ്പിക്കാന്‍ തുടങ്ങിയിട്ടെങ്കിലും പല പല കാരണങ്ങള്‍ കണ്ടെത്തി ഡിപ്പാര്‍ട്ട്‌മെന്റെിലെ ആണ്‍കോയ്‌മ അതു മുടക്കികൊണ്ടേയിരുന്നു.തിരുവനന്തപുരത്ത്‌ ജോലി നോക്കുമ്പോള്‍ അന്നും ഞാന്‍ എന്റെ മോഹം കമ്മീഷണര്‍ക്കെഴുതി.പെണ്ണുങ്ങള്‍ക്കൊന്നും വണ്ടി കൊടുക്കില്ലെന്ന വാക്കാലുള്ള ഉത്തരം പോരെന്നും അത്‌ രേഖാപരമായി വേണമെന്നും ഞാന്‍ ആവശ്യപ്പെട്ടപ്പോള്‍ എനിക്കു കിട്ടിയ മറുപടി ഇപ്രകാരമായിരുന്നു......... വനിതാ സ്റ്റേഷനില്‍ ഇപ്പോള്‍ ഒരു ഡ്രൈവര്‍ നിലവിലുള്ളതുകൊണ്ട്‌ ഡ്രൈവറെ ആവശ്യമില്ല......... ഈ മറുപടിയില്‍ യാതൊരു നിയമ നടപടികള്‍ക്കും സാധ്യതയില്ലാത്തതിനാല്‍ ഞാന്‍ എന്റെ മോഹം അവിടെ അവസാനിപ്പിച്ചു.1992-ല്‍ LMV ലൈസന്‍സുള്ള എനിക്ക്‌ ഒരിക്കല്‍ പോലും പോലീസ്‌ ജീപ്പ്‌ ഓടിക്കുന്നതിന്‌ അവസരം ലഭിച്ചിട്ടില്ല.എങ്കിലും കഴിഞ്ഞരണ്ടു മാസം മുമ്പുവരെ സ്റ്റേഷനില്‍ നിര്‍ത്തിയിട്ടിരുന്ന ജീപ്പ്‌ വല്ലപ്പോഴും തിരിച്ചു നിര്‍ത്തുകയും ,കഴുകുകയും ചെയ്യാറുണ്ടായിരുന്നു. വണ്ടിയുടെ കണ്ടീഷന്‍ നോക്കാനായി ഒന്നു രണ്ടു പ്രാവശ്യം സ്റ്റേഷനു പുറത്തേക്കും കൊണ്ടു പോയിട്ടുണ്ട്‌.ഡ്രൈവിംഗ്‌ അറിയുന്ന പോലീസുകാര്‍ പലരും പുറത്തേക്കെടുത്തപ്പോള്‍ ആരും ശ്രദ്ധിക്കുകകൂടി ചെയ്യാതിരുന്ന ഈ നിസ്സാര പ്രശ്‌നം എന്റെ സ്റ്റേഷനിലെ പലരുടേയും മനസമാധാനം തന്നെ കെടുത്തി.നിങ്ങള്‍ക്ക്‌ ലൈസന്‍സുണ്ടോ എന്നചോദ്യത്തിന്‌ ലൈസന്‍സുണ്ടെന്ന്‌ പറഞ്ഞപ്പോള്‍ ഡിപ്പാര്‍ട്ടുമെന്റെ്‌ വാഹനം ഓടിക്കുന്നതിനുള്ള ഓതറൈസേഷന്‍ ഉണ്ടോ എന്നതായി അടുത്ത ചോദ്യം. സ്വന്തമായി കാര്‍ ഡ്രൈവ്‌ ചെയ്‌ത്‌ സ്‌റ്റേഷനില്‍ വരുന്ന എനിക്ക്‌ ഓതറൈസേഷന്‍ എന്ന കടമ്പയിലൂടെയല്ലാതെ ഡിപ്പാര്‍ട്ടുമെന്റെ്‌ ജീപ്പ്‌ ഓടിക്കുക എന്ന മോഹം നടക്കില്ലെന്നു ബോധ്യമായപ്പോള്‍ ഞാന്‍ ഓതറൈസേഷനു വേണ്ടി അപേക്ഷിച്ചു.എന്നെ അത്ഭുതപ്പെടുത്തിക്കൊണ്ട്‌ 10 ദിവസത്തിനുള്ളില്‍ എനിക്ക്‌ ഓതറൈസേഷന്‍ ലഭിച്ചു.എനിക്ക്‌ അഭിമാനം തോന്നി.പക്ഷേ എനിക്ക്‌ ഓതറൈസേഷന്‍ കിട്ടിയ അന്നു മുതല്‍ എന്നെക്കൊണ്ട്‌ ആ വണ്ടിയുടെ സ്‌റ്റിയറിംഗ്‌ തൊടീക്കാതിരിക്കാന്‍ സബ്ബ്‌ ഇന്‍സ്‌പെക്ടര്‍ തന്നെ നിര്‍ദ്ദേശം കൊടുത്തതായി പോലീസുകാര്‍ പറഞ്ഞറിഞ്ഞും നേരിട്ടും എനിക്ക്‌ ബോധ്യമായി.സാധാരണ പുറത്തു പോയി വന്ന ജീപ്പ്‌ സ്റ്റേഷനു മുന്നില്‍ നിര്‍ത്തിയിട്ട്‌ ഡ്രൈവര്‍ ഇറങ്ങിപ്പോവുകയായിരുന്നു അതുവരെയുള്ള പതിവ്‌.മിക്കവാറും ഞാനായിരിക്കും അതു തിരിച്ചിടുക .എനിക്ക്‌ ഓതറൈസേഷന്‍ കിട്ടിയ അന്നു മുതല്‍ ജീപ്പോടിക്കുന്നവര്‍ തന്നെ കൃത്യമായി അത്‌ തിരിച്ചിടും.സബ്ബ്‌ ഇന്‍സ്‌പെക്ടറുടെ കാരുണ്യമില്ലാതെ ഡിപ്പാര്‍ട്ട്‌മെന്റെ ജീപ്പ്‌ ഓടിക്കാന്‍ കഴിയില്ലല്ലോ.ഓതറൈസേഷന്‍ എന്ന കടലാസു പുലി എന്റെ ഫയലില്‍ ഭദ്രം........

വിശ്വാസം

2010-02-04T07:55:00.000-08:00

വിശ്വാസം

2005 ഡിസംബര്‍ മാസം 25-ം തിയ്യതിയായിരുന്നു എന്റെ അച്ഛന്‍ മരിച്ചത്‌.പ്രമേഹസംബന്ധമായ അസുഖത്തെതുടര്‍ന്ന്‌ ഒന്നര വര്‍ഷത്തോളം അച്ഛന്‍ കിടപ്പിലായിരുന്നു.കിടപ്പിലായ കാലത്തെല്ലാം അച്ഛനെ ചികിത്സിച്ചതും പരിചരിച്ചതും ഞങ്ങള്‍ അഞ്ചു പെണ്‍മക്കള്‍ തന്നെയായിരുന്നു.കിടപ്പിലായകാലത്തോ ചികിത്സയിലിരുന്ന കാലത്തോ പറയത്തക്ക യാതൊരു വിധ സഹകരണവും അച്ഛന്റെ ബന്ധുക്കളുടെ ഭാഗത്തു നിന്നും ഉണ്ടായിരുന്നില്ല.മരിച്ചു കഴിഞ്ഞ്‌ ചടങ്ങുകള്‍ തുടങ്ങും മുമ്പ്‌ ഉമ്മറത്തുനിന്നും മുതിര്‍ന്ന ആണുങ്ങള്‍ എന്തോ പ്രധാനകാര്യം ചര്‍ച്ച ചെയ്യുന്നു. ഞാനടുത്തെത്തിയപ്പോള്‍ മുത്തച്ഛന്‍ എന്നോടു ചോദിച്ചു,

മോളേ ആരാ ചെത കത്തിക്കുന്നത്‌ ?

"വാസന്തിയേടുത്തി." ഞാനുത്തരം പറഞ്ഞു. (ഞങ്ങള്‍ അഞ്ചു പെണ്‍മക്കളില്‍ മൂത്തത്‌ വാസന്തിയേടുത്തിയാണ്‌)

"എന്തിനാ.... നിങ്ങള്‍ക്കെല്ലാവര്‍ക്കും ആണ്‍കുട്ടികളുണ്ടല്ലോ ? പിന്നെന്താ....?മുത്തച്ഛന്‍ തെല്ലതിശയത്തോടെ ചോദിച്ചു.

"പെണ്‍കുട്ടികള്‌ കത്തിച്ചാ എന്താ ചിത കത്തില്ലേ മുത്തച്ഛാ............... ? "ഞാനേറെ വിഷമത്തോടെ ചോദിച്ചു.

"അതല്ല മോളേ...അതിനുള്ള മനക്കരുത്ത്‌ ഓക്ക്‌ (വാസന്തിയേടുത്തിയെ ഉദ്ദേശിച്ചുകൊണ്ട്‌) ഇണ്ടാവ്വോ ?" മുത്തച്ഛന്‍ സംശയം പ്രകടിപ്പിച്ചു.ഞാന്‍ വാസന്തിയേടുത്തിയെ വിളിച്ച്‌ വിവരം അറിയിച്ചു.വാസന്തിയേടുത്തി ഉടനെ തന്നെ പൊട്ടിക്കരഞ്ഞെങ്കിലും സമ്മതിച്ചു.അച്ഛനെ കുളിപ്പിക്കുന്നതു സംബന്ധിച്ചും ചര്‍ച്ചകള്‍ നടന്നു.

"ഇത്രയും കാലം അച്ഛനെ കുളിപ്പിച്ചത്‌ ഞാനല്ലേ. അച്ഛനെ അവസാനമായി ഞാന്‍ തന്നെ കുളിപ്പിക്കും" എന്ന്‌ വനജേടുത്തി വികാരാധീനയായി പറഞ്ഞു.അച്ഛന്റെ ശരീരം കുളിപ്പിക്കലും ചിത കത്തിക്കലും എല്ലാം ഞങ്ങള്‍ മക്കള്‍ തന്നെ നടത്തി.തക്ക സമയത്ത്‌ ചടങ്ങുകള്‍ക്കായി തയ്യാറെടുത്തു വന്ന അച്ഛന്റെ ബന്ധുക്കളായ പുരുഷ പ്രജകള്‍ അവസരം കിട്ടാതെ നിരാശരായി.തികച്ചും അര്‍ഹതപ്പെട്ടതു തന്നെയാണവര്‍ ചെയ്‌തത്‌ എന്നും, ആത്മാവിന്‌ ശാന്തി കിട്ടാതാക്കി എന്നുമുള്ള അഭിപ്രായങ്ങള്‍ വ്യാപകമായി പ്രചരിച്ചുഎങ്കിലും അച്ഛന്റെ ജേഷ്ടന്റെ മകനായ പ്രസാദിന്റെ വാക്കുകള്‍ കേട്ടപ്പോള്‍ അച്ഛന്റെ ആത്മാവിന്‌ നിത്യശാന്തി തന്നെ ലഭിക്കും എന്നു ഞാനുറപ്പിച്ചു.

" അവര്‌ ചെയ്‌തതില്‍ ഒരു തെറ്റുമില്ല. എനിക്കും രണ്ട്‌ പെണ്‍കുട്ടികളാണ്‌.ഞാന്‍ മരിച്ചാല്‍ എന്റെ ചിത എന്റെ മക്കള്‌ തന്നെ കത്തിക്കണം അതുംവെച്ചാരും വെലപേശരുത്‌ എന്നതാണെന്റെ ആഗ്രഹം." പ്രസാദിനെപ്പോലെ പെണ്‍മക്കള്‍ മാത്രമുള്ളഅച്ഛനമ്മമാരുടെ അനുഗ്രഹം എന്നും എനിക്കും എന്റെ കുടുംബത്തിനുമുണ്ടാകും എന്നു ഞാന്‍ വിശ്വസിക്കുന്നു.

തിരിച്ചടി

2010-02-02T09:44:00.000-08:00

തിരിച്ചടി
പോലീസ്‌ സ്‌റ്റേഷനില്‍ വെച്ച്‌ ഞാനുമായി നടന്ന ഒരു തര്‍ക്കത്തില്‍ സഹപ്രവര്‍ത്തകനായ റെജി എന്ന പോലീസുകാരന്‍ തര്‍ക്കം ഇങ്ങനെ അവസാനിപ്പിച്ചു
"നീയൊന്നും ആണിനെ കണ്ടിട്ടില്ല, ആണെന്താണെന്നറിഞ്ഞിരുന്നെങ്കില്‍ നീ ഇങ്ങനെയൊന്നുമാകില്ല"
ഇങ്ങനെ പറഞ്ഞയാള്‍ പുച്ഛഭാവത്തില്‍ മുന്നോട്ടു നടക്കാന്‍ തുടങ്ങവേ ഞാന്‍ പറഞ്ഞു
"റെജീ............. ഒരു മിനിട്ട്‌.. തന്റെ ഭാര്യയെ ഇന്നൊന്ന്‌ എന്റെ വീട്ടിലേക്കയക്കാമോ ? മറ്റൊന്നിനുമല്ല എന്റെ ഭര്‍ത്താവ്‌ ആണാണെന്ന്‌ നിന്നെയൊന്ന്‌ മനസ്സിലാക്കിക്കാനാ.........." ഞാന്‍ തിരിച്ചടിച്ചു.

സര്‍വ്വേ

2010-01-22T17:26:00.001-08:00

സര്‍വ്വേ

ഒരു കുടുംബശ്രീ സംഘടിപ്പിച്ച ക്ലാസ്സില്‍ സംസാരിക്കുകയായിരുന്നു ഞാന്‍.ക്ലാസ്സിനിടയില്‍ ക്ലാസ്സിലെ അംഗങ്ങളെ ഞാന്‍ രണ്ടായി ഭാഗിച്ചു.രണ്ടു കുട്ടികളുള്ളവരും രണ്ടാമത്തെ കുട്ടിയെ സ്‌ക്കൂളിലയക്കുകയും ചെയ്യുന്ന അമ്മമാര്‍ മാറിയിരിക്കുക.അങ്ങനെ മാറിയിരുന്നതില്‍ 13 സ്‌ത്രീകളുണ്ടായിരുന്നു.അവര്‍ക്ക്‌ ഞാന്‍ ഒരു കഷണം പേപ്പര്‍ കൊടുത്തു. എന്നിട്ട്‌ ഇങ്ങനെ പറഞ്ഞു."ഞാന്‍ നിങ്ങളോട്‌ ഒരു ചോദ്യം ചോദിക്കുകയാണ്‌.അതിന്റെ ഉത്തരം ശരിയെന്നോ ( ) തെറ്റെന്നോ (x) മാത്രം അടയാളപ്പെടുത്തുക.മറ്റൊരടയാളവും അതിലുണ്ടാകാന്‍ പാടില്ല.നിങ്ങള്‍ ഉത്തരമെഴുതിയ പേപ്പര്‍ ഒരിക്കലും ഇവിടെവെച്ച്‌ ഞാന്‍ തുറക്കില്ല.ആരേയും ഫോണില്‍ അറിയിക്കുകയുമില്ല.ചോദ്യമിതാണ്‌.ി്‌നിങ്ങള്‍ക്ക്‌ ഇനിയൊരു ജന്മമുണ്ടെങ്കില്‍ ഇപ്പോഴത്തെ ആളുതന്നെ ആയിരിക്കണം നിങ്ങളുടെ ഭര്‍ത്താവ്‌ എന്ന്‌ ആഗ്രഹിക്കുന്നവര്‍ ശരി എന്നും അല്ലാത്തവര്‍ X എന്നും അടയാളപ്പെടുത്തുക .അടയാളം രേഖപ്പെടുത്തിയ പേപ്പര്‍ നാലായി മടക്കി ഈ ബോക്‌സില്‍ ഇടണം (എന്റെ കൈയ്യിലെ ബോക്‌സു കാണിച്ചുകൊണ്ട്‌ ഞാന്‍ പറഞ്ഞു.)ഞാന്‍ വിതരണം ചെയ്‌ത പേപ്പര്‍ നിമിഷങ്ങള്‍ക്കുള്ളില്‍ നാലായി മടക്കി അവര്‍ ബോക്‌സില്‍ നിക്ഷേപിച്ചു.വീട്ടിലെത്തിയ ഞാന്‍ ഓരോ പേപ്പറും പരിശോധിച്ചു. 13 പേപ്പറിലേയും മാര്‍ക്ക്‌ X എന്നു തന്നെയായിരുന്നു.

വേണ്ടിടത്ത്‌ വിളങ്ങണം.......................(2)

2010-01-22T17:26:00.000-08:00

വേണ്ടിടത്ത്‌ വിളങ്ങണം.......................(2)

ഒരിക്കല്‍ ഞാന്‍ ബത്തേരി മാര്‍ജിന്‍ ഫ്രീ മാര്‍ക്കറ്റില്‍ പോയി കവറില്‍ വെച്ച അരക്കിലോ വെല്ലത്തിന്‌ അടുത്തുനിന്ന സെയില്‍സ്‌ ഗേളിനോട്‌ വില ചോദിച്ചു.ഉടനെ തന്നെ ആ പെണ്‍കുട്ടി ആ കവര്‍ കൈയ്യിലെടുത്ത്‌ ഉറക്കെ വിളിച്ചു

"സദൂ ഇതിനെത്രയാ വില...? "അതു കാണേണ്ട താമസം ആ സെയില്‍സ്‌ ബോയ്‌ അതിന്റെ വില പറഞ്ഞു.

"താനെത്ര കാലമായി ഇവിടെ " ഞാന്‍ ആ പെണ്‍കുട്ടിയോടായി ചോദിച്ചു.

"രണ്ടു വര്‍ഷം" അവള്‍ ഉത്തരം പറഞ്ഞു

"ആ കുട്ടിയോ ? " ഞാന്‍ ആ പയ്യനെ ഉദ്ദേശിച്ചുകൊണ്ട്‌ ചോദിച്ചു.

"അവനും അതേ...." അവള്‍ നിസ്സാാര ഭാവത്തില്‍ പറഞ്ഞു.

"പിന്നെന്തിനാ താന്‍ അയാളോട്‌ വില ചോദിക്കുന്നത്‌? ഒഴിവുള്ളപ്പോള്‍ ഇതൊക്കെ ചോദിച്ച്‌ പഠിച്ചൂടെ ? നാണക്കേടാണ്‌ മറ്റുള്ളോരുടെ മുമ്പിന്ന്‌ ഇങ്ങനെ ചോദിക്കാന്‍ ഒരു മടിയുമില്ലല്ലോ. സമ്മതിക്കണം " ഇത്രയും ആ കുട്ടിയോടു മാത്രമായ്‌ പറഞ്ഞ്‌ ഞാന്‍ സാധനവും വാങ്ങി ഇറങ്ങി.പിന്നീടൊരിക്കല്‍ ഞാനവിടെപ്പോയി കവറില്‍ വെച്ച അരക്കിലോ ചെറുപയറിനു വില ചോദിച്ചു. ഉടനെ ആ കുട്ടി അതിന്റെ വില പറയുകയും ചിരിച്ചുകൊണ്ട്‌ എന്നെ നോക്കി " സാറേ ഇപ്പം ഞാന്‍ ശ്രദ്ധിക്കാറുണ്ട്‌ എന്നു പറയുകയും ചെയ്‌തു . അപ്പോഴാണ്‌ ഞാനവളുടെ മുഖം ശ്രദ്ധിച്ചത്‌.

വേണ്ടിടത്തു വിളങ്ങണം.................(1)

2010-01-20T02:34:00.000-08:00

വേണ്ടിടത്തു വിളങ്ങണം.................(1)

ഏറെ പാടുപെട്ടാണ്‌ ഡ്യൂട്ടിക്കിടയില്‍ രണ്ടു മണിക്കൂര്‍ പെര്‍മിഷന്‍ ഒപ്പിച്ചെടുത്തത്‌. എങ്ങനെയെങ്കിലും കംപ്യൂട്ടര്‍ പഠിക്കണം, ലക്ഷ്യം നിറവേറ്റാനായി ഞാന്‍ കല്‍പറ്റയിലുള്ള ഒരു കംപ്യൂട്ടര്‍ സെന്റെറില്‍ എത്തി.അവിടെ രണ്ടു പെണ്‍കുട്ടികളാണ്‌ സ്റ്റാഫായി ഉണ്ടായിരുന്നത്‌. ഞാന്‍ ക്ലാസിന്റെ സമയത്തെപ്പറ്റി പറഞ്ഞപ്പോള്‍ അവര്‍ പരസ്‌പരം നോക്കി പിന്നീട്‌ അവരിലൊരാള്‍ എന്നോടായി ചോദിച്ചു

"മാഡം..... 4 to 5 1/2 എന്നത്‌ 3 to 4 1/2 ആക്കാമോ ....................."

''അയ്യോ അതു പറ്റില്ല. ആ സമയത്തേ എനിക്ക്‌ പറ്റുള്ളൂ " ഞാനെന്റെ കാര്യം പറഞ്ഞു

''ആ സമയം ഞങ്ങള്‍ക്കും പ്രയാസമാണ്‌ " അല്‌പം നീരസത്തോടവരിലൊരാള്‍ പറഞ്ഞു.

"എന്താണ്‌ പ്രയാസം കംപ്യൂട്ടര്‍ ഒഴിവില്ലേ ? " ഞാന്‍ തിരിച്ചു ചോദിച്ചു

"ഏയ്‌ അതല്ല ഞങ്ങളുടെ ബസ്‌ പോകും. 5 മണിക്കാണ്‌ ആ ബസ്‌.അതു കഴിഞ്ഞാല്‍ ഞങ്ങള്‍ക്കാ റൂട്ടില്‍ ബസില്ല."

" ഞാനിപ്പോഴെന്താ വേണ്ടത്‌....... ?" അവരുടെ മുഖത്തു പ്രകടമായ വല്ലായ്‌മക്കറുതി വരുത്തുവാനെന്ന വണ്ണം ഞാ്‌ന്‍ ചോദിച്ചു.

" ഒന്നുകില്‍ മാഡം 3 to 4 1/2 വരെ എടുക്കണം അല്ലെങ്കില്‍ 4 to 5 മണിക്കുളളില്‍ വരെ എടുക്കണം അപ്പപ്പിന്നെ ഒരു മണിക്കൂര്‍ മാത്രമേകിട്ടൂ അതിനപ്പുറത്തേക്ക്‌ ഞങ്ങള്‍ക്ക്‌ ബുദ്ധിമുട്ടാണ്‌."

അവര്‍ കാര്യങ്ങള്‍ വ്യക്തമാക്കി.

"ശരി ,നിങ്ങളുടെ ബുദ്ധിമുട്ടൊഴിവാക്കാന്‍ എനിക്ക്‌ രണ്ടു മാര്‍ഗ്ഗങ്ങളുണ്ട്‌.ഒന്നുകില്‍ ഞാനെന്റെ ജോലി രാജിവെച്ച്‌ നിങ്ങളുടെ സമയത്തെത്തണം അല്ലെങ്കില്‍ ഈ institute മാറണം.ഏതായാലും ഒന്നാമത്തെ മാര്‍ഗ്ഗം സ്വീകരിക്കാനുദ്ദേശിക്കുന്നില്ല. ഞാന്‍ അടുത്ത institute ലക്ഷ്യമാക്കി നടന്നു.

അറിയിപ്പ്‌

2010-01-17T09:05:00.000-08:00

അറിയിപ്പ്‌

പ്രിയ സുഹൃത്തുക്കളേ..................നാളെ തിങ്കളാഴ്‌ച (18-01-10 ) രാത്രി 8.30 ന്‌ മലയാളം ചാനലില്‍ -നിങ്ങളില്‍ ഒരാള്‍ - എന്ന പരിപാടിയില്‍ എന്നെ പരിചയപ്പെടുത്തുന്നുണ്ട്‌. കാണണേ.അഭിപ്രായങ്ങളും നിര്‍ദ്ദേശങ്ങളും പ്രതീക്ഷിക്കുന്നു.

ഇങ്ങിനേയും ആകാം

2010-01-14T04:33:00.000-08:00

ഇങ്ങിനേയും ആകാം

കോടതി ഡ്യൂട്ടിക്കായി കോടതിയിലെത്തിയപ്പോള്‍ സമയം 10.55 പതിനൊന്നു മണിക്ക്‌ കോടതി തുടങ്ങും.യൂണിഫോം മാറ്റാനായി സാധാരണ കയറാറുള്ള മുറിയിലേക്ക്‌ പാഞ്ഞു കയറി. അവിടെയതാ എന്നെപ്പോലെ തന്നെ വൈകിവന്ന രണ്ടു പോലീസുകാര്‍ ധൃതിപ്പെട്ട്‌ വസ്‌ത്രം മാറാന്‍ തുടങ്ങുന്നു.മാറി നില്‍ക്കുമോ എന്നു ചോദിക്കാന്‍ യാതൊരു ന്യായവുമില്ല.ആലോചിക്കാന്‍ സമയവുമില്ല.ആപോലീസുകാര്‍ വസ്‌ത്രം മാറുന്ന അതേ മുറിയില്‍ നിന്നു തന്നെ അവരോടൊപ്പം ഞാനും യൂണിഫോം ധരിച്ച്‌ പുറത്തേക്കിറങ്ങി ഇറങ്ങുന്നതിനിടയില്‍ ഒരു പോലീസുകാരന്‍ ചോദിച്ചു " ഇത്ര അടുത്തായിട്ടും സാറെന്താ വൈകിയത്‌ " ഉത്തരം ഒരു ചിരിയിലൊതുക്കി ഞാന്‍ കൃത്യ സമയത്തു തന്നെ കോടതിയിലെത്തി.

ആരുടെ പിടിപ്പുകേട്‌...?

2010-01-03T19:54:00.000-08:00

ആരുടെ പിടിപ്പുകേട്‌...?

ജില്ലാ സ്‌ക്കൂള്‍ കലോത്സവത്തോടനുബന്ധിച്ച ഘഷയാത്ര .ഏറ്റവും പിന്നിലായി 30 -ഓളം ആണ്‍കുട്ടികളുടെ സൈക്കിള്‍റാലി.ഘോഷയാത്രയുടെ അവസാനഭാഗമായ സൈക്കിള്‍ റാലി എന്റെ ഡ്യൂട്ടി പോയന്റെിലെത്തിയപ്പോള്‍ റാലിക്കു നിര്‍ദ്ദേശം കൊടുക്കുന്ന ടീച്ചറോടായി ഞാന്‍ ചോദിച്ചു."എന്താ............. ടീച്ചറേ സൈക്കിള്‍ റാലിക്ക്‌ ഒരു പെണ്‍കുട്ടിയെപ്പോലും കിട്ടിയില്ലേ....?"എന്തു ചെയ്യാനാ വിനയേ.... പെണ്‍പിള്ളേരുടെ പിടിപ്പുകേട്‌.ഇക്കൊല്ലം NCC യിലുള്ള 30 പെണ്‍കുട്ടികള്‍ക്ക്‌ സ്‌ക്കൂളില്‍ നിന്നും സൈക്കിള്‍ കൊടുത്തതാ..... "ടീച്ചര്‍ വലിയ കാര്യം പോലെ പറഞ്ഞു" എന്നിട്ട്‌ ? ....ഞാന്‍ ആകാംക്ഷയാലെ ടീച്ചറെ നോക്കി." ഒരെണ്ണെങ്കിലും അതും ചവിട്ടി വരുന്നത്‌ ഞാന്‍ കണ്ടിട്ടില്ല.ഒക്കെ ഏട്ടന്‍മാര്‍ക്കും അനിയന്‍മാര്‍ക്കും കൊടുത്തിട്ടുണ്ടാകും." അത്രയും ധൃതിയില്‍ പറഞ്ഞ്‌ ടീച്ചര്‍ റാലിക്കൊപ്പം നടന്നു നീങ്ങി.ഇവിടെ ടീച്ചര്‍ പറഞ്ഞ പിടിപ്പുകേട്‌ ആര്‍ക്കാണ്‌ ?. ഒരു ആനുകൂല്ല്യം കൊടുക്കുമ്പോള്‍ - ആര്‍ക്ക്‌ ആ ആനുകൂല്യം നല്‌കിയോ അത്‌ കൃത്യമായി അവര്‍ ഉപയോഗിക്കുന്നുണ്ടോ എന്ന്‌ ഉറപ്പുവരുത്തേണ്ടത്‌ ആനുകൂല്യങ്ങള്‍ അനുവദിക്കുന്ന കേന്ദ്രങ്ങള്‍ തന്നെയല്ലേ...?ശരിയാം വിധം പരിശോധിക്കാനാകുന്നില്ലെങ്കില്‍ ഇത്തരം ആനുകൂല്യങ്ങള്‍ക്കൊണ്ടെന്തു പ്രയോജനം?

വീട്‌

2009-12-27T08:07:00.000-08:00

വീട്‌

മറ്റെങ്ങും പോകാനില്ലാത്തപ്പോള്‍പോ

കാനുള്ള ഇടമാണ്‌ എനിക്കു വീട്‌

നീ തൂങ്ങെടാ..................................

2009-12-25T07:43:00.001-08:00

നീ തൂങ്ങെടാ..................................
ഒരിക്കല്‍ ഞാന്‍ അമ്പലവയല്‍ പോലീസ്‌ സ്‌റ്റേഷനിലേക്ക്‌ പോകാനായി കൊളഗപ്പാറ ബസ്റ്റോപ്പില്‍ നില്‌ക്കുകയായിക്കുന്നു.സമയം വൈകിയതുകൊണ്ട്‌ ആകെ വെപ്രാളപ്പെട്ടാണ്‌ ഞാനവിടെ നിന്നിരുന്നത്‌.പെട്ടന്നു വന്നു നിര്‍ത്തിയ ജീപ്പില്‍ ഓടിക്കയറിയതുകൊണ്ട്‌ കഷ്ടിച്ച്‌ ഇരിക്കാന്‍ ഒരു സീറ്റുകിട്ടി.ബാക്കിവന്ന മൂന്നു പുരുഷന്മാര്‍ പുറകില്‍ തൂങ്ങി. ഏറെ ഞെരുങ്ങിയാണേലും ഇരിക്കാനൊത്തല്ലോ എന്നാശ്വാസത്തിലായിരുന്നു ഞാന്‍.ജീപ്പ്‌ മുന്നോട്ടു നീങ്ങി തൊട്ടടുത്ത സ്‌റ്റോപ്പില്‍ നിന്നും കാഴ്‌ചയില്‍ അമ്മയും മകളും എന്നു തോന്നിക്കുന്ന ഒരു സ്‌ത്രീയും പന്ത്രണ്ടോളം വയസ്സു തോന്നിക്കുന്ന ഒരു പെണ്‍കുട്ടിയും ജീപ്പിനു കൈ നീട്ടി. ഇവരെവിടിരിക്കാനാ............. ഞാന്‍ മനസിലോര്‍ത്തു. അപ്പോഴേക്കും ജീപ്പു നിന്നു.ഡ്രൈവര്‍ തിരിഞ്ഞ്‌ എന്നെ നോക്കിക്കൊണ്ടും കിളി എന്റെ തോളില്‍ പിടിച്ചുകൊണ്ടും കോറസുപോലെ പറഞ്ഞു "നീ തൂങ്ങെടാ............ " ആലോചിക്കാനോ തര്‍ക്കിക്കാനോ എനിക്കു സമയം കിട്ടിയില്ല.യാന്ത്രികമായ അത്ഭുതത്തോടും കൗതുകത്തോടും ഞാന്‍ പെട്ടെന്നെഴുന്നറ്റ്‌ പുറത്തിറങ്ങി ആ സ്‌ത്രീയും പെണ്‍കുട്ടിയും എന്റെ സീറ്റിലിരുന്നു.ഡോറടച്ചു .ഞാന്‍ കൗതുകത്തോടെ കമ്പിയില്‍ അള്ളിപ്പിടിച്ചു. തെല്ലൊരു ഭയം തുടക്കത്തില്‍ അനുഭവപ്പെട്ടങ്കിലും പിന്നീട്‌ ഞാനതു മായി പൊരുത്തപ്പെട്ടു. അമ്പലവയല്‍ വരെ (ഏകദേശം നാലു കിലോമീറ്റര്‍) ഞാന്‍ ആ യാത്ര ആസ്വദിച്ചു.അത്തരത്തിലുള്ള യാത്രകള്‍ ഇന്നെനിക്ക്‌ യാതൊരപരിചിത്തവും തോന്നിക്കാത്തതായി തീര്‍ന്നിരിക്കുന്നു.

നമ്മുക്കു ചെറുക്കണ്ടേ............... ?

2009-12-16T21:12:00.001-08:00

നമ്മുക്കു ചെറുക്കണ്ടേ............... ?

ഇന്നലെ വൈകുന്നേരം ഞാന്‍ എന്റെ സുഹൃത്തിന്റെ ഓഫീസില്‍ ഇരിക്കുകയായിരുന്നു. (ഇരുനിലകെട്ടിടത്തിന്റെ രണ്ടാം നിലയില്‍) ഓഫീസിനു മുന്നിലൂടെ പോകുന്ന NH 212 ലൂടെ ഒരു പറ്റം പുരുഷന്മാരായ ചെറുപ്പക്കാര്‍ ആകാശത്തേക്ക്‌ കൈമുഷ്ടി ചുരുട്ടിക്കൊണ്ട്‌ നെഞ്ചു വിരിച്ച്‌ ഞങ്ങളിലൊന്നിനെ തൊട്ടെന്നാല്‍ കുത്തിക്കീറും കട്ടായം...... , ...... ചെറ്റേ , തെണ്ടീ.....,.................. കൈയ്യും കാലും തല്ലിയൊടിക്കും, അമ്മേക്കണ്ടു മരിക്കില്ല.... ..... തുടങ്ങിയ തെറി വാക്കുകളും പോര്‍ വിളികളുമായി നടന്നു നീങ്ങുന്നത്‌ എന്നെ വല്ലാതെ അസ്വസ്ഥയാക്കി.വളരെ പരിചിതമായ സംഭവമായിട്ടും പ്രത്യേകിച്ച്‌ തിരക്കൊന്നുമില്ലാത്ത മാനസീകാവസ്ഥയിലായതുകൊണ്ട്‌ ആചെറുപ്പക്കാര്‍ പിന്നിടുന്ന റോഡിനിരുവശം ഫുട്‌പാത്തിലും കടകളിലുമൊക്കെയായി കണ്ട ആളുകളുടെ മുഖഭാവം ഞാനൊന്ന്‌ ശ്രദ്ധിച്ചുപോയി.വെട്ടുപോത്തിനു മുന്നിലകപ്പെട്ടുപോയ നിസ്സഹായാവസ്ഥയായിരുന്നു പ്രായഭേദമന്യേ എല്ലാവരിലും.ഒരു നിമിഷമായാലും ഓരോരുത്തരിലും മരണഭയം ജനിപ്പിച്ചുകൊണ്ടുള്ള ഈ പോര്‍വിളി നിരോധിക്കേണ്ടതു തന്നെയല്ലേ................... ?പ്രതിഷേധിക്കുവാനും, സമരം ചെയ്യുവാനുമുള്ള അവകാശം ഇതിലൊന്നുംപെടാത്ത നിരപരാധികളെ പേടിപ്പിക്കുവാനും സ്ഥലകാലഭേദമന്യേ ആഭാസങ്ങള്‍ പുലമ്പാനുമായി ഉപയോഗിക്കുന്നതെങ്കിലും നമ്മുക്കു ചെറുക്കണ്ടേ......................?

മറുപടി

2009-12-16T21:12:00.000-08:00

മറുപടി

ഈയിടെ ദൂരദര്‍ശനില്‍ വന്ന കൂട്ടുകാരി എന്ന തത്സമയ പരിപാടിയിക്കിടെ ഞാന്‍ നല്‌കിയ മറുപടിയില്‍ ക്ഷുഭിതനായി ഒരു പുരുഷന്‍ എന്നെ വല്ലാതെ അധിക്ഷേപിച്ചു.അയാശുടെ ക്ഷോഭത്തിനാധാരമായ വിഷയം ഞാന്‍ വിശദീകരിക്കാം. എന്റെ മകള്‍ക്ക്‌ 12 വയസ്സുള്ളപ്പോള്‍ അവള്‍ എന്നോടൊരു സംഭവം വിവരിച്ചു.അവളുടെ ഒരു കൂട്ടുകാരി പറഞ്ഞ കഥയാണ്‌.കഥയും അവളുടെ ആശങ്കയും എന്റെ മറുപടിയും ഞാനിനിടെ വിവരിക്കാം. എന്റെ സ്ഥാനത്ത്‌ നിങ്ങളായിരുന്നെങ്കില്‍ എന്തു മറുപടി കൊടുക്കും എന്നതു കൂടി എഴുതണേ.....

"അമ്മേ എന്റെ കൂട്ടുകാരി പറയാ അവളുടെ അമ്മയുടെ നാട്ടില്‌ ഞങ്ങടെ അത്ര പ്രായമുള്ള ഒരു കുട്ടിയെ ഒരു മാമന്‍ കത്തികൊണ്ട്‌ കുത്തി കൊന്നൂത്രെ.ഒരീസം സന്ധ്യക്ക്‌ ആളൊഴിഞ്ഞ ഒരു വഴിയിലൂടെ അവള്‍ വീട്ടിലേക്ക്‌ നടക്കുമ്പോള്‍ ഒരു തോട്ടത്തിനു നടുവിന്‍ വെച്ച്‌ കൈയ്യില്‍ കത്തിയുമായി ഒരു മാമന്‍ തടഞ്ഞുനിര്‍ത്തി അയാള്‍ അവളോട്‌ അയാള്‍ പറയുന്നതുപോലെ ചെയ്യാന്‍ പറഞ്ഞു .അതുകേള്‍ക്കാത്ത അവളെ അയാള്‍ കുത്തി കൊന്നു പോലും." "അമ്മേ ഞാനങ്ങനെ ഒറ്റപ്പെട്ടു പോയാല്‍ ഇങ്ങനെ കത്തീം കാട്ടി ഒരാള്‍ നിന്നാല്‍ ഞാനെന്താ ചെയ്യേണ്ടത്‌?

ഉത്തരം :- മോളേ ഈ ലോകത്ത്‌ ഏറ്റവും പ്രധാനപ്പെട്ടത്‌ നമ്മുടെ ജീവന്‍ തന്നെയാണ്‌.അങ്ങനത്തെ ഒരവസരം വന്നാല്‍ രക്ഷപ്പെടാന്‍ ഒരു വഴിയുമില്ലെന്ന്‌ ബോധ്യമായാല്‍ അയാള്‍ എന്തു പറയുന്നവോ അതുപോലങ്ങ്‌ അനുസരിക്കണം എന്നിട്ട്‌ വീട്ടില്‍ വന്ന അമ്മയോട്‌ പറയണം.ഒരിക്കലും അമ്മ മോളെ കുറ്റപ്പെടുത്തില്ല.പക്ഷേ നിര്‍ബന്ധമായും പറഞ്ഞിരിക്കണം.

"അല്ലമ്മേ അങ്ങനൊക്കായാല്‌ പെണ്ണുങ്ങക്കല്ലേ ഗര്‍ഭണ്ടാവ്വാ. അങ്ങനെ ഗര്‍ഭായാലോ....?"ഉത്തരം :- ആ അയ്‌ക്കോട്ടെ. മെഡിക്കല്‍ഷോപ്പില്‍ ഗുളിക കിട്ടും.അത്‌ കഴിച്ചാല്‍ അതൊക്കെയങ്ങ്‌ പോകും. ടെറ്റോളിട്ട്‌ അമ്മ നന്നായി മോളെയങ്ങ്‌ കുളിപ്പിക്കും.ഇതൊന്നും അത്ര പ്രധാനപ്പെട്ട കാര്യമൊന്നുമല്ലമോളേ ഈ മറുപടി ഒത്തിരിപ്പേരെ അസ്വസ്ഥരാക്കി. പക്ഷേ എന്റെ മറുചോദ്യത്തിന്‌ സംതൃപ്‌തമായ ഒരു മറു പടി തരാന്‍ അവര്‍ക്കായില്ല. ആ മറുപടി നിങ്ങളില്‍നിന്നും പ്രതീക്ഷിക്കുന്നു.

തിണ്ണമിടുക്ക്‌

2009-11-05T06:42:00.000-08:00

തിണ്ണമിടുക്ക്‌

ഒരിക്കല്‍ വനിതാസെല്ലില്‍ ഒരു കുടുംബ വഴക്കിന്റെ ഒത്തുതീര്‍പ്പു നടക്കുകയായിരുന്നു.ഭാര്യയും ഭര്‍ത്താവും വേറെ വീടുവെച്ചുമാറിതാമസിക്കട്ടെ എന്ന സി.ഐ സാറിന്റെ നിബന്ധന ഇരു വീട്ടുകാരും അംഗീകരിച്ചു.ഉടനെ ഭര്‍ത്താവിന്റെ അച്ഛന്‍ അടുത്ത പ്രശ്‌നത്തിനു തിരികൊളുത്തി. "സാറേ അവന്‌ അവന്റെ പേരില്‍ തന്നെ ഞാന്‍ കൊടുത്ത വീടിനോട്‌ ചേര്‍ന്ന പത്ത്‌ സെന്റെ്‌ പറമ്പുണ്ട്‌ അവന്‌ അവടത്തന്നെ പെര വെക്കാലോ" അയാള്‍ അതു പറഞ്ഞ്‌ മുഴുമിച്ചില്ല അവള്‍ ഇടക്കു കയറി പറഞ്ഞു "വേണ്ട സാറെ അതു വേണ്ട....അതെന്തായാലും ശരിയാകില്ല.എന്റെ ഷെയറില്‍ പെരവെക്കണം അല്ലെങ്കില്‍ പെരക്കുള്ള സ്ഥലം വേറെ വാങ്ങണം.എന്തായാലും ഇവരെ നാട്ടിലേക്ക്‌ ഞാനില്ല സാറേ............ ""അതെന്താ........................ "സി.ഐ സാര്‍ അവരോടായി ചോദിച്ചു." ഇവരീകാണുംപോലൊന്നുമല്ല സാറേ.അവടെത്തിയാല്‍ ഇവരൊക്കെ മാറും സാറേ...... ""ആണോടോ" സി.ഐ സാര്‍ അയാളെ നോക്കി."ഇല്ല സാറേ ഇനി എന്റെ ഭാഗത്തുനിന്നൊരു പ്രശ്‌നവുമുണ്ടാകില്ല "അയാള്‍ തികച്ചും ശാന്തനായി പറഞ്ഞു."വേണ്ട സാറേ അവടെത്തിയാല്‍ ഇയാള്‌ മാറും ............. സ്വന്തം വീടും വീട്ടുകാരും നാടും നാ്‌ടുകാരും അടുത്തുള്ളപ്പം തിണ്ണമിടുക്ക്‌ കാട്ടാലോ...?ഒന്നുകില്‍ എന്റെ വീടിനടുത്ത്‌ അല്ലെങ്കില്‍ രണ്ടു പേരുടെ ഷെയറും വിറ്റ്‌ വേറൊരു സ്ഥലത്ത്‌.അതു മതി സാറേ.......... അവള്‍ കൃത്യമായ്‌ നിബന്ധന വെച്ചു.തര്‍ക്കം പിന്നേയും തുടര്‍ന്നു. ബാക്കി ഭാഗം കേള്‍ക്കാനെനിക്കായില്ല അപ്പോഴേക്കും മറ്റെന്തോ ഡ്യൂട്ടിക്കായി എനിക്കവിടെ നിന്നും പോകേണ്ടി വന്നു.

ഇച്ഛാശക്തി

2009-10-07T18:43:00.000-07:00

ഇച്ഛാശക്തി
ഒരിക്കല്‍ ക്ഷീണിതയായ ഒരു സ്‌ത്രീ എന്നോടു ചോദിച്ചു." കായികമായി ഒരിക്കലും സ്‌ത്രീക്ക്‌ പുരുഷനെ പിന്നിലാക്കാന്‍ സാധിക്കില്ല.അതുകൊണ്ടുതന്നെ ഈ അടിമത്തം അനുഭവിക്കുകയല്ലാതെ സ്‌ത്രീക്ക്‌ എന്താണൊരു നിവൃത്തി ".എന്നോടതു ചോദിക്കുമ്പോള്‍ അവരുടെ മുഖത്തെ തീഷ്‌ണഭാവം എന്നെ അത്ഭുതപ്പെടുത്തി.ഞാന്‍ അവരോടായ്‌ ഇപ്രകാരം സംസാരിച്ചു." കായിക ശക്തിയാണോ അടിമത്തം നിര്‍ണ്ണയിക്കുന്നത്‌? അങ്ങനെയെങ്കില്‍ ആനയല്ലേ കാടുഭരിക്കേണ്ടത്‌.മനുഷ്യരിലാണെങ്കില്‍ ബോഡിബ്യുല്‍ഡേഴ്‌സ്‌ അല്ലേ അതുചെയ്യേണ്ടത്‌.കരുത്തനായ കുടിയാനെ മെലിഞ്ഞുണങ്ങിയ ജന്മി ഭരിച്ചത്‌ കായികബലംകൊണ്ടാണോ...?മനുഷ്യര്‍ക്കുവേണ്ടത്‌ പട്ടിയുടെ ഇച്ഛാശക്തിയാണ്‌.നമ്മുക്ക്‌ നേരെ കുതിച്ചു വരുന്ന പട്ടിയെ കാണുമ്പോള്‍ ജീവനും കൊണ്ട്‌ നാം ഓടുകയോ അതിന്റെ അധികാരപരിധിയില്‍ നിന്നും മാറി നില്‌ക്കുകയോ ചെയ്യും.കേവലം പത്തോ പതിനഞ്ചോ കിലോ തൂക്കം വരുന്ന പട്ടി അമ്പത്‌ കിലോവിലേറെ ഭാരം വരുന്ന നമ്മളെ ഓടിക്കുന്നത്‌ കായികശക്തികൊണ്ടല്ല മറിച്ച്‌ അതിന്റെ ഇച്ഛാ ശക്തികൊണ്ടാണ്‌.ഇല്ലാത്തതിനെക്കുറിച്ച്‌ കേഴാതെ ഉള്ളതുപയോഗിക്കനും അതിലഭിമാനിക്കാനുമല്ലേ നാം പഠിക്കേണ്ടത്‌ ?

നിയോഗം

2009-10-01T09:35:00.000-07:00

നിയോഗം

2009 -ലെ ജില്ലാ പോലീസ്‌ സ്‌പോട്‌സ്‌ മീറ്റിനോടനുബന്ധിച്ച്‌ നിയമാനുസൃതം ഗ്രൗണ്ടില്‍ അണിനിരന്നതായിരുന്നു ഞാനും.മൂന്നു വിഭാഗങ്ങളായാണ്‌ മത്സരം.ഓരോ ടീമിനും ഓരോ ക്യാപ്‌റ്റന്‍മാര്‍ വേണം.ആമ്‌ഡ്‌ റിസേര്‍വ്വ്‌ വിഭാഗത്തിന്റെ ക്യാപ്‌റ്റന്‍ ഞാന്‍ അണിചേര്‍ന്ന ടീമിനടുത്തെത്തി പതാകയുമായി നിന്നു.ആരും പതാക വാങ്ങിയില്ല.അല്ലെങ്കില്‍ പതാക വാങ്ങാന്‍ ആര്‍ക്കാണ്‌ അര്‍ഹത എന്ന്‌ എല്ലാവരും ഒരു നിമിഷം അങ്കലാപ്പിലായി.എനിക്ക്‌ ആ ബോധം പോലും ഉണ്ടായില്ല .കാരണം വനിതാ പോലീസുകാര്‍ക്ക്‌ അതിനെപ്പറ്റി ചിന്തിക്കാനേ കഴിയില്ലല്ലോ. പെട്ടന്നാണ്‌ ആമ്‌ഡ്‌ സബ്ബ്‌ ഇന്‍സ്‌പെക്ടര്‍ ജോര്‍ജൂട്ടിസാര്‍ പതാകയുമായി നില്‍ക്കുന്ന പോലീസുകാരനോടായി പതാക വിനയയുടെ കൈയ്യില്‍ കൊടുക്ക്‌ എന്നു പറഞ്ഞത്‌. ഞാനുടനെ തിരിഞ്ഞ്‌ അണിനിരന്ന പോലീസുകാരെ ശ്രദ്ധിച്ചു. ആകെ ടീമിലെ സ്‌റ്റേറ്റ്‌ താരം ഞാന്‍ മാത്രമായിരുന്നു.അഭിമാനത്തോടെ ഞാന്‍ ആ പതാക ഏറ്റു വാങ്ങി.എനിക്കു വന്നു ചേര്‍ന്ന ആ ചുമതല എന്നില്‍ തന്നെ നിലനിര്‍ത്തും എന്നു വിശ്വസിക്കാന്‍ എനിക്ക്‌ സ്‌പോട്‌സു ദിവസം മാര്‍ച്ചു പാസ്റ്റിന്റെ സമയം വരെ കാത്തിരിക്കേണ്ടി വന്നു.ഏതു നിമിഷവും ആ പതാക ഒരു പോലീസു കാരനിലേക്ക്‌ കൈമാറ്റം ചെയ്യപ്പെടാന്‍ സാധ്യതയുണ്ടെന്ന്‌ മുന്‍ അനുഭവങ്ങളിലെ പാഠങ്ങള്‍ എന്നെ ഓര്‍മ്മിപ്പിച്ചു.ഏഴു വര്‍ഷം മുമ്പ്‌ അതേഗ്രൗണ്ടില്‍ വെച്ചു തന്നെയായിരുന്നു തലേ ദിവസം വരെ മാര്‍ച്ചുപാസ്റ്റ്‌ പരിശീലനം നടത്തിയ എന്നെ അന്ന്‌ സര്‍ക്കിള്‍ ഇന്‍സ്‌പെക്ടര്‍(ഇന്ന്‌ ഡി.വൈ.എസ്‌.പി)ആയിരുന്ന ദിവാകരന്‍ സാര്‍ വിനയ മാറിനില്‌ക്ക്‌ പെണ്ണുങ്ങളൊന്നും മാര്‍ച്ചുപാസ്റ്റിനു വേണ്ട എന്നു പറഞ്ഞധിക്ഷേപിച്ച്‌ ഒരു വലിയ ഗ്രൂപ്പില്‍ നിന്നും ഓടിച്ചത്‌.അന്ന്‌ നാണംകെട്ട്‌ ഡിസിപ്ലിന്‍ എന്ന കുന്തമുനയില്‍ തുടര്‍ന്നുള്ള മത്സരങ്ങളില്‍ പങ്കെടുത്ത്‌ വിജയിച്ച്‌ സ്റ്റേറ്റ്‌ മീറ്റിലേക്ക്‌ സെലക്ഷന്‍ കിട്ടി ആ വര്‍ഷത്തെ സ്റ്റേറ്റ്‌ പോലീസ്‌ മീറ്റില്‍ (കണ്ണൂരില്‍ വെച്ച്‌)പങ്കെടുത്തതും.വയനാട്ടില്‍ വെച്ചേ ഏറ്റ മുറിവുമായാണ്‌ കണ്ണൂരിലും എത്തിയത്‌.അവിടെവച്ചും പെണ്ണുങ്ങള്‍ മാര്‍ച്ചുപാസ്റ്റിനുവേണ്ട എന്ന്‌ അല്‌പനായ ടീമിന്റെ മാര്‍ഷല്‍ കല്‌പിച്ചു.എന്തുകൊണ്ട്‌ എന്ന എന്റെ ചോദ്യം അന്നവിടെ അമ്പരപ്പുണ്ടാക്കി."യൂണിഫോം വെള്ള പാന്റെും നീല സ്ലീവലെസ്‌ ബനിയനുമാണ്‌.നിങ്ങള്‍ക്കതിടാന്‍ പറ്റുമോ ?. അയാളുടെ ധാര്‍ഷ്ട്യം നിറഞ്ഞ ചോദ്യത്തിന്‌ ഞാനും അതേ ധാര്‍ഷ്ട്യത്താല്‍ മറുപടി കൊടുത്തു. " ധരിക്കാം സാര്‍ പിന്നെ ബ്രാ കണ്ടു എന്നു പറഞ്ഞ്‌ നിങ്ങള്‌ പ്രശ്‌നമുണ്ടാക്കാഞ്ഞാല്‍ മതി""നിങ്ങള്‍ എത്ര പേരുണ്ടാകും" ? അയാള്‍ എന്നെ തോല്‍പ്പിക്കാനെന്ന വണ്ണം ചോദിച്ചു."ഞങ്ങള്‍ മൂന്നു പേര്‍" ഞാനുത്തരം പറഞ്ഞു. ഏറെ നേരത്തെ ചര്‍ച്ചക്കൊടുവില്‍ ഞങ്ങളെ മാര്‍ച്ചു പാസ്റ്റില്‍ നില്‌ക്കാന്‍ അനുവദിച്ചു. തുടര്‍ന്ന്‌ എല്ലാം പ്രശ്‌നങ്ങളായി .വനിതാപോലീസുകാരുടെ പോയിംന്റെിനും ഏമാന്മാര്‍ അയിത്തം കല്‌പിച്ചു.വനിതാപോലീസുകാരുടെ പോയിംന്റെുകള്‍ പരിഗണിക്കാതെ ട്രോഫികള്‍ വിതരണം ചെയ്‌തു.ആ ട്രോഫി അസാധുവാക്കണമെന്നുപറഞ്ഞ്‌ ഞാന്‍ ഹൈക്കോടതിയില്‍ കേസ്‌ ഫയല്‍ചെയ്‌തെങ്കിലും അതിന്റെ പ്രായോഗികബുദ്ധിമുട്ടുകള്‍ നിരത്തിയ കോടതി പോലീസ്‌ ഡിപ്പാര്‍ട്ടുമെന്റെ്‌ വനിതാപോലീസുകാരോട്‌ അനീതിചെയ്‌തിട്ടുണ്ടെന്നും, വരും വര്‍ഷങ്ങളില്‍ വനിതാപോലീസുകാരുടെ പോയിംന്റെുകൂടി പരിഗണിക്കണമെന്ന്‌ ഉത്തരവിടുകയും ചെയ്‌തു.കേവലം ഒരാള്‍ ചോദ്യം ചെയ്‌തതുകൊണ്ടുമാത്രമാണ്‌ മുപ്പതു വര്‍ഷത്തിലധികമായി പോലീസ്‌ ഡിപ്പാര്‍ട്ടുമെന്റെ്‌ തുടര്‍ന്നുവന്നൊരു വിഡ്ഡിത്തം അവസാനിപ്പിക്കാന്‍ കഴിഞ്ഞത്‌.അതിന്റെ പേരില്‍ പോലീസ്‌ ഡിപ്പാര്‍ട്ടുമെന്റെില്‍ നിന്നും എന്നെ പിരിച്ചു വിട്ടവര്‍ തന്നെ ഇന്ന്‌ ഒരു ടീമിന്റെ അമരക്കാരിയാകാനും എന്നോട്‌ ഉത്തരവിട്ടത്‌ വിധിയുടെ നിയോഗം തന്നെ ആയിരിക്കാം.

എല്ലാവരും നല്ലവരാണ്‌

2009-09-23T04:21:00.000-07:00

എല്ലാവരും നല്ലവരാണ്‌

എല്ലാവരും നല്ലവരാണ്‌

നിഷ്‌കളങ്കരാണ്‌പിടിക്കപ്പെടുംവരെ.

ക്ലാസിലെ ചോദ്യങ്ങള്‍(തുടര്‍ച്ച 4)

2009-09-17T08:11:00.000-07:00

ക്ലാസിലെ ചോദ്യങ്ങള്‍(തുടര്‍ച്ച 4)
ചോദ്യം No.12 ആലപ്പുഴ ഹരിപ്പാടുനിന്നും ഏകദേശം അറുപത്‌ വയസ്സുതോന്നിക്കുന്ന സാമൂഹിക പ്രവര്‍ത്തകയും സ്വാതന്ത്ര്യസമര സേനാനിയുമായ മേഥിനിചേച്ചി.) വിനയാ വിനയ ഇങ്ങനെ ഈ വേഷത്തില്‍ നില്‌ക്കുന്നതുകൊണ്ട്‌ വിനയയുടെ അടുത്തേക്കടുക്കാനും വിനയയെ ശ്രവിക്കാനും സ്‌ത്രീകള്‍ മടിക്കുന്നുണ്ട്‌.അതുകൊണ്ടു തന്നെ ഒരു മാറ്റത്തിനുള്ള സാധ്യത വിനയ കുറക്കുകയല്ലേ...?
ഉത്തരം:--വര്‍ഷങ്ങളോളം താങ്കളെപ്പോലുള്ളവര്‍ ഇപ്പറയുന്ന സാധാരണ സ്‌ത്രീകള്‍ക്കിടയില്‍ സാധാരണ സ്‌ത്രീകള്‍ക്കിടയില്‍ അവര്‍ക്കിഷ്ടമുള്ളതു പറയാനും വേണ്ടിവന്നാല്‍ അവര്‍ക്കൊന്നു കെട്ടിപ്പിടിക്കാനും പാകത്തിലുള്ള വേഷവിധാനത്തില്‍ തന്നെ പ്രസംഗങ്ങളും പ്രഭാഷണങ്ങളും ,ഉപദേശങ്ങളുമെല്ലാം നടത്തിയിട്ട്‌ ഈ സ്‌ത്രീകളില്‍ എന്തു മാറ്റം വരുത്താനാണ്‌ താങ്കളെപ്പോലുള്ളവര്‍ക്കായത്‌ ?എന്റെ പൂര്‍വ്വീകരായ സ്‌ത്രീ പ്രവര്‍ത്തകരില്‍ നിന്ന്‌ മാതൃകയാക്കാന്‍ പറയത്തക്ക ഒന്നും കാണാഞ്ഞിട്ടാണ്‌ ഞാന്‍ എന്നെത്തന്നെ മാതൃകയാക്കേണ്ടി വന്നത്‌.
ചോദ്യം No.13 (സ്ഥലം കണ്ണൂര്‍ ജില്ലയിലെ ബക്കളം ഏകദേശം 35 വയസ്സു പ്രായം തോന്നിക്കുന്ന യുവതി) ഞങ്ങള്‍ മിക്കവരും വിവാഹിതരാണ്‌.ഭര്‍ത്താവിനേയും കുഞ്ഞുങ്ങളേയും നോക്കി വൂട്ടുപണികളുമെടുത്ത്‌ സന്തോഷത്തോടും സംതൃപ്‌തിയോടും കൂടിതന്നെ വീട്ടുപണികളുമെടുത്ത്‌ കഴിഞ്ഞു കൂടുന്നു.വിനയ പറയും പ്രകാരമുള്ള ജീവിതം ഞങ്ങളഅ# ആഗ്രഹിക്കുന്നില്ലെങ്കിലോ...?
ഉത്തരം:-- ഈ ചാണകകുണ്ട്‌ നിങ്ങള്‍ക്ക്‌ സുഖവും സന്തോഷവും സമാധാനവും സംതൃപ്‌തിയും എല്ലാം തരുന്നുണ്ടെങ്കില്‍ നിങ്ങള്‍ അതില്‍ തന്നെ കഴിയണം.ആരും കഷ്ടപ്പെട്ട്‌ അതില്‍ നിന്ന്‌ കയറിവരണമെന്ന്‌ ഞാന്‍ പറയില്ല.ഞാന്‍ എന്റെ കാര്യമാണ്‌ പറയുന്നത്‌.
ചോദ്യംNo.14 സ്ഥലം ആലപ്പുഴ ഏകദേശം 50 വയസ്സു പ്രായം തോന്നുന്ന മധ്യവയസ്‌കന്‍) നിങ്ങളുടെ ഈ ക്ലാസും കേട്ട്‌ സ്‌ത്രീകളെല്ലാം വീട്ടില്‍ പോയി പെരുമാറാന്‍ തുടങ്ങിയാല്‍ പുറത്ത്‌ പാളവെച്ച്‌ കെട്ടേണ്ടിവരും(സ്‌ത്രീകളും പുരുഷന്മാരും ഒരുപോലെ ആര്‍ത്ത്‌ ചിരിക്കുന്നു)
ഉത്തരം:-- (സ്‌ത്രീകളെ നോക്കി)നിങ്ങള്‍ക്കെങ്ങിനെ ചിരിക്കാന്‍ കഴിയുന്നു?നിങ്ങളുടെ അഭിമാനത്തെ ഇത്രയേറെ അവഹേളിച്ച അദ്ദേഹത്തിന്റെ പരിഹാസം കേട്ട്‌ നിങ്ങള്‍ക്കെങ്ങനെ ചിരിക്കാന്‍ കഴിഞ്ഞു? (എല്ലാവരുടെ ചിരിയും മങ്ങി) സ്‌ത്രീകളെ നോക്കി----നിങ്ങളെല്ലാവരും തിരിച്ചു പറയിന്‍ താങ്കളുടെ വീട്ടിലെ സ്‌ത്രീകളെപ്പോലെ എല്ലാ സ്‌ത്രീകളും കൊടിച്ചിപ്പട്ടികളല്ലെന്ന്‌. ( സ്‌തീകളുടെ ഭാവം പെട്ടന്നുമാറി അവരൊന്നിച്ച്‌ അയാള്‍ക്കുനേരെ വിരല്‍ ചൂണ്ടി.(പുരുഷന്മാരുടെ മുഖവും മങ്ങി.)
ചോദ്യം No.15 (സ്ഥലം പത്തനംതിട്ട ഏകദേശം 25 നും 30 നും ഇടയില്‍ പ്രായം മതിക്കുന്ന യുവാവ്‌) വിനയാ... നിങ്ങളുടെ ഈ ക്ലാസ്‌ പുരുഷന്മാര്‍ കൂടി കേള്‍ക്കേണ്ടതല്ലേ...?ഇന്നീ ക്ലാസില്‍ വന്നിരിക്കുന്നതിലധികവും സ്‌ത്രീകളാണ്‌.സ്‌ത്രീകള്‍ അനുഭവിക്കുന്ന അടിമത്തം ഇല്ലാതാക്കുന്നതില്‍ മുഖ്യപങ്ക്‌ വഹിക്കേണ്ടവര്‍ പുരുഷന്മാരല്ലേ....?
ഉത്തരം:-- ജന്മിയുടെ ഔദാര്യമല്ല കുടിയാന്റെ മോചനം.ജന്മിത്തത്തിനെതിരെ ബോധവത്‌ക്കരണം നടത്തേണ്ടത്‌ ജന്മിയെയല്ല.അതിന്റെ പരിണിതഫലം അനുഭവിക്കുന്ന കുടിയാനെത്തന്നെയാണ്‌.ജമ്‌നിത്തത്തിന്റെ ക്രൂരത അനുഭവിക്കുന്നത്‌ കുടിയാനാണ്‌.സ്‌ത്രീ രാവിലെ കിടക്കയില്‍ ചായ കൊണ്ടുത്തരേണ്ടതില്ല എന്ന്‌ പുരുഷന്‍ ചിന്തിക്കുമ്പോഴല്ല മറിച്ച്‌ അങ്ങനെ ചെയ്യേണ്ടതില്ല എന്ന്‌ സ്‌ത്രീ ചിന്തിക്കുമ്പോഴാണ്‌ അടിമത്തത്തെകുറിച്ചവള്‍ മനസ്സിലാക്കാന്‍ തുടങ്ങി എന്നനുമാനിക്കേണ്ടത്‌.സ്‌ത്രീയുടെ മോചനം അവളുടെ അഭിമാനബോധത്തില്‍ നിന്നും ഉരുത്തിരിയേണ്ട ചിന്തയാണ്‌.

ക്ലാസ്സിലെ ചോദ്യങ്ങള്‍ (തുടര്‍ച്ച 3)

2009-09-15T13:36:00.000-07:00

ക്ലാസ്സിലെ ചോദ്യങ്ങള്‍ (തുടര്‍ച്ച 3)
ചോദ്യം No.10 നിങ്ങളെ കണ്ടിട്ട്‌ ആണോ പെണ്ണോ എന്ന്‌ മനസ്സിലാകുന്നില്ലല്ലോ അതിനെപ്പറ്റി എന്തു പറയുന്നു(സ്ഥലം തലശ്ശേരി ബ്രണ്ണന്‍ കോളേജ്‌)ഉത്തരം :--എന്തിനാണ്‌ തിരിച്ചറിയിക്കുന്നത്‌ ?ഞാന്‍ വ്‌നയയാണെന്ന്‌ അറിയുന്നവര്‍ അറിഞ്ഞാന്‍ പോരേ.......?പിന്നെ ആ വിനയ പെണ്ണാണെന്ന്‌ അറിയേണ്ടവര്‍ അറിഞ്ഞാല്‍ പോരേ.......? അറിയിക്കേണ്ടവരെ അറിയിച്ചാല്‍ പോരേ........?
ചോദ്യം No.11 (സ്ഥലം .ഏറ്റുമാനൂര്‍.ഒരു കൂട്ടം പുരുഷന്മാരുമായി വാഗ്വേദത്തിലേര്‍പ്പെട്ടിരിക്കേ അവരിലൊരാള്‍) വിനയാ......... ഞങ്ങളെല്ലാവരുംവിവാഹം കഴിച്ചവരാണ്‌.കമ്മലും മാലയും ധരിച്ച്‌ മുടിനീട്ടി വളര്‍ത്തി സാരിയുടുക്കുന്നവരെയാണ്‌ ഞങ്ങള്‍ക്കിഷ്ടം.അപ്രകാരം തന്നെയുള്ളവരെ തന്നെ വിവാഹം കഴിച്ച്‌ സുഖമായി ജീവിക്കുകയും ചെയ്യുന്നു.അപ്പോള്‍ അതില്‍ നിന്നെല്ലാം വ്യത്യസ്‌തത പുലര്‍ത്തുന്ന വിനയയുടെ ജീവിതം........?
ഉത്തരം :--സന്തോഷം. നിങ്ങള്‍ നിങ്ങളുടെ ഇഷ്ടപ്രകാരമുള്ള ആളെ സെലക്ടു ചെയ്‌തു. ഞാന്‍ എന്റെ ഇഷ്ടപ്രകാരമുള്ള ആളെ സെലക്ടു ചെയ്‌തു.

www.manukallikad.com ലോകം: ക്ലാസ്സിലെ ചോദ്യങ്ങള്‍

2009-09-09T06:57:00.000-07:00

VINAYAYUTE LOKAM ... വിനയയുടെ ലോകം: ക്ലാസ്സിലെ ചോദ്യങ്ങള്‍

ക്ലാസ്സിലെ ചോദ്യങ്ങള്‍ (തുടര്‍ച്ച (2) )

2009-09-04T09:43:00.002-07:00

ക്ലാസ്സിലെ ചോദ്യങ്ങള്‍ (തുടര്‍ച്ച (2) )

ചോദ്യം No.5:-- നിങ്ങളീ സമത്വം എന്നൊക്കെ പറയുന്നത്‌ ആണിനെപ്പോലെ മസിലൊക്കെവെച്ച്‌................. തെങ്ങിന്മേലൊക്കെ കയറാന്‍ പാകത്തിലാകുക എന്നതാണോ........?(സ്ഥലം തിരുവനന്തപുരം ഒരു പത്രത്തിന്റെ റിപ്പോര്‍ട്ടര്‍)

ഉത്തരം:-- നിങ്ങള്‍തെങ്ങിന്മേല്‍ കയറുമോ... ?ഇല്ല ഞാന്‍ കയറില്ല.പക്ഷേ പൊതുവേ ആണുങ്ങളാണല്ലോ കയറുന്നത്‌.അയാള്‍ അല്‌പമൊന്നു പതറിക്കൊണ്ട്‌ മറുപടി പറഞ്ഞു. ഞാന്‍ തുടര്‍ന്നു.പണ്ടേ പറഞ്ഞു വരുന്ന ഒരു കഥയുണ്ട്‌.ഒരിക്കല്‍ ഒരു മൂര്‍ഖന്‍ പാമ്പ്‌ കടിച്ച ഒരാളെ ആളുകള്‍ എടുത്തുകൊണ്ടോടുന്നതു കണ്ടപ്പോള്‍ വഴിയില്‍ ചുരുണ്ടു കിടക്കുന്ന ഞാഞ്ഞൂല്‍ തല പൊക്കികൊണ്ട്‌ ഗമയില്‍ പറഞ്ഞു ആആആആആആആആആആ ന്റെ വര്‍ഗ്ഗത്തോടു കളിച്ചാല്‍ ഇങ്ങനിരിക്കും ന്ന്‌ അങ്ങനത്തെ ഉത്തരം വേണ്ട.പ്രാപ്‌തിയുള്ളവര്‍ പ്രാപ്‌തിയുള്ളതു ചെയ്യുമ്പോള്‍ അതിന്റെ പേരില്‍ ഒരു വര്‍ഗ്ഗം മുഴുവന്‍ അഭിമാനിക്കേണ്ടതില്ല.അത്‌ ആ പ്രവര്‍ത്തി ചെയ്യുന്നവരുടെ മാത്രം കഴിവാണ്‌.വര്‍ഗ്ഗത്തന്റേതല്ല.ഇവിടെ ഭൂരിപക്ഷം പുരുഷന്മാരും തെങ്ങില്‍ കയറാത്തവരും കടലില്‍ പോകാത്തവരും,പര്‍വ്വതങ്ങള്‍ കയറാത്തവരും തന്നെയാണ്‌.അങ്ങനെയൊക്കെ ചെയ്യുന്ന (പാവപ്പെട്ടവരും കഠിനാധ്വാനികളുമായ) ആണുങ്ങളുടെ പേരില്‍ യാതൊരര്‍ഹതയുമില്ലാത്ത ആണുങ്ങള്‍ ഊറ്റം കൊള്ളേണ്ടതില്ല.

ചോദ്യംNo.6:--വിനയയുടെ ഈ വേഷം പുരുഷാധിപത്യത്തോടുള്ള വെല്ലുവിളിയല്ലേ...?(കോട്ടയം cms കോളേജിലെ ഒരു പെണ്‍കുട്ടി)

ഉത്തരം:-- അതെ ഈ വേഷം മാത്രമല്ല, ഈ നില്‌പും നോട്ടവും, സംസാരവും , സാന്നിധ്യവും എല്ലാം എല്ലാം തന്നെ പുരുഷാധിപത്യത്തോടുള്ള വെല്ലുവിളി തന്നെയാണ്‌.

ചോദ്യം No.7 വിനയക്ക്‌ പുരുഷന്മാരെ വെറുപ്പാണോ ?( CMS കോളേജ്‌ കോട്ടയം ഒരു ആണ്‍കുട്ടി.)

ഉത്തരം:-- (ചിരിച്ചുകൊണ്ട്‌)ഒരിക്കലുമല്ല. എനിക്കവരെ ഇഷ്ടമാണ്‌. (ഭാവം മാറ്റി സദസ്സിനു നേരെ വിരല്‍ ചൂണ്ടി) പ്രേമിക്കാന്‍ കൊള്ളാം അത്രമാത്രം.

ചോദ്യം No.8:-- സ്‌ത്രീ ആധിപത്യം വരണമെന്നാണോ വിനയ ആഗ്രഹിക്കുന്നത്‌ ? താങ്കളുടെ ക്ലാസ്സു കേള്‍ക്കുന്ന ആര്‍ക്കും ഉണ്ടാകാവുന്ന ഒരു സംശയമാണിത്‌ (ചേര്‍ത്തല NSS കോളേജിലെ ഒരു ആണ്‍കുട്ടി.)

ഉത്തരം :-- ശരിയാണ്‌. ഇന്നലെ വരെ ഞങ്ങളുടെ തലയില്‍ കയറി ചവിട്ടി അരച്ചവരുടെ തലയില്‍ കയറി ഒരു ദിവസമെങ്കിലും ഒന്നു ചവിട്ടി അരക്കാന്‍ അഭിമാനമുള്ള ആര്‍ക്കും തോന്നും എന്നത്‌ തികച്ചും സ്വാഭാവികം.

ചോദ്യം No.9 :--എത്രയായാലും നിങ്ങള്‍ക്കൊന്നു പ്രസവിക്കണമെങ്കില്‍ ഞങ്ങളുടെ സഹായം വേണമല്ലോ...? (കണ്ണൂര്‍ ജില്ലയിലെ വക്കളത്തു നിന്നും ഒരു കൂട്ടം ചെറുപ്പക്കാരില്‍നിന്നും ഒരാള്‍)

ഉത്തരം :-- എന്തിന്‌...? ജേഴ്‌സിപ്പശു പ്രസവിക്കുന്നത്‌ ബന്ധപ്പെട്ടിട്ടൊന്നുമല്ലല്ലോ. ശാസ്‌ത്രം പുരോഗമിച്ചു എന്റെ സുഹൃത്തുക്കളേ....... ഡോക്ടര്‍ വേണോ, കലക്ടര്‍ വേണോ.....,എന്‍ജിനീയര്‍ വേണോ... , അതോ ഇതിലൊന്നും പെടാത്തതു വേണോ.... എന്നൊക്കെ ഒരു ദിവസം തന്നെ ചിന്തിക്കുകയും അന്നു തന്നെ സെലക്ടു ചെയ്യുകയും ചെയ്യാം. ഇഷ്ടമുള്ള ഒരു മിഠായി തിരഞ്ഞെടുക്കുന്ന ലാഘവത്തോടെ......

ക്ലാസ്സിലെ ചോദ്യങ്ങള്‍

2009-09-04T09:43:00.001-07:00

ക്ലാസ്സിലെ ചോദ്യങ്ങള്‍

എന്റെ സസ്‌പന്‍ഷെന്‍ കാലങ്ങളിലും എന്നെ സര്‍വ്വീസില്‍ നിന്നും പിരിച്ചു വിട്ട കാലങ്ങളിലുമായി ഏകദേശം അഞ്ഞൂറിലേറെ ക്ലാസ്സുകള്‍ എടുക്കുന്നതിന്‌ എനിക്ക്‌ അവസരം ലഭിച്ചു.കോളേജുകള്‍,സ്‌ക്കൂളുകള്‍,പഞ്ചായത്ത്‌മെമ്പര്‍മാര്‍, പഞ്ചായത്ത്‌ പ്രസിഡണ്ടുമാര്‍, സാഹിത്യപ്രമുഖരുടെ കൂട്ടായ്‌മകള്‍, സന്നദ്ധസംഘടനകളുടെ പരിപാടികള്‍ ..................... തുടങ്ങി നാനാതുറകളിലുള്ളവരുമായി അടുത്തിടപഴകുന്നതിന്‌ ഇതു കാരണമായി.ഓരോ ക്ലാസ്സുകളില്‍ നിന്നും സമൂഹത്തിനെന്നോടു ചോദിക്കാനുള്ള ചോദ്യങ്ങള്‍ തന്നെയായിരുന്നു പലരും എന്നോട്‌ ചോദിച്ചത്‌.

.ചോദ്യം. No.1(സ്ഥലം പുല്‌പള്ളി. ഏകദേശം 70 വയസ്സു പ്രായം വരുന്ന ഒരു സ്‌ത്രീ ) സാറേ എനിക്ക്‌ എഴുപത്തിരണ്ടു വയസ്സായി .ഇത്രയും കാലം അടിമയായിട്ടു തന്നെയാണ്‌ ജീവിച്ചത്‌.ഇനിയിപ്പോ കാലോം കഴിഞ്ഞു.ഇനി എനിക്കെന്തു ചെയ്യത്‌ സമാധാനിക്കാന്‍ കഴിയും. ?

ഉത്തരം :-- ഇത്രയും കാലം അടിമയായി ജീവിച്ചു എന്നതാണല്ലോ സങ്കടപ്പെടുത്തുന്നത്‌.അതിനെ മാറ്റാന്‍ ശേഷിക്കും കാലം സ്വന്തം ശരീരത്തിന്റെയെങ്കിലും ഉടമയായി മരിക്കാന്‍ ശ്രമിക്കണം.

ചോദ്യം No.2 സാറിന്റെ വീട്ടില്‍ മനസമാധാനം ഉണ്ടാകാറുണ്ടോ..?

ഉത്തരം :-- നിങ്ങളെല്ലാവരും ഭര്‍ത്താവിനെ തൃപ്‌തിപ്പെടുത്താന്‍ അയാള്‍ക്കിഷ്ടമുള്ള ഭക്ഷണമുണ്ടാക്കിക്കൊടുത്ത്‌ , അയാളുടെ അടിവസ്‌ത്രം പോലുമലക്കി,അയാള്‍ക്കുവേണ്ടി സീമന്തരേഖ വരച്ച്‌ അയാളുടെ താലി കഴുത്തിലണിഞ്ഞ്‌ അങ്ങനെ ഭര്‍ത്താവിനേയും കുടുംബത്തേയും സംതൃപ്‌തിപ്പെടുത്തുക എന്നത്‌ ജീവിതവൃതമാക്കിയനിങ്ങള്‍ക്ക്‌ സമാധാനമുണ്ടോ.................? ഇല്ല എന്ന്‌ ഒരേ ശബ്ദത്തില്‍ സദസ്‌ എനിക്കുത്തരം തന്നു.ഞാന്‍ തുടര്‍ന്നു.

ഉത്തരം :--എങ്കിലേ ആ പറഞ്ഞ സാധനം എനിക്കുമില്ല.പക്ഷേ എനിക്കൊന്നുണ്ട്‌ അഭിമാനം. ഞാന്‍ അഭിമാനം നിലനിര്‍ത്തി മനസമാധാനം ഇല്ലാതെ ജീവിക്കുന്നു .നിങ്ങള്‍ക്കിതു രണ്ടുമില്ല.അപ്പോള്‍ നിങ്ങളേക്കാള്‍ ഭേദം ഞാന്‍ തന്നെയല്ലേ............. ?എല്ലാവരും ചിരിച്ചുകൊണ്ട്‌ എന്റെ ഉത്തരത്തെ പിന്താങ്ങി.

ചോദ്യം No.3 :--( സ്ഥലം ആലപ്പുഴ) നിങ്ങളുടെ ഭര്‍ത്താവ്‌ സമ്മതിക്കുന്നതുകൊണ്ടല്ലേ നിങ്ങള്‍ക്കിങ്ങനെയൊക്കെ ആകാന്‍ സാധിക്കുന്നത്‌.?ഉത്തരം:-- കാത്ത സമ്മതിച്ചിട്ടാണോ തകഴി എഴുതിയത്‌ ? ആര്യ സമ്മതിച്ചിട്ടാണോ ഇ.എം.എസ്‌ ഒളിവില്‍ പോയത്‌ ? എന്റെ കാര്യവും അത്രേയുള്ളൂ.

ചോദ്യംNo.4 :-- മോഹന്‍ദാസ്‌ എന്നൊരാള്‍ നിങ്ങളെ വിവാഹം കഴിച്ചതുകൊണ്ടല്ലേ നിങ്ങള്‍ക്ക്‌ ഒരു ഭാര്യയാകാന്‍ കഴിഞ്ഞത്‌ .......... ? ( പുല്‌പള്ളിക്കടുത്ത്‌ ഷെഡ്ഡ്‌ എന്ന സ്ഥലത്തുനിന്നും ഏകദേശം മുപ്പതു വയസ്സു തോന്നിക്കുന്ന ഒരു ചെറുപ്പക്കാരനാണ്‌ ചോദ്യകര്‍ത്താവ്‌.ഷെഡ്ഡില്‍ നിന്നും ഓരോ അഞ്ചുമിനിട്ടു കഴിയുമ്പോഴും പുല്‌പള്ളിയിലേക്ക്‌ ബസ്സുണ്ട്‌)

ഉത്തരം:-- താങ്കള്‍ പുല്‌പള്ളിയില്‍ പോകണം എന്ന ഉദ്ദേശത്തോടെ ഷെഡ്ഡില്‍ ബസ്സു കാത്തു നില്‌ക്കുന്നു.ആദ്യം വന്ന ബസ്സ്‌ നിര്‌ത്തിയില്ല, നിങ്ങളെന്തു ചെയ്യും യാത്ര മതിയാക്കുമോ ?ഇല്ല അടുത്ത ബസ്സിനു കൈനീട്ടും അയാളുത്തരം പറഞ്ഞു.ആ..... ഞാനും അത്രേ ചെയ്യൂ........................ (തുടരും)

പെണ്ണിനു മാറിടം ബാധ്യതയോ.............. ?

2009-09-04T09:43:00.000-07:00

പെണ്ണിനു മാറിടം ബാധ്യതയോ.............. ?

പെണ്ണിന്‌ അവളുടെ മാറിടം ബാധ്യതയാണോ....?ഒരു വ്യക്തി എന്ന നിലയിലും പ്രകൃതിയിലെ ഒരു ജീവി എന്ന നിലയിലും അവള്‍ക്കേറെ അഭിമാനിക്കാന്‍ വക നല്‌കുന്ന ഒരവയവമാണ്‌ അവളുടെ മുലകള്‍.അമ്മയുടെ മുലയോട്‌ കടപ്പാടില്ലാത്തവര്‍ അത്യപൂര്‍വ്വം പേരേ ഉണ്ടാകൂ.പരമ്പരാഗതമായി ഒരു സമൂഹത്തിനു തന്നെ പ്രഥമോര്‍ജ്ജം നല്‌കിയ , നല്‌കികൊണ്ടിരിക്കുന്ന ,നല്‌കാനുള്ള അവളുടെ മുലകള്‍ അതി മ്ലേച്ഛമായ രീതിയില്‍ ചിത്രീകരിച്ച്‌ വാണിജ്യപ്പരസ്യങ്ങള്‍ക്കായുപയോഗിക്കുന്ന വെറും ചരക്കായി മാറ്റികൊണ്ടിരിക്കുന്നു.പെണ്ണിന്‌ വ്യക്തമായി അഭിമാനിക്കുന്നതിന്‌ വസ്‌തു നിഷ്ടമായ കാരണമുള്ള ഒരു അവയവമാണ്‌ മുല.തെറ്റായ പ്രചാരണം ഹേതുവായി മുല എന്നത്‌ ഏറ്റവും നിന്ദ്യമായ ഒരു പദമായും അവയവമായും മാറിപ്പോയിരിക്കുന്നു.അതുകൊണ്ടു തന്നെ അത്‌ പെണ്‍കുട്ടികളില്‍ സദാ അപകര്‍ഷതാ ബോധവും മറ്റു പല ബാധ്യതകളും ഉണ്ടാക്കുന്നു.തന്റെ സഹജീവിയായ പുരുഷന്‌ ഇതിനു സമാനമായ മറ്റൊരവയവം പ്രകൃതിയിലെ ജീവന്‍ നിലനിര്‍ത്തുന്നതിനുതകും വിധത്തില്‍ ഇല്ല എന്നതു തന്നെയാണിതിന്റെ മഹത്വം.എന്നിട്ടും മറച്ചു പിടിക്കേണ്ട ഒന്നായി കൗമാര പ്രായത്തിലേ പെണ്‍കുട്ടികള്‍ മാറിടത്തെ കാണുന്നു.തനിക്കില്ലാത്തതായ അപൂര്‍വ്വസിദ്ധിയുള്ള ഈ അവയവം അവനില്‍ പലവിധത്തിലുള്ള അസ്വസ്ഥതകളും അസൂയയും സൃഷ്ടിച്ചു.ഈ മാനസീകവസ്ഥയെ ലഘൂകരിക്കുന്നതിനായി പെണ്ണിന്റെ മാറിടത്തെക്കുറിച്ച്‌ അവളില്‍ ആവുന്നത്ര അപകര്‍ഷതാബോധം ജനിപ്പിക്കുന്നതിനും അവന്‍ ശ്രമിച്ചു. തന്റെ നയനസുഖത്തിനാണ്‌ പ്രകൃതി ഇങ്ങനെയൊരു അവയവം സ്‌ത്രീക്ക്‌ നല്‌കിയത്‌ എന്ന ചിന്ത അവന്‍ പ്രചരിപ്പിച്ചു.തത്‌ഫലമായി അവനില്‍ മോഹം ജനിപ്പിക്കുന്ന ഈ അവയവം പരമാവധി അവനില്‍ നിന്നും മറച്ചുവെക്കാനും അവന്റെ ചിന്തയാല്‍ സൃഷ്ടിച്ചെടുത്ത സമൂഹം അവളെ പഠിപ്പിച്ചു.അല്ലെങ്കില്‍ സദാ ഓര്‍മ്മപ്പെടുത്തി.ശരീരത്തിന്റെ നഗ്നത മറക്കുക എന്ന ഉദ്ദേശത്തോടെ ആരംഭിച്ച വസ്‌ത്രധാരണ രീതിയിലും മറ്റെല്ലാ മേഖലയിലും അവന്‍ കാണിച്ച ആധിപത്യമനോഭാവം വസ്‌ത്രധാരണത്തിലും പ്രയോഗിച്ചു.പെണ്ണ്‌ ഏത്‌ രീതിയിലുള്ള വസ്‌ത്രം ധരിക്കണമെന്ന്‌ അവന്‍ ചിന്തിച്ചു.അവന്റെ കണ്ണിലൂടെ അവന്‍ അവളുടെ വസ്‌ത്രത്തിനു രൂപകല്‌പന നടത്തി.വളരെ അടുത്ത കാലം വരെ ഒറ്റമുണ്ടു മാത്രം ധരിച്ചിരുന്ന നമ്മുടെ അമ്മൂമ്മമാര്‍ ഒട്ടേറെ സമരങ്ങളിലൂടെയാണ്‌ മാറു മറക്കാനുള്ള അവകാശം നേടിയെടുത്തത്‌.അങ്ങനെയുള്ള അവകാശം അവള്‍ നേടിയെടുത്തപ്പോഴും അതെങ്ങനെ മറക്കണമെന്ന തീരുമാനമെടുത്തതും പുരുഷന്‍ തന്നെയായിരുന്നു എന്നത്‌്‌ ബ്ലൗസിന്റെ പ്രത്യേകതയില്‍ നിന്നും മനസ്സിലാക്കാം.മാറു മറക്കണമെങ്കില്‍ നിങ്ങള്‍ മറച്ചുകൊള്ളൂ പക്ഷേ അത്‌ അതിന്റെ രൂപത്തില്‍ ഭാവത്തില്‍ തന്നെ ഞങ്ങള്‍ക്കു കാണണം......ബ്രേസിയറും ബ്ലൗസും സ്‌ത്രീയുടെ മാറിടത്തെ വസ്‌ത്രം ഉപയോഗിച്ച്‌ ആകൃതി നല്‌കുന്നതാണ്‌ . ശരീരത്തില്‍ നിന്നും വിട്ടു നില്‍ക്കുന്ന ഭാഗങ്ങള്‍ ശരീരത്തോടു ചേര്‍ന്നു തന്നെ നിന്നില്ലെങ്കില്‍ അതിന്റെ ചലനം ആത്മ വിശ്വാസം നഷ്ടപ്പെടുത്തും അതുകൊണ്ടു തന്നെ അവയുടെ ചലനം നിയന്ത്രിക്കും വിധം ശരീരത്തോടു ചേര്‍ത്തുനിര്‍ത്തുകയേവേണ്ടൂ. കളരിപയറ്റിനും മറ്റ്‌ കായികാഭ്യാസത്തിലും ഏര്‍പ്പെടുന്ന പുരുഷന്മാര്‍ ലങ്കോട്ടി ഉപയോഗിക്കുന്നതിന്റെ പിന്നിലെ ശാസ്‌ത്രവും ഇതു തന്നെയാണ്‌.ഒരു കുഞ്ഞു ജനിച്ചുകഴിഞ്ഞാല്‍ ബന്ധുക്കളും സുഹൃത്തുക്കളും കുഞ്ഞിനെ കാണാനായി പോകുന്നത്‌ പതിവാണ്‌.ഇതിനായി ഒരു കുഞ്ഞുടുപ്പ്‌ സമ്മാനമായി വാങ്ങുന്നതിന്‌ കടയിലേക്കു ചെന്ന്‌ ഒരു മാസം പ്രായമുള്ള കുട്ടിക്കുള്ള ഒരുടുപ്പ്‌ വേണമെന്നു പറഞ്ഞാല്‍ ഉടനെ കുട്ടി ആണോ...? പെണ്ണോ....... ? എന്ന മറു ചോദ്യം ഉയരുകയായി.പെണ്ണാണെന്നു പറഞ്ഞ ഉടനെ തന്നെ കടക്കാരി / കടക്കാരന്‍ കഴുത്തിനു ചുറ്റും വര്‍ണ്ണശബളതയില്‍ ഫ്രില്ലുകള്‍ തീര്‍ത്ത വിവിധയിനം കുഞ്ഞുടുപ്പുകള്‍ കാണിക്കുകയായി.ഇത്തരത്തില്‍ ഫ്രില്ലുവെച്ച ഉടുപ്പുകള്‍ ധരിച്ചു വളരുന്ന പെണ്‍കുട്ടി തന്റെ അമ്മയുടെ നൈറ്റിക്കു മുന്‍വശം വെച്ച ഫ്രില്ലിന്റേയും തന്റെ ഉടുപ്പിനു മുന്‍വശം വെച്ച ഫ്രില്ലിന്റേയും ഉദ്ദേശം എന്തെന്ന്‌ സ്വയം മനസിലാക്കാന്‍ കാലക്രമത്തില്‍ പരിശീലിക്കുന്നു.സ്‌ക്കൂള്‍തലം മുതല്‍ പെണ്‍കുട്ടികളെ അവരുടെ മാറിടത്തെക്കുറിച്ച്‌ കൃത്യമായ അവബോധം ഉണ്ടാക്കുംവിധമാണ്‌ അവര്‍ക്കുവേണ്ടി രൂപകല്‌പന ചെയ്‌തരിക്കുന്ന യൂണിഫോമുകള്‍.നഴ്‌സറി തലം മുതല്‍ തന്നെ പെണ്‍കുട്ടിയുടെ യൂണിഫോം മിഡിയും ഷര്‍ട്ടും പിന്നെ ഒരു ഓവര്‍കോട്ടും ആകുമ്പോള്‍ ആണ്‍കുട്ടിക്ക്‌ ട്രൗസറും ഷര്‍ട്ടും മാത്രമായിരിക്കും.ഈ ഓവര്‍ക്കോട്ട്‌ സമ്പ്രദായം സ്‌ക്കൂള്‍ വിദ്യാഭ്യാസത്തോടെ അവസാനിക്കുകയും അത്‌ കോളേജിലെത്തുമ്പോഴേക്കും അത്‌ സാരിയിലേക്കോ ചുരിദാറിലേക്കോ തിരിയുകയും ചെയ്യും..ഇത്തരത്തില്‍ ചെറുപ്പം മുതലേ മാറിടത്തില്‍ ശ്രദ്ധ പതിപ്പിച്ചു വളരുന്ന പെ്‌ണ്‍കുട്ടി ഒരു സ്‌ത്രീയായി കഴിയുമ്പോഴേക്കും ഈ ശ്രദ്ധ അവളില്‍ പൂര്‍ണ്ണമായും അലിഞ്ഞുചേര്‍ന്നിരിക്കും.സാരി എന്ന വസ്‌ത്രം തന്നെ മാറിടത്തെ മാത്രം ലക്ഷ്യം വെച്ചുകൊണ്ടുള്ള ഒന്നാണ്‌.മാറിടം വളര്‍ച്ചയെത്താത്ത ഒരു പെണ്‍കട്ടിക്ക്‌ ചുരിതാര്‍ ധരിക്കുന്നതിലോ മറ്റേത്‌ വസ്‌ത്രം ധരിക്കുന്നതിലോ അപാകതയില്ല എന്നാലവള്‍ സാരി ധരിക്കണമെങ്കില്‍ നിര്‍ബന്ധമായും അവള്‍ക്ക്‌ വളര്‍ച്ചയെത്തിയ മാറിടം ഉണ്ടായിരിക്കണം.മാറിടത്തെ ഭംഗിയായി പാതി മറക്കുന്നതിലാണ്‌ സാരി ഉടുക്കുന്നതിലെ ഭംഗിയും അഭംഗിയും.ജനിക്കുമ്പോള്‍ പൂര്‍ണ്ണ രൂപം കൈവരിച്ചിട്ടില്ലാത്ത മുലയെ മാത്രം കേന്ദ്രീകരിച്ചുള്ള ഈ വേഷം സ്‌ത്രീയെ ഒരു ശരീരം മാത്രമാക്കി ചുരുക്കുന്നതില്‍ മുഖ്യ പങ്കു വഹിക്കുന്നു.മുലകള്‍ക്ക്‌ സമൂഹം നല്‌കിയ അമിതപ്രാധാന്യം നിമിത്തം ഒരു പെണ്‍കുട്ടിയുടെ സകലമാന സന്തോഷങ്ങളും അവള്‍ ഈ അവയവത്തിന്റെ പേരില്‍ നിയന്ത്രിക്കുകയോ വേണ്ടെന്നുവെക്കുകയോ ചെയ്യുന്നു.പുസ്‌തകങ്ങളുമായി നടന്നുപോകുന്ന പെണ്‍കുട്ടി മാറിടത്തിന്‌ രക്ഷാകവചമായി പുസ്‌തകത്തെ ഉപയോഗിക്കുന്നത്‌ നമ്മുക്ക്‌ സുപരിചിതമാണല്ലോ .നമ്മുക്കിഷ്ടമല്ലാത്ത ഒരു വ്യക്തിയുടെ ദുരുദ്ദേശത്തോടെയുള്ള സ്‌പര്‍ശം പോലും നാമെതിര്‍്‌ക്കില്ലേ....? അത്ര പ്രാധാന്യം മാത്രമേ ഈ അവയവത്തിനും കൊടുക്കേണ്ടതുള്ളൂ.മതി മറന്നാഹ്ലാദിക്കേണ്ട സന്ദര്‍ഭങ്ങളിലും സാമൂഹികമായി വലിയ വലിയ കര്‍ത്തവ്യങ്ങളിലേര്‍പ്പെടേണ്ടി വരുന്ന സന്ദര്‍ഭങ്ങളിലും തന്റെ മാറിടത്തെ ഒരു ബാധ്യതയായി കാണുന്ന പെണ്‍കുട്ടി സമൂഹത്തോടും തന്നോടു തന്നെയുമുള്ള കടപ്പാടില്‍ നിന്നും ഒളിച്ചോടുന്നത്‌ ഒരു ശീലമാക്കി മാറ്റിയിരിക്കുന്നു.സ്‌ത്രീ / പരുഷന്‍ എന്ന വേര്‍തിരിവ്‌ സ്‌പഷ്ടമാക്കുന്നതിനുള്ള ഏറ്റവും എളുപ്പമായ മാര്‍ഗ്ഗം വസ്‌ത്രധാരണ രീതി തന്നെയാണ്‌.രണ്ടു കാലില്‍ നിവര്‍ന്നു നില്‌ക്കുന്ന മനുഷ്യര്‍ക്ക്‌ (ആണിനും പെണ്ണിനും)ഒരേ രീതിയിലുള്ള വസ്‌ത്രധാരണ രീതിയും യോജിക്കുന്നതു തന്നെയാണ്‌.സ്‌ക്കൂള്‍ തലം മുതലാരംഭിക്കുന്ന ഈ ലിംഗ വിവേചനപരമായ വസ്‌ത്രധാരണ രീതി ഇല്ലായ്‌മ ചെയ്യുക തന്നെ വേണം.കുട്ടികള്‍ കുട്ടികളായിതന്നെ വളരട്ടെ. അവര്‍ ആണോ പെണ്ണോ എന്നറിയേണ്ട ബാധ്യത അധ്യാപകര്‍ക്കെന്തിനാണ്‌......? അതുപോലെ നടന്നുപോകുന്ന വ്യക്തി ആണോ പെണ്ണോ എന്നെന്തിനാണ്‌ സമൂഹത്തെ മുഴുവന്‍ അറിയിക്കുന്നത്‌ .അത്‌ അറിയേണ്ടവര്‍ അറിഞ്ഞാല്‍പോരേ ? അറിയിക്കേണ്ടവരെ അറിയിച്ചാല്‍ പോരേ...............?

മാടക്കര എന്റെ നാട്‌

2009-08-28T07:02:00.000-07:00

മാടക്കര എന്റെ നാട്‌
ഭര്‍ത്താവിന്റെ ഉപദ്രവത്തെ തുടര്‍ന്ന്‌ തുടര്‍ച്ചയായി എനിക്ക് ഫോണ്‍ ചയ്‌തിരുന്ന പെണ്‍കുട്ടിയുടെ പ്രശ്‌നത്തില്‍ നിവൃത്തിയില്ലാതെ ഒരിക്കല്‍ അവരുടെ വീട്ടിലേക്കു കയറിചെന്നുകൊണ്ടു തന്നെ എനിക്കിടപെടേണ്ടി വന്നു.ആ സംഭവത്തിനു ശേഷം ഏതാണ്ട്‌ നാലു ദിവസം കഴിഞ്ഞപ്പോള്‍ ഒരു ബന്ധുവിന്റെ മരണാനന്തര ചടങ്ങില്‍ പങ്കെടുത്ത്‌ ഏകദേശം വൈകിട്ട്‌ ഏഴരയോടെ ഞാന്‍ മാടക്കരയില്‍ ബസ്സിറങ്ങി വീട്ടിലേക്ക്‌ നടക്കുകയായിരുന്നു."വിനയസാറേ................. ഒന്ന്‌ നിക്ക്‌ ഒരു കാര്യം ചോദിക്കട്ടെ" എന്ന പരിഹാസം നിറഞ്ഞ ചോദ്യം കേട്ട്‌ ഞാന്‍ തിരിഞ്ഞു നോക്കി.എന്റെ നാട്ടില്‍ എന്നെ ആരും സാറേ എന്നു വിളിക്കാറില്ല.വിനയേ, വിനയചേച്ചീ, വിനീ എന്നുമെല്ലാമുള്ള വിളികള്‍ മാത്രം കേട്ട്‌ ശീലിച്ച എന്നില്‍ ആ വിളി തന്നെ എന്തോ പന്തികേടുള്ളതായി അനുഭവപ്പെട്ടു.ഞാന്‍ തിരിഞ്ഞുനോക്കി. ഏറെ പരിചിതനും അയല്‍വാസിയുമായ അയാള്‍ എന്റെടുക്കലേക്ക്‌ നടന്നടുത്തു."എന്താ കാര്യം ? എന്താണെങ്കിലും വീട്ടില്‍ വന്ന്‌ സംസാരിക്കാം" ഞാന്‍ താക്കീതിന്റെ ശബ്ദത്തില്‍ പറഞ്ഞു . മാടക്കര ടൗണില്‍ നിന്നും കഷ്ടിച്ച്‌ 100 മീറ്റര്‍ ദൂരം മാത്രമേ എന്റെ വീട്ടിലേക്കുള്ളൂ.ഏകദേശം അമ്പതില്‍ കുറയാത്ത ഒരു ജനക്കൂട്ടം അപ്പോഴേക്കും അവിടെ രൂപപ്പെട്ടിരുന്നു." സാറ് വീട്ടിലെ ഉമ്മാനോട്‌ ജയില്‌കേറ്റുന്നോ എന്തൊക്കയോ പറഞ്ഞൂന്ന്‌ കേട്ടു.എന്തിനായിരുന്നൂന്ന്‌ പറഞ്ഞിട്ട്‌ പോയാമതി".അയാള്‍ എന്റെ മുന്നില്‍ തൊട്ടടുത്തായി നിന്നു.എന്റെ നിയന്ത്രണം വിട്ടു.വലതു കൈയ്യ്‌കൊണ്ട്‌ ഞാന്‍ അയാളുടെ ഷര്‍ട്ടിനു കുത്തിപ്പിടിച്ച്‌ അയാളെ തള്ളി ഞാന്‍ ജനക്കൂട്ടത്തിനിടയിലൂടെ അയാളേയും കൊണ്ട്‌ മുന്നോട്ടു പോയി "എന്നെ വഴിയില്‍ തടയാന്‍ താനാരാണ്‌.? ഇതെന്റെ നാടാണ്‌?. ഞാന്‍ കോപംകൊണ്ട്‌ വിറച്ചു. അപ്പോഴേക്കും എന്താ വിനയചേച്ചീ എന്നു പറഞ്ഞുകൊണ്ട്‌ ആരോ രണ്ടു പേര്‍ എന്നെ പിടിച്ചുമാറ്റി.പോട്ടെ വിനയേ എന്നു പറഞ്ഞ്‌ മുതിര്‍ന്ന ആളുകളും എന്നെ പിടിച്ചു.ആരൊക്കയോ നിമിഷങ്ങള്‍ക്കുള്ളില്‍ ഇടപെട്ട്‌ പ്രശ്‌നം അവസാനിപ്പിച്ച്‌ എന്നെ വീട്ടിലേക്കയച്ചു.വീട്ടിലെത്തയപാടെ സംഭവിച്ച കാര്യങ്ങള്‍ അതേ തീഷ്‌ണതയോടെ അവതരിപ്പിക്കാനായി ഞാന്‍ ദാസേട്ടനെ വിളിച്ചു.വാതില്‍ തുറന്നത്‌ എന്റെ ബന്ദുവായ പുരുഷു ആണ്‌.അവന്‍ ദുബായില്‍ നിന്നും വന്നതിന്റെ മൂന്നാമത്തെ ദിവസം.ഞാന്‍ ആദ്യമായിട്ടാണ്‌ അയാളെ കാണുന്നത്‌ അമ്മായിക്ക്‌ മനസ്സിലായോ... ? എന്നുള്ള ചോദ്യത്തില്‍ നിന്നുതന്നെ ആളെ മനസ്സിലായി.അയാളോട്‌ ചിരിച്ചെന്നു വരുത്തി നാമമാത്രമായ കുശലപ്രശ്‌നങ്ങള്‍ക്കൊടുവില്‍ ഞാന്‍ അടുക്കളയിലേക്ക്‌ ദാസേട്ടനെ കാണാനായി പോയി.ദാസേട്ടന്‍ ഇറച്ചി നുറുക്കുകയായിരുന്നു."ദാസേട്ടാ ഇപ്പം മാടക്കര നല്ലൊരു പ്രശ്‌നമുണ്ടായി......... എന്നു തുടങ്ങി ഞാന്‍ വിശേഷം പറയാന്‍ തുടങ്ങലും ആ അതൊക്കെ പിന്നെ പറയാം ഇപ്പംതന്നെ സമയം ഏഴര കഴിഞ്ഞു മേലുകഴുകി വേഗം വാ... അവനുച്ചക്കേ ഒന്നു കഴിച്ചിട്ടില്ല പോലും .അരിടിട്ടിട്ടുണ്ട്‌.ഇത്‌ നീ തന്നെ വെക്കണം " എന്നു പറഞ്ഞ്‌ ദാസേട്ടനെന്നെ ഓടിച്ചു.ഞാന്‍ മേല്‍ കഴുകി വന്ന്‌ ഇറച്ചി അടുപ്പില്‍ വെച്ചു. തേങ്ങ ചിരകി വറുക്കുമ്പോള്‍ ഗെയിറ്റു തുറക്കുന്ന ശബ്ദം കേട്ട്‌ ഞാന്‍ പുറത്തേക്ക്‌ നോക്കി.എന്നെ തടയാന്‍ അയാളെ ചട്ടം കെട്ടിച്ചവര്‍ തന്നെയാണ്‌ എന്നെ തേടി ഒത്തു തീര്‍പ്പിനു വന്നതെന്ന്‌ എനിക്കു മനസ്സിലായി.ഞാന്‍ തേങ്ങ വറുത്തുകൊണ്ടിരുന്നു.ദാസേട്ടനും പുരുഷുവും ടി.വി കാണുകയായിരുന്നു.കാളിംഗ്‌ബെല്‍ കേട്ടയുടനെ ദാസേട്ടന്‍ ചെന്ന്‌ വാതില്‍ തുറന്നു"വിനയ ഇല്ലേ ഒന്നാ കാണാനാ..... " അവര്‍ ചിരിച്ചുകൊണ്ട്‌ ദാസേട്ടനോട്‌ സംസാരിക്കന്നതു കേട്ടപ്പോ ഞാന്‍ അടുക്കളയില്‍ നിന്നും വിളിച്ചു പറഞ്ഞു." ദാസേട്ടാ....... എന്നെ കാണാന്‍ വന്നതാണെങ്കില്‍ രണ്ട്‌ ചെയറെടുത്ത്‌ അടുക്കളയിലേക്കിട്‌ എന്നോട്‌ സംസാരിക്കാനാണെങ്കില്‍ അടുക്കളയിലേക്ക്‌ വരട്ടെ എന്റെ ഇടം അടുക്കള തന്നെയാണ്‌.ഞാന്‍ ഉച്ചത്തില്‍ സംസാരിച്ചുകൊണ്ടിരിക്കെ കാര്യം മനസിലാകാതെ ദാസേട്ടന്‍ അവരെ ഡയനിംഗ്‌ ഹാളിലിരുത്തി.എന്റെടുക്കലേക്കോടിവന്ന്‌ എന്നോട്‌ പിന്നെ വറക്കാം അവര്‍ക്കെന്തോ ചോദിക്കാനുണ്ടത്രേ എന്നു പറഞ്ഞു.ഇതങ്ങനെ പിന്നെ വറത്താലൊന്നും ശരിയാകില്ല ഇപ്പം തന്നെ സമയമൊരുപാടായി.ഞാന്‍ മുന്നോട്ടു പോകാന്‍ തയ്യാറാകുന്നില്ലെന്നു കണ്ടപ്പോള്‍ ദാസേട്ടന്‍ എന്റെ കൈയ്യില്‍ നിന്നും ചട്ടുകം വാങ്ങി.ഇങ്ങ്‌ താ.... ഒരു കൊഴപ്പോംല്ലാതെ ഞാന്‍ വറുത്തോളാം ഒന്ന്‌ ദയവു ചെയ്‌ത്‌ ചെല്ല്‌.ദാസേട്ടന്‍ അടക്കം പറഞ്ഞു കാര്യങ്ങള്‍ പന്തിയല്ലെന്നുകണ്ട്‌ ടി.വി ഓഫ്‌ ചെയ്‌ത്‌ പുരുഷുവും അടുക്കളയിലെത്തി.തേങ്ങ വറുക്കാന്‍ ദാസേട്ടനെ ഏല്‍പിച്ച്‌ ഞാന്‍ ഡയനിംഗ്‌ ഹാളിലെത്തി. അവര്‍ക്കഭിമുഖമായിരുന്നുകൊണ്ട്‌ ഞാന്‍ പറഞ്ഞു.വന്ന കാര്യം പറയണം എനിക്കിന്നൊരു ഗസ്റ്റുണ്ട്‌ ഞാന്‍ നല്ല തിരക്കിലാണ്‌.എന്റെ സംഭാഷണത്തിന്റെ തുടക്കത്തില്‍ തന്നെ ഞാന്‍ പ്രകടിപ്പിച്ച നീരസം അവരെ നന്നായി അലോസരപ്പെടുത്തി."ഓന്‍ കാട്യേത്‌ തെറ്റ്‌ തന്ന്യാ...... ഞങ്ങള്‌ മാടക്കരേന്ന്‌ ഇത്ര നേരോം അതിനെപ്പറ്റി തന്ന്യായിനു പറഞ്ഞോണ്ടിരുന്നത്‌.മര്യാദെതന്നെ ചോദിക്കാന്‍ എന്തെല്ലം വഴിണ്ട്‌
"അബ്ദുള്ളക്കാ..... ഇതെന്റെ നാടാണ്‌. എവിടുന്നോ വന്ന ഒരുത്തന്‍ എന്ത്‌ ധൈര്യത്തിലാ എന്നെ തടഞ്ഞത്‌? അവനതിനുള്ള പിന്‍ബലം എവിടുന്നാ കിട്ടിയത്‌ ?(എന്നെ തടഞ്ഞു ചോദ്യം ചെയ്‌തആള്‍ ആ പെണ്‍കുട്ടിയുടെ ഭര്‍ത്താവിന്റെ സഹോദരിയുടെ ഭര്‍ത്താവായിരുന്നു)എന്തായാലും ഇതൊറ്റവള്ളിക്കൊന്നും ഞാന്‍ വിടില്ല.ഞാന്‍ രാത്രിയെന്നോ പകലെന്നോ ഇല്ലാതെ ഈ മാടക്കരയിലൂടെ ഏതു സമയത്തും സഞ്ചരിക്കുന്ന ഒരാളാണ്‌.നാളെയും ഇവനൊന്നും ഇതുപോലത്തെ പോക്കിരിത്തരം കാണിക്കില്ലെന്നെന്താണിത്ര ഒറപ്പ്‌ ? "ഇനി അങ്ങനൊരു സംഭവം ഉണ്ടാകില്ല.അത്‌ ഞങ്ങളുറപ്പുതരാം. പക്ഷേ ഞങ്ങള്‌ പറയുന്നതും വിനയ ഒന്ന്‌ മനസിലാക്കണം." ഉത്തരത്തിനായി അവര്‍ എന്നെ നോക്കി.
"എന്താണത്‌?"
"ഒരു കുടുംബാവുമ്പം പ്രശ്‌നങ്ങളുണ്ടാകും.നമ്മള്‌ ആ പ്രശ്‌നം തീര്‍ക്കാനാണ്‌ നോക്കണ്ടത്‌ അല്ലാതെ അതു വലുതാക്കാനല്ല...........എന്നുതുടങ്ങി അവരൊരു ഉപദേശത്തിന്റെ ശൈലി ആരംഭിച്ചപ്പോള്‍ തന്നെ ഞാന്‍ തടഞ്ഞു."ആലിക്കാ................. എന്നെ വിളിക്കുന്നോരോടും എന്റെടുത്ത്‌ വരുന്നോരോടും ഞാന്‍ എന്തു പറയണം എന്ന്‌ നിങ്ങളെന്നെ പഠിപ്പിക്കണ്ട. എന്നെ വിളിക്കുന്ന സ്‌ത്രീകളോടും എന്റെ വീട്ടില്‍ വരുന്ന സ്‌ത്രീകളോടും എന്റെടുത്ത്‌ വരണ്ട എന്നോ എന്നെ വിളിക്കണ്ട എന്നോ്‌ നിങ്ങള്‍ക്കു പറയാം അതിലെനിക്ക്‌ ഒരെതിര്‍പ്പും ഇല്ല"
"അതെങ്ങനാ ഞങ്ങള്‌ പറയാ...... അതൊക്കെ ഓരോരുത്തരുടെ ഇഷ്ടല്ലേ.....?" അവര്‍ പരസ്‌പരം നോക്കി ചിരിച്ചു.
"എന്റെ വീട്ടില്‍ വരുന്നവരോടും എന്റെ ഫോണില്‍ എന്റെ ഉപദേശം തേടുന്നവരോടും ഞാന്‍ എനിക്കു തോന്നിയതു തന്നെ പറഞ്ഞുകൊടുക്കും.അതിലൊന്നും വേലികെട്ടാന്‍ ഈ ജന്മത്തിലാര്‍ക്കും പറ്റില്ല." മണിക്കൂറുകള്‍ക്കുമുമ്പു മാത്രം നടന്ന സംഭവത്തിന്റെ തീഷ്‌ണത എന്നില്‍ നിന്നും വിട്ടു മാറിയട്ടേയില്ലായിരുന്നു.
"വിനയേ സമാധാനപ്പെട്‌ ഇതാ ഈ ചായ കുടിക്ക്‌ "എന്നു പറഞ്ഞ്‌ ദാസേട്ടന്‍ ഒരു പ്ലേറ്റില്‍ മൂന്നു ഗ്ലാസ്‌ കട്ടന്‍ ചായയുമായെത്തി. എന്റെ മനസ്‌ അപ്പോഴേക്കും കുറച്ച്‌ തണുത്തു.ചായകടിച്ചു കഴിഞ്ഞ്‌ സമയം കൊറേആയല്ലോ വിരുന്നുകാരൊക്കെ ഉള്ളതല്ലേ ഞങ്ങള്‌ ശല്യപ്പെടുത്തുന്നില്ല.ഞങ്ങളിറങ്ങട്ടെ അതൊന്നുമത്ര കാര്യാക്കണ്ട............ എന്നു പറഞ്ഞുകൊണ്ടവരിറങ്ങി.ഇപ്പോഴും ഓണത്തിന്‌ പായസവും,പെരുന്നാളിന്‌ അപ്പവും കൈമാറി ഒരു സ്‌പര്‍ദ്ദയുമില്ലാതെ ഞങ്ങള്‍ ജീവിക്കുന്നു.നല്ല അയല്‍പക്കക്കാര്‍ തന്നെയായി.

എന്നു പറയാന്‍ കഴിയുമോ......?

2009-08-22T22:21:00.000-07:00

എന്നു പറയാന്‍ കഴിയുമോ......?
കാലടി സംസ്‌കൃത യൂണിവേഴ്‌സിറ്റിയില്‍ ഒരു ചടങ്ങില്‍ സംബന്ധിച്ച്‌ സംസാരിക്കുകയായിരുന്ന ഞാന്‍.ക്ലാസ്സുകള്‍ക്കിടയില്‍ ഒരു യുവാവ്‌ എഴുന്നേറ്റ്‌ നിന്നുകൊണ്ട്‌ ചോദിച്ചു." വിനയ........... താങ്കള്‍ കുറേക്കാലമായല്ലോ ഇതുപോലെ നടക്കാന്‍ തുടങ്ങിയിട്ട്‌.എന്നിട്ടും ഒരാളെയെങ്കിലും നിങ്ങളെപ്പോലാക്കാന്‍ നിങ്ങള്‍ക്കു കഴിഞ്ഞോ ? അതിനുപോലും കഴിഞ്ഞില്ലെങ്കില്‍ നിങ്ങളുടെ ഉദ്യമം പരാജയമല്ലേ"?
ഉത്തരം- മഹാനായ ഗാന്ധിജി വര്‍ഷങ്ങളോളം ഒരു നേരിയ മുണ്ടുമാത്രം ധരിച്ചുകൊണ്ട്‌ ഈ ലോകം മുഴുവന്‍ ചുറ്റി. അവസാന നിമിഷത്തില്‍ പോലും ഒരാളെയെങ്കിലും ഒറ്റമുണ്ട്‌ ധരിപ്പിച്ചുകൊണ്ട്‌ ഗാന്ധിജിയുടെ പുറകില്‍ നിര്‍ത്താന്‍ ഗാന്ധിജിക്കു കഴിഞ്ഞോ............... ? ഇല്ലല്ലോ..... എന്നുവെച്ച്‌ ഗാന്ധിജിയുടെ ഉദ്യമം പരാജയമാണെന്നു പറയാന്‍ കഴിയുമോ

കുഞ്ഞി പ്രശ്‌നം

2009-08-21T22:35:00.000-07:00

കുഞ്ഞി പ്രശ്‌നം
തിരക്കുപിടിച്ച ഡ്യൂട്ടിക്കിടയില്‍ ഏറെ കഷ്ടപ്പെട്ട്‌ രണ്ടു ദിവസത്തെ ലീവെടുത്താണ്‌ ഒരു സിനിമയുടെ കാര്യം ചര്‍ച്ച ചെയ്യാനായി ഞാന്‍ തലശ്ശേരിയിലെത്തുന്നത്‌.സിനിമയുടെ മേഖലയില്‍ എനിക്കെന്തെല്ലാം ചെയ്യാനാകും എന്നത്‌ ഒന്നു വിലയിരുത്തുക കൂടി ചെയ്യാമല്ലോ എന്ന സുഹൃത്തുക്കളുടെയെല്ലാം ശക്തമായ പിന്തുണകൂടിയായപ്പോള്‍ ഒന്നുചെന്നു സംസാരിച്ചുനോക്കാം എന്ന്‌ ഞാനും തീരുമാനിച്ചു.ചര്‍ച്ചക്കായി എന്റെ പുസ്‌തകങ്ങള്‍,പല ഡയമെന്‍ഷനില്‍ ഞാന്‍ കളക്‌റ്റ്‌ ചെയ്‌ത പത്ര കട്ടിംങ്ങുകള്‍,സി.ഡി, തുടങ്ങി ഒരു സ്യൂട്ട്‌കേസു നിറയെ ചര്‍ച്ചയുമായി ബന്ധപ്പെട്ട രേഖകളുമായി ഏകദേശം രാവിലെ പതിനൊന്നു മണിയോടെ ഞാന്‍ എന്നെ വിളിച്ച ഡയറക്ടര്‍ താമസിക്കുന്ന വലിയ ടൂറിസ്റ്റ്‌ ഹോമിലെത്തി.എന്നെ ഔപചാരികമായി സ്വീകരിച്ച അദ്ദേഹം എന്നോടായി
“മേഡം ധൃതിയില്ലല്ലോ............” എന്നു ചോദിച്ചു.ഇല്ല ഒട്ടും ധൃതിയില്ല.ഫോണില്‍ സംസാരിച്ചതുപോലുള്ള എല്ലാ ഡോക്യുമെന്‍‌സും എടുത്തിട്ടുണ്ട്‌."
ഞാന്‍ ചിരിച്ചുകൊണ്ടു തന്നെ മറുപടി പറഞ്ഞു.ഏകദേശം ഒരു മണിയോടെ ഞങ്ങള്‍ ചര്‍ച്ച ആരംഭിച്ചു.ഇതിനിടയിലെല്ലാം എന്നോട്‌ വളരെ മന്യമായി തന്നെ "മേഡം ഒരാളുപോലും നമ്മെ ശല്യപ്പെടുത്തുന്നില്ല.സിനിമയുടെ ലോകം അങ്ങിനെയാണ്‌. സാധാരണക്കാര്‍ക്ക്‌ ചിന്തിക്കാനാകാത്ത ദന്തഗോപുരമാണത്‌‌.മേഡത്തിന്റെ എല്ലാ സ്വപ്‌നങ്ങളും സിനിമയിലൂടെ യാഥാര്‍ത്ഥ്യമാക്കാന്‍ എനിക്കു കഴിയും. എന്റെ വര്‍ക്കില്‍ ഇനിയുള്ള കാലം മേഡത്തിന്റെ സഹായവും സഹകരണവും ഉണ്ടാകണം. ഞാന്‍ പത്രങ്ങളില്‍ ധാരാളം വായിച്ചിട്ടുണ്ട്‌........................................................ അങ്ങിനെ ഏറെ ബഹുമാന പുരസ്സരം പേപ്പറുകളും രേഖകളും പരിശോധിക്കുന്നതിനിടയില്‍ അയാള്‍ എന്നോട്‌ സംസാരിച്ചു. അപ്പോഴേക്കം സമയം ഒരു ഏഴുമണിയായിട്ടുണ്ടാകും.ഏകദേശം രണ്ടു മണിക്കൂറോളം വായിക്കാനുള്ള സി.ഡി നോക്കുവാന്‍ മുറിയില്‍ കംപ്യൂട്ടറില്ലാത്തതിനാല്‍ പിറ്റേന്നു രാവിലെ ടൗണിലെ കംപ്യൂട്ടര്‍ സെന്റെറില്‍ പോയി ആ വര്‍ക്കു കൂടി കഴിഞ്ഞ്‌ തിരിക്കാമെന്ന്‌ ഞാന്‍ തീരുമാനിച്ചു.പിന്നീട്‌ അയാള്‍ ചെയ്‌ത സിനിമയും പുതിയ സിനിമയില്‍ എനിക്കായി രൂപപ്പെടുത്തിയ കഥാപാത്രത്തെക്കുറിച്ചും അതിന്റെ പ്രത്യേകതയെക്കുറിച്ചും വിവരിച്ചുകൊണ്ട് സ്‌ക്രിപ്‌റ്റ്‌ എന്നെ കാണിക്കുകയും ഞാനത്‌ വായിച്ച് ഗൗരവമായി സംസാരിക്കുകയും ചെയ്‌തു.ഇടക്ക്‌ പലപ്പോഴും ഗൗരവം പോയി ബാല്യകാലങ്ങളും സിനിമാഫലിതങ്ങളും എന്റെ പ്രവേശനവും ഉദയനാണ്‌ താരത്തിലെ ശ്രീനിവാസന്റെ റോളും മറ്റും പറഞ്ഞ്‌ ഞങ്ങള്‍ പൊട്ടിചിരിച്ചു.രാത്രി പത്തു മണിയായപ്പോഴേക്കും എനിക്ക്‌ വല്ലാത്ത ഉറക്കം വന്നു.ഏകദേശം രണ്ടായിരം രൂപയിലധികം വാടക തോന്നിക്കുന്ന വിശാലമായ കട്ടിലുള്ള മറ്റൊരു മുറികൂടി എനിക്കു വേണ്ടി എടുപ്പിക്കുന്നത്‌ അന്യായമാണെന്നു തോന്നിയതുകൊണ്ട്‌ ഞാന്‍ മറ്റൊരു മുറിക്കു വേണ്ടി ആവശ്യപ്പെട്ടില്ല.പിന്നീടുണ്ടാകുന്ന സ്വാഭാവികമായ ചലനം എനിക്കറിയാവുന്നതു കൊണ്ടു തന്നെ "ഹലോ സര്‍ നല്ല ക്ഷീണമുണ്ട്‌ ശല്യപ്പെടുത്തരുത്‌. ഞാനിവിടെ ഉറങ്ങുന്നതില്‍ നിങ്ങള്‍ക്കെന്തെങ്കിലും ്‌അസ്വസ്ഥതയുണ്ടെങ്കില്‍ മറ്റൊരു മുറികൂടി എടുക്കാം" നോ..... നോ അതിന്റെ ആവശ്യമില്ല .കക്ഷി അത്ര മര്യാദക്കാരനൊന്നുമായിരുന്നില്ലെങ്കിലും ബെഡ്‌റൂമിനോടു ചേര്‍ന്ന വരാന്തക്കും ബെഡ്‌റൂമിനോളം വലിപ്പവും സൗകര്യവും ഉണ്ടായിരുന്നു എന്നത് ഞാന്‍ ആദ്യമേ നോക്കി വെച്ചിരുന്നു..എനിക്ക്‌ അസ്വസ്ഥത തോന്നിയ നിമിഷം അലമാരയില്‍ നിന്നും ഷീറ്റുമെടുത്ത്‌ ഞാന്‍ എഴുന്നേറ്റപ്പോള്‍ അയാള്‍ എന്നോട്‌ ക്ഷമാപണം നടത്തി ആ ഉദ്യമത്തില്‍ നിന്നും എന്നെ പിന്തിരിപ്പിച്ചു.പിന്നെ ഒരു ശല്യവുമില്ലാതെ സ്വസ്ഥമായും സമാധാനമായും ഞാനുറങ്ങി.പിറ്റേന്നു രാവിലെ തന്നെ സി.ഡി യുടെ കോപ്പിയെടുക്കാന്‍വേണ്ടി എട്ടു മണിയോളം കാത്തിരുന്നു .മടക്കയാത്രയുടെ ഭാഗമായി ഞാന്‍ പേപ്പറുകളും പുസ്‌തകങ്ങളും വസ്‌ത്രങ്ങളും ഒതുക്കി വെക്കുമ്പോള്‍ അയാള്‍ എന്നോടായി പതിഞ്ഞ ശബ്ദത്തില്‍ പറഞ്ഞു" വിനയാ................ ഇവിടുള്ള മറ്റ്‌ ആര്‍ട്ടിസ്റ്റുകള്‍ക്കും സ്റ്റാഫിനുമെല്ലാം എന്തെങ്കിലും തോന്നിയിട്ടുണ്ടാകും " "എന്തിന്‌ ?" സിഡിയുടെ കവര്‍ തിരഞ്ഞുകൊണ്ട്‌ ഞാന്‍ ചോദിച്ചു.
"സാധാരണ female artist വന്നാല്‍ കൂടെ അമ്മയോ, അച്ഛനോ, ഭര്‍ത്താവോ അങ്ങനെ വേണ്ടപ്പെട്ടവര്‍ ആരെങ്കിലും കൂടെയുണ്ടാകും.മാത്രമല്ല അവര്‍ സെപ്പറേറ്റ്‌ റൂമിലുമായിരിക്കും. പിന്നെ നല്ല നല്ല റോളിനു വേണ്ടി കൂടെയുള്ള മാരണങ്ങളെ ഒക്കെ ഉറക്കീട്ടുവേണം ആ പാവത്തിനൊന്ന്‌ സംവിധായകന്റെ മുറിയിലെത്താന്‍." അതും പറഞ്ഞ്‌ അയാള്‍ പൊട്ടിപൊട്ടി ചിരിച്ചു.
"ഓഹോ അത്രക്ക്‌ വെലപിടിപ്പുള്ള മുറിയിലായിരുന്നോ ഞാന്‍ ഒറ്റക്ക്‌ കിടന്നത്‌ " എന്ന്‌ ചോദിച്ചുകൊണ്ട്‌ അപ്പോഴേക്കും ടീപ്പോയക്കടിയില്‍ കിടന്ന സി.ഡി കവര്‍ എടുത്ത്‌ അതില്‍ സി.ഡി ഇട്ടുകൊണ്ട്‌ ഞാന്‍ ചോദിച്ചു.
"വിനയയെന്താ... സീരിയസാകാത്തത്‌? ഇവിടുള്ളവര്‍ക്കെല്ലാം വിനയയെ നന്നായിട്ടറിയാം.ഇന്നലെ രാത്രി ഇതിനുള്ളില്‍ എന്തു നടന്നു എന്ന്‌ നമ്മുക്കല്ലാതെ ആര്‍ക്കും അറിയില്ല.ഒരാണും പെണ്ണും ചേര്‍ന്നാല്‍ എന്ത്‌ നടക്കും എന്ന്‌ എല്ലാവര്‍ക്കും അറിയാം. അവരത്‌ പുറത്തു പറഞ്ഞാല്‍ വിനയയുടെ ഗതിയെന്താകും................... ? അയാള്‍ ഗൈരവത്തോടെ എന്നെ നോക്കി."ഓ..... അതാണോകാര്യം ഇത്തരം കുഞ്ഞി പ്രശ്‌നങ്ങളോന്നും ഞാന്‍ സീരിയസ്സാക്കാറേയില്ല."അയാളുടെ ചമ്മല്‍ മറച്ചുവെക്കാനായി ഞാന്‍ എഴുതിയ എന്റെ രണ്ടു പസ്‌തകങ്ങള്‍ 1-എന്റെ കഥ അഥവാ ഒരു മലയാളി യുവതിയുടെ ജീവിതയാത്ര 2-നീ പെണ്ണാണ്‌ -കവിതാ സമാഹാരം എന്നിവ കൈയ്യിലെടുത്ത്‌ ഇതിവിടെ വെക്കട്ടെ അടുത്ത വരവിനു തരാം എന്നു പറഞ്ഞ്‌ മാറ്റി വെച്ചു.രാവിലെ 9 മണിയോടെ അവിടുള്ള ആര്‍ട്ടിസ്‌റ്റുകളോടും മറ്റും യാത്ര പറഞ്ഞ്‌ ഞാന്‍ തിരിച്ചു.

ഏമാന്‍

2009-08-19T07:15:00.000-07:00

ഏമാന്‍
‍പിച്ച നല്‌കും തെണ്ടിയും
ഏമാന്‍ തന്നെ ആ നിമിഷം

സീമന്തരേഖ

2009-08-15T18:56:00.001-07:00

സീമന്തരേഖ

നിയമപരമായി വിവാഹമോചനം നേടിയ ശേഷവും തുടര്‍ച്ചയായി സീമന്തരേഖ വരച്ചു മാത്രം ഓഫീസില്‍ പോകന്ന എനിക്ക്‌ കണ്ടു പരിചയമുള്ള സ്‌ത്രീയോട്‌ ഒരിക്കല്‍ ഒരു ബസ്‌ യാത്രക്കിടയില്‍ സാഹചര്യം കിട്ടിയപ്പോള്‍ ഞാന്‍ ചോദിച്ചു." ചേച്ചി...... ഡൈവോഴ്‌സ്‌ കഴിഞ്ഞിട്ടും ചേച്ചിയെന്തിനാ സീമന്ത രേഖ വരക്കുന്നത്‌" ?"അതിനെന്താ..."? അവര്‍ ചിരിച്ചുകൊണ്ട്‌ എന്നെ നോക്കി."സീമന്തരേഖ വരക്കുന്നത്‌ ഭര്‍ത്താവിനു വേണ്ടിയല്ലേ...."?"എന്നാരു പറഞ്ഞു "?ഞാന്‍ എന്റെ മനസ്സിലെ പുരുഷനുവേണ്ടിയാണ്‌ ഇതു വരക്കുന്നത്‌ " അവര്‍ ഒരു ഭാവ വ്യത്യാസവുമില്ലാതെ പറഞ്ഞു

സീമന്തരേഖക്ക്‌ അങ്ങനേയും ഒരര്‍ത്ഥമുണ്ടോ എന്ന്‌ മനസ്സില്‍ ചോദിച്ച്‌ ഞാന്‍ മിണ്ടാതിരുന്നു.

നല്ലവള്‍

2009-08-15T18:56:00.000-07:00

നല്ലവള്‍
തുടര്‍ച്ചയായി അടിച്ച മൊബൈല്‍ ഫോണിനു മറുപടി പറയാനായി വണ്ടി നിര്‍ത്തി ഒട്ടും താത്‌പര്യമില്ലാത്ത അവസ്ഥയില്‍ സംസാരിക്കുകയായിരുന്നു ഞാന്‍.എതിര്‍ സൈഡില്‍ നിന്നും ഒരു മോട്ടോര്‍ സൈക്കിള്‍ എന്റെടുത്തായി നിര്‍ത്തി.അയാള്‍ ഹെല്‍മെറ്റെടുത്ത്‌ എന്റെടുക്കലെത്തി ഭവ്യതയോടെ എന്നോടെന്തോ പറയാനായി എന്നെത്തന്നെ നോക്കി നിന്നു.ഞാന്‍ പിന്നെ വിളിക്കാം എന്നു പറഞ്ഞ്‌ ഫോണ്‍ കട്ട്‌ ചെയ്‌തു."എന്തേ............. മനസിലായില്ല."ഞാന്‍ കാര്യം തിരക്കി."സാറെ ഞാന്‍ മുമ്പൊരിക്കല്‍ പരിചയപ്പെട്ടിട്ടുണ്ട്‌.ഒന്നു രണ്ടു പ്രവശ്യം ഫോണില്‍ സംസാരിച്ചിട്ടുമുണ്ട്‌." അയാള്‍ മുഖവുരയായിട്ടു പറഞ്ഞു."ok ഇപ്പോഴെന്താണു കാര്യം" ഞാന്‍ അയാളുടെ ശങ്കയകറ്റി."അന്നു ഞാന്‍ ഒരു ലതികേച്ചിയുടെ കാര്യം ഫോണിലൂടെ കുറേ നേരം സംസാരിച്ചിരുന്നു.... " അയാള്‍ എന്നെ ത്തന്നെ ഉറ്റുനോക്കി. "ആ..... പച്ച കുത്തിയ ലതികേച്ചി." എനിക്കു പെട്ടന്നോര്‍മ്മ വന്നു. ആ..... അവര്‍ നിങ്ങളുടെ ആരാണ്‌.........? ശീലിച്ച ശൈലിയില്‍ ഞാന്‍ ചോദിച്ചുപോയി."എന്റെ വലിയമ്മയുടെ മകളാണ്‌.സാറിനിപ്പം സൗകര്യപ്പെടുമോ......"? ഒന്നവിടം വരെ പോകാനാ....... സമയം വൈകിട്ട്‌ ആറരമണി കഴിഞ്ഞിരിക്കുന്നു. എന്റെ വീട്ടില്‍ പോകുന്ന വഴിയില്‍ തന്നെയായതുകൊണ്ടും എന്തോ അത്യാവശ്യം എന്നെക്കൊണ്ട്‌ അവര്‍ക്കുണ്ടെന്നു തോന്നിയതുകൊണ്ടും ഞാന്‍ സമ്മതിച്ചു. അയാള്‍ വണ്ടി തിരിച്ചു.ഏകദേശം അഞ്ചു കിലോമീറ്റര്‍ അയാള്‍ തിരിച്ച്‌ വണ്ടിയോടിക്കണം. ഞങ്ങള്‍ ആ സ്‌ത്രീയുടെ വീട്‌ ലക്ഷ്യമാക്കി യാത്രയായി. മെയിന്‍ റോഡില്‍ നിന്നും അവരുടെ വീട്ടിലേക്ക്‌ തിരിയുന്ന റോട്ടില്‍ അയാള്‍ മുന്നിലും ഞാന്‍ പിന്നിലുമായി വണ്ടി തിരിച്ചു.ആ ജംഗ്‌ഷനില്‍ നിന്നും വണ്ടിക്കു പിറകേ ആളുകള്‍ എത്തി നോക്കുന്നത്‌ കണ്ണാടിയിലൂടെ ഞാന്‍ കണ്ടു.മുന്നിലും പുറകിലുമായി അവരുടെ ഗേറ്റിനു മുന്‍വശം ഞങ്ങള്‍ വണ്ടി നിര്‍ത്തി.അയാള്‍ കോളിംഗ്‌ ബെല്ലമര്‍ത്തി.അല്‌പസമയത്തിനുള്ളില്‍ അവര്‍ വാതില്‍ തുറന്നു "ആ............... വിനയ എവിടുന്നു കിട്ടി ഗിരീ.............. " എന്നു പറഞ്ഞ്‌ അവര്‍ ഞങ്ങളെ ഇരിക്കാന്‍ ക്ഷണിച്ചു."ആ............ എന്താ ലതികേച്ചീ അന്ന്‌ ഫോണിലൂടെ പറഞ്ഞിട്ട്‌ ഒന്നും മനസിലായില്ല.ഒരു ദിവസം ഗിരിയും വിളിച്ചിരുന്നു."ഞാന്‍ കാര്യമറിയാന്‍ തിടുക്കം കൂട്ടി. അവര്‍ വിഷയത്തിലേക്കു കടന്നു.മുകുന്ദേട്ടന്‍ മരിച്ചിട്ടിപ്പോ എട്ടു വര്‍ഷായി .ഇപ്പം രണ്ടു വര്‍ഷായി കുട്ടികള്‍ രണ്ടാളും ജോലിക്കായി പുറത്തും. ഇവിടേക്ക്‌ ഒരാക്കും വരാമ്പറ്റൂല .ആരു വന്നാലും കൂറച്ചു ചെറുപ്പക്കാര്‌ ഗെയിറ്റിനു മുന്നിലൂടെ നടക്കും .തിരിച്ചു പോകുമ്പോ അവരെ ചോദ്യം ചെയ്യാ. വളരെ ചെറിയ പയ്യന്‍മാരാ.... മോ്‌ന്റെ ഒന്നിച്ച്‌ പഠിച്ച ഒരുത്തനൂണ്ട്‌ അക്കൂട്ടത്തില്‍.ഞാന്‍ വിനയക്ക്‌ ഫോണ്‍ ചെയ്‌തതിന്റെ പിറ്റേ ദിവസം പേരാമ്പ്രയുള്ള എന്റെ ഇളയച്ഛന്‍ മരിച്ചിട്ട്‌ ഞാന്‍ പോയിരുന്നു. പിന്നെ സഞ്ചയനം കഴിഞ്ഞാണ്‌ വന്നത്‌. തിരികെ ഒറ്റക്ക്‌ പോകണ്ട എന്നും പറഞ്ഞ്‌ എന്റെ ചേച്ചിയുടെ മകനും എനിക്കു കൂട്ടു വന്നു.ഞങ്ങള്‍ രാത്രി പത്തു മണിക്കാണ്‌ ഇവിടെ ബസ്സിറങ്ങിയത്‌.പിറ്റേന്ന്‌ രാവിലെ ഭക്ഷണവും കഴിച്ച്‌ അവന്‍ പോകുകയും ചെയ്‌തു.അന്ന്‌ ഉച്ചകഴിഞ്ഞ്‌ ഞാന്‍ കൃഷിഭവനില്‍ പോകുമ്പോള്‍ ടൗണില്‍ വെച്ച്‌ മുഹമ്മദിക്ക എന്നോട്‌ ഇങ്ങനെ പറഞ്ഞുഇന്നലെ ഇബടെള്ള ചെക്കമ്മാരൊക്കേം കൂടി ഇങ്ങളെ വീട്‌ വളഞ്ഞീനു, വെറുതെ ഇങ്ങളെ നാണം കെടുത്തരുത്‌ന്നും പറഞ്ഞ്‌ ഞാനൊഴിവാക്കിയതാ ന്ന്‌" അവര്‍ അത്ഭുതത്തോടും പകയോടും എന്നെ നോക്കി.എന്തിനാ അവര്‍ വീടു വളഞ്ഞത്‌. ഞാന്‍ എന്റെ ആകാംഷ മറച്ചു വെച്ചില്ല."വേറെന്തിനാ................ ഞാന്‍ പോക്കാ.............. എന്ന്‌ പറയിക്കാന്‍""നിങ്ങള്‌ പോലീസില്‍ പരാതി പറഞ്ഞോ""ഇല്ല""നിങ്ങള്‌ കുട്ടികളെ അറിയിച്ചോ.................""അറിയിച്ചു.അവര്‍ക്കു രണ്ടാക്കും ഒരേ അഭിപ്രായാ ആരേം അറിയിക്കണ്ട നാണക്കേടാണെന്നാ അവരു പറയുന്നത്‌ അതോണ്ടാ പോലീസിലും അറിയിക്കാത്തത്‌ ".നല്ല കുട്ടികള്‍.ആരുമില്ലാതെ തനിച്ചു ജീവിക്കുന്ന അമ്മക്കു വേണ്ടി ഫോണ്‍ മുഖേനെപ്പോലും ഒരാശ്വാസം കൊടുക്കാതെ അവര്‍ക്കു നാണക്കേടാണ്‌ എന്നു പറഞ്ഞ്‌ എന്തെങ്കിലും ആയിക്കോട്ടെ എന്ന അവസ്ഥയില്‍ സ്വന്തം അമ്മയെ തള്ളിയിട്ട്‌ അവരെ പ്രതിസന്ധിയില്‍േ ആക്കി എങ്ങിനെ അവര്‍ സ്വസ്ഥമായിട്ടിരിക്കുന്നു."എന്താ ലതികേച്ചി ഉദ്ദേശിക്കുന്നത്‌ " എനിക്കും ക്ഷമകെട്ടു." സാറേ സാറെന്തെങ്കിലും ഒരു തീരുമാനം ഉണ്ടാക്കി തരണം. മുമ്പ്‌ രണ്ടു പ്രാവശ്യം ഈ അഷറഫ്‌ വാതിലു മുട്ടി എന്നും പറഞ്ഞ്‌ ലതിയേച്ചി വീട്ടിലേക്ക്‌ വിളിച്ചു.ആളെ കൃത്യമായിട്ട്‌ അറിഞ്ഞസ്ഥിതിക്ക്‌ എന്താ പരാതി കൊടുത്താല്‌.എല്ലാ ദിവസവും ഞങ്ങള്‍ക്ക്‌ വരാന്‍ പറ്റോ.ഇവരെപ്പറ്റി പറഞ്ഞ്‌ ഞങ്ങള്‍ക്കെന്നും വിഷമാ..... പരാതി കൊടുക്കാന്‍ പറഞ്ഞാ ചേച്ചിയൊട്ട്‌ കൊടുക്കുന്നുമില്ല.മക്കള്‍ക്ക്‌ അവരെ കാര്യം എന്നല്ലാതെ യാതൊരു ബാധ്യതയുമുണ്ടെന്ന്‌ എനിക്കു തോന്നീട്ടില്ല." അയാള്‍ ഒറ്റ ശ്വാസത്തില്‍ അയാളുടെ അവസ്ഥ പറഞ്ഞു."ലതികേച്ചീ................ പോലീസ്‌ സ്‌റ്റേഷന്‍ അത്രക്ക്‌ മോശപ്പെട്ട സ്ഥലമൊന്നുമല്ല. ഇപ്പോഴത്തെ എസ്‌.ഐ നല്ല മനുഷ്യനാണ്‌.എത്രയും പെട്ടന്ന്‌ നിങ്ങള്‍ സ്റ്റേഷനില്‍ വന്നൊരു പരാതി തരണം. ബാക്കിയെല്ലാം പിന്നെ. ""അതൊക്കെ മോശല്ലേ...................... "അവര്‍ പിന്നേയും നിസ്സഹായതയോടെ എന്നെ നോക്കി."ലതികേച്ചീ നിങ്ങളിതുവരെ സ്‌റ്റേഷനിലൊന്നും പോയിട്ടില്ല.എന്നിട്ടും നിങ്ങള്‌ നല്ലവളാണെന്ന്‌ നാട്ടുകാര്‍ കരുതീട്ടില്ല. (മുപ്പതു മീറ്റര്‍ മാറിയുള്ള ജംഗ്‌ഷനില്‍ നിന്നും മാറിമാറി ആളുകള്‍ എത്തിനോക്കുന്നത്‌ കോലായിലിരിക്കുന്ന ഞങ്ങള്‍ക്ക്‌ കാണാമായിരുന്നു.)നിങ്ങളൊന്ന്‌ മനസ്സിലാക്കുക നിങ്ങളെക്കൊണ്ടാരും നല്ലതു പറയുന്നില്ല.ആരും നല്ലതു പറയുകയും വേണ്ട.പക്ഷേ നിങ്ങള്‍ കാശു മുടക്കി കഷ്ടപ്പെട്ടുണ്ടാക്കിയ നിങ്ങളുടെ വീട്ടില്‍ നിങ്ങള്‍ക്ക്‌ ഒരുത്തരുടെയും ശല്യമില്ലാതെ മനസ്സമാധാനത്തോടെ കിടന്നുറങ്ങണം. അതിന്‌ നിങ്ങള്‍ കുറച്ച്‌ റിസ്‌കെടുത്തേ മതിയാകൂ.പോലീസും ഇവിടുള്ള നല്ലവരായ ആളുകളും നിങ്ങള്‍ക്കൊപ്പമുണ്ട്‌ ".അയല്‍പക്കത്തുള്ള രണ്ടു സ്‌തീകള്‍ അവര്‍ക്ക്‌ കൂട്ടു കിടക്കാന്‍ ഈയിടെയായി വരുന്നുണ്ടെന്ന്‌ സംസാരമധ്യേ അവര്‍ സൂചിപ്പിച്ചിരുന്നു.ഏകദേശം എട്ടുമണിയോടെ ഞങ്ങള്‍ ആ വീട്ടില്‍ നിന്നും തിരിച്ചു."ഇപ്പം ധൈര്യായോ........................... " ഇറങ്ങാന്‍ നേരം മനസമാധാനത്തിനായി ഞാന്‍ അവരോടു ചോദിച്ചു."രണ്ടീസത്തിനുള്ളില്‍ ഞാന്‍ സ്‌റ്റേഷനില്‍ വരാം" എങ്ങും തൊടാതെയുള്ള അവരുടെ മറുപടി കേട്ട്‌ ചിരിച്ചുകൊണ്ട്‌ അവിടെനിന്നും ഇറങ്ങുകയല്ലാതെ എനിക്ക്‌ മറ്റു നിവൃത്തിയൊന്നുമുണ്ടായിരുന്നില്ല.

2009-08-12T16:40:00.000-07:00

എന്തൊരു ധാര്‍ഷ്ട്യം.................. !കോടതിയിലെ ഒരു ചിലവു കേസിന്റെ രണ്ടാമത്തെ അവധി. ഭര്‍ത്താവിനോടായി കോടതി "പണം കൊണ്ടു വന്നിട്ടുണ്ടോ............... "ഭര്‍ത്താവ്‌ "ഉണ്ട്‌ ഇതാ............."അയാള്‍ കൈയ്യില്‍ തൂക്കിപ്പിടിച്ച സഞ്ചി കാണിച്ചുകൊണ്ടു പറഞ്ഞു. "എന്താണിത്‌ " കോടതി"കൊടുക്കാനുള്ള പണമാണ്‌.""എത്രയുണ്ട്‌ ""1000 രൂപ""ആ............. അതെണ്ണി തിട്ടപ്പെടുത്തി രേഖപ്പെടുത്തി അവര്‍ക്കു കൊടുത്ത ശേഷമേ നിങ്ങള്‍ പോകാവൂ" കോടതി(ആയിരം രൂപക്കുള്ള നോട്ടുകള്‍ക്കു പകരം ഏറെ കഷ്ടപ്പെട്ടിട്ടാകണം അത്രക്ക്‌ ചില്ലറ പൈസകള്‍ അയാള്‍ സംഘടിപ്പിച്ചത്‌.അത്‌ എണ്ണി തിട്ടപ്പെടുത്തേണ്ട ബാധ്യത കോടതി അയാള്‍ക്കു തന്നെ നല്‌കിയില്ലായിരുന്നെങ്കില്‍ അങ്ങിനേയും ആ സ്‌ത്രീയെ അപമാനിക്കാമായിരുന്നല്ലോ.)

നാം ഇത്ര ദരിദ്രരോ...........................?

2009-08-05T10:34:00.000-07:00

നാം ഇത്ര ദരിദ്രരോ...........................?
കാര്‍ഗിലില്‍ വെച്ച്‌ നീന്തല്‍ പരിശീലിപ്പിക്കുന്നതിനിടയിലോ മറ്റോ മരിച്ച ജവാന്റെ മൃതദേഹം അഞ്ചു ദിവസത്തിനു ശേഷമാണ്‌ അയാളുടെ വീട്ടിലെത്തിക്കാന്‍ സാധിച്ചത്‌.....................?ബോഡിക്ക്‌ അകമ്പടി പോയതു കൊണ്ട്‌ എനിക്കും അയാളുടെ വീട്ടില്‍ പോകാനായി.ശവപ്പെട്ടി തുറക്കാന്‍ പറ്റില്ലെന്ന്‌ കൂട്ടത്തില്‍ വന്ന പട്ടാളക്കാര്‍ വീട്ടുകാരോട്‌ പറയുന്നുണ്ടായിരുന്നു.അമ്മയുടേയും കൂടപ്പിറപ്പായ അനിയന്റേയും നിര്‍ബന്ധത്തിനു വഴങ്ങി അവര്‍ ആ പെട്ടി ഏറെ കഷ്ടപ്പെട്ട്‌ പതുക്കെ ഒന്നു തുറന്നു.ധീര ജവാന്റെ ശരീരം ഒരു നോക്കു കാണാനെത്തിയവരും കൂടപ്പിറപ്പും അമ്മയും എല്ലാം ഒരു പോലെ മൂക്കു പൊത്തി പിടിച്ചുപോയി .ആ നാറ്റം അത്രക്ക്‌ അസഹനീയമായിരുന്നു.വീണ്ടു കെട്ടിവെച്ച ആ പെട്ടി പിന്നീട്‌ ആര്‍ക്കുവേണ്ടിയും തുറന്നില്ല.തലയുടെ ഭാഗത്ത്‌ ആ കരുത്തനായ രാജ്യസ്‌നേഹിയുടെ ഒരു ഫോട്ടോ പതിച്ചിരുന്നു.നാടിനു കാവല്‍ നില്‌ക്കാന്‍ വേണ്ടിയുള്ള പലതരം പരിശീലനങ്ങളിലൊന്നാണ്‌ നീന്തലും.മറ്റുള്ളവരെ പരിശീലിപ്പിക്കുന്നതിനിടയിലാണ്‌ ആ പാവത്തിന്‌ അപകടം പിണഞ്ഞത്‌.മരണം അതെപ്പോഴും സംഭവിക്കാം. ഈ സത്യത്തെ മുന്‍കൂട്ടി കാണാന്‍ വലിയ പട്ടാള ബുദ്ധിയൊന്നും വേണ്ട.മൂന്നും നാലും മാസം പഴക്കമുള്ള ശവശരീരങ്ങള്‍ യാതൊരു കോട്ടവും തട്ടാതെ നാട്ടിലെത്തുന്നത്‌ നമ്മുക്കിന്നൊരു പുതുമയേ അല്ല.പണമാണ്‌ അതിന്റെ മാനദണ്ഡമെങ്കില്‍ ഈ അവസ്ഥ ചോദ്യം ചെയ്യപ്പെടേണ്ടതുണ്ട്‌.രാജ്യത്തെ സേവിക്കുന്ന പട്ടാളക്കാരന്റെ മരണം രാജ്യസ്‌നേഹമുള്ള ഓരോ വ്യക്തിയുടേയും വേദനയാണ്‌.അറിവോ പരിചയമോ ഇല്ലാത്ത അനവധിയാളുകള്‍, മരിച്ചത്‌ ഒരു പട്ടാളക്കാരനായതുകൊണ്ടു മാത്രം ആ ശരീരം ഒരു നോക്ക്‌ കാണാനാഗ്രഹിച്ച്‌ ആ വീട്ടിലും നാട്ടിലുമായി എത്തിയിരുന്നു.ഇത്രയേറെ ശാസ്‌ത്രം വളര്‍ന്ന നമ്മുടെ നാട്ടില്‍ , അനീതിയെ എങ്ങിനെയും എതിര്‍ക്കും എന്ന്‌ വങ്കത്തം വിളമ്പുന്ന നേതാക്കളുള്ള നമ്മുടെ നാട്ടില്‍ ഈ കൊടിയ അനീതി പത്രങ്ങള്‍ക്കും, ചാനലുകള്‍ക്കും ഒന്നുംതന്നെ വാര്‍ത്തയല്ലാതാകും എന്ന ചിന്ത എന്നെ ഏറെ വേദനിപ്പിക്കുന്നു.

അന്തരം

2009-08-02T16:19:00.000-07:00

അന്തരം

ഒരിക്കല്‍ വനിതാസെല്ലില്‍ ഒരു പുരുഷന്‍ തന്റെ ഭാര്യയെ വീട്ടുകാര്‍ പിടിച്ചുവെച്ചിരിക്കയാണെന്നും താനും ഭാര്യയും തമ്മില്‍ പ്രശ്‌നങ്ങളൊന്നുമില്ലെന്നും തനിക്കും തന്റെ ഭാര്യക്കും ഒന്നിച്ചു താമസിക്കുന്നതിനുവേണ്ട സഹായം ചെയ്‌തു തരണമെന്നും അഭ്യര്‍ത്ഥിച്ചുകൊണ്ടൊരു പരാതി നല്‌കി.പരാതിയില്‍ പറയുന്ന സ്‌ത്രീയെ നേരിട്ടു കണ്ട്‌ ഞാന്‍ വിവരം ചോദിച്ചു.

"എന്താടോ തനിക്ക്‌ തന്റെ കെട്ട്യോനെ ഇഷ്ടമല്ലേ................ ?

"അങ്ങനൊന്നുമില്ല സാറേ........ ""പിന്നെന്താ താന്‍ അയാളുടെ കൂടെ താമസിക്കാത്തത്‌" ?

" സാറേ........... എനിക്കയാളോട്‌ ദേഷ്യൊന്നൂല്ല. രാത്രി കിടക്കാന്‍ നേരത്ത്‌ കാലൊന്ന്‌ കഴുകിക്കൂടേ.............. ? പല്ലൊന്ന്‌ തേച്ചൂടേ................." ?ആ പെണ്‍കുട്ടിയുടെ ചോദ്യം കേട്ടപ്പോഴാണ്‌ ആ രണ്ടു വ്യക്തികള്‍ തമ്മിലുള്ള അന്തരം ഞാന്‍ ശ്രദ്ധിച്ചത്‌.

അതിനിങ്ങളെപ്പോലെ തവളാകൊന്നും വേണ്ട വക്കീലേ...........

2009-07-30T10:19:00.001-07:00

അതിനിങ്ങളെപ്പോലെ തവളാകൊന്നും വേണ്ട വക്കീലേ...........

കോടതിയില്‍ ഒരു വാഹനാപകടമരണ കേസിന്റെ വിചാരണ.ഒരു ജീപ്പിന്റെ മുന്‍വശം ഇടതു ഭാഗത്തു നിന്നും ഇറങ്ങി ഡ്രൈവര്‍ക്ക്‌ കാശുകൊടുക്കാനായി പോയ ആളെ പുറകില്‍ നിന്നും വന്ന ഒരു കാര്‍ ഇടിച്ചു വീഴ്‌ത്തി.സാക്ഷി 68 വയസുള്ള ഒരു ഹാജ്യാരാണ്‌. ജീപ്പിന്റെ പിന്‍സീറ്റില്‍ ഇടതു വശത്തായിട്ടാണ്‌ അയാള്‍ ഇരുന്നിരുന്നത്‌.കോടതിയിലെ സാക്ഷികൂട്ടില്‍ കയറിയ ഹജ്യാരോടായി പ്രതിഭാഗം വക്കീല്‍"നിങ്ങള്‍ ജീപ്പിന്റെ പുറകിലെ ഇടതു ഭാഗം സീറ്റിലാണ്‌ ഇരുന്നത്‌ .. അല്ലേ ?"ഉത്തരം- അതെപുറകില്‍ നിന്നും കാര്‍ അതി വേഗതയില്‍ ഓടിച്ചു വരുന്നത്‌ നിങ്ങള്‍ കാണുന്നുണ്ടായിരുന്നു അല്ലേ......... ?"ഉത്തരം-അതെ കാണുന്നുണ്ടായിരുന്നു."ജീപ്പിനു മുന്നിലൂടെ എതിര്‍ സൈഡിലേക്ക്‌ പോയ ആളെ കാര്‍ ഇടിച്ചു വീഴ്‌ത്തുന്നതും നിങ്ങള്‍ കണ്ടു അല്ലേ.......... ?"ഉത്തരം- അതെ കണ്ടു (വളരെ ശാന്തമായ ചോദ്യവും ശാന്തമായ ഉത്തരവും.പെട്ടന്ന്‌ വക്കീലിന്റെ ഭാവം മാറി)"എന്താണു മിസ്റ്റര്‍ നിങ്ങളെന്താ തവളയാണോ മുമ്പിലുള്ളതും പുറകിലുള്ളതും ഒരു പോലെ കാണാന്‍""ഒരു ലോക്കല്‌ ജീപ്പിന്റെ പുറകിലെ സീറ്റിലിരിക്കുന്ന ആര്‍ക്കും ഒരു പരിധി വരെ മുന്നിലെ കാഴ്‌ചയും പുറകിലെ കാഴ്‌ചയും കാണാനാകും അതിന്‌ ഇങ്ങളെപ്പോലെ തവളൊന്നും ആകണ്ട വക്കീലേ ..........ഹാജ്യാരും തിരിച്ചടിച്ചു.

സത്യം

2009-07-26T09:54:00.000-07:00

സത്യം

ആരാരുമില്ലെനിക്കെന്ന സത്യം

ചൊല്ലുവാനിന്നെനിക്കാരുമില്ല

കൂലിയില്ലാ ചുമട്‌

2009-07-03T08:57:00.000-07:00

കൂലിയില്ലാ ചുമട്‌
ഇന്ന്‌ ഞാന്‍ ഒരു തെളിവെടുപ്പിനായി കോടതിയില്‍ പോയതായിരുന്നു.ഒരു അമ്മയും അവരുടെ പത്താം ക്ലാസില്‍ പഠിക്കുന്ന മകളും കൂടി മജിസ്‌ട്രേറ്റിനു മുമ്പാകെ മകള്‍ കൊടുത്ത മൊഴിയില്‍ പോകും മുമ്പ്‌ അവരെ ഒപ്പിടുവിക്കാനായി ബെഞ്ച്‌ ക്ലാര്‍ക്ക്‌ അവരെ വിളിച്ചു.ഒപ്പിടുവിക്കുന്നതിനു മുമ്പായി മജിസ്‌ട്രേറ്റ്‌ ചീഫ്‌ എഴുതിയഫോമിന്റെ മുകള്‍ ഭാഗം പൂരിപ്പിക്കുന്നതിനായി എന്താ അച്ഛന്റെ പേര്‌ എന്ന്‌ കുട്ടിയോട്‌ ചോദിച്ചപ്പോള്‍ തൊട്ടടുത്തുനിന്ന അമ്മ എന്റെ പേര്‌.................................... അത്രയും പറഞ്ഞപ്പോഴേക്കും ക്ലാര്‍ക്ക്‌ പറഞ്ഞു ഏയ്‌ നിങ്ങളുടെ പേര്‌ വേണ്ട.......... (ആ സ്‌ത്രീ എന്തോ അനാവശ്യം പറഞ്ഞതു പോലെ തോന്നും അപ്പോഴുള്ള അയാളുടെ ഭാവം)ആ ഫോം ഞാന്‍ വെറുതെ നോക്കി.............. അതില്‍ അങ്ങനെ ഒരു കോളമേയില്ല.ഒരു ഫോമില്‍ നൊന്തു പെറ്റ അമ്മയുടെ പേരേ വേണ്ട എന്നു തീരുമാനിക്കാന്‍ ഏതു കോടതിക്കാണവകാശം? കോടതി നല്‌കിയ വിധി കോടതി പോലും പാലിക്കുന്നില്ല. അച്ഛനാരെന്നറിയില്ല എന്ന്‌ പറയുകമാത്രമേ നമ്മുടെ പേരൊന്നെഴുതിക്കാനുള്ള ഏക പോം വഴി എന്ന്‌ ഇവിടുത്തെസ്‌ത്രീകള്‍ ചിന്തിച്ചു തുടങ്ങും എന്നതില്‍ സംശയമില്ല.അച്ഛന്‍ കുട്ടിയെ സംബന്ധിച്ചിടത്തോളം ഒരു അവിഭാജ്യ ഘടകമേയല്ല.അച്ഛനെ അറിയില്ല എന്നതോ അച്ഛനില്ലെന്നുള്ളതോ ഒരു വ്യക്തിയുടെ കറ്റമല്ല.അതുകൊണ്ടുതന്നെ അച്ഛനില്ല എന്ന കാരണത്താല്‍ ഒരു വ്യക്തിയുടെ വിദ്യാഭ്യാസമോ, ചികിത്സയോ, തൊഴിലോ ഒന്നും നിഷേധിക്കാന്‍ ഭരണഘടനാപരമായി ഒരു സര്‍ക്കാരിനും അവകാശമില്ല.പിന്നെ നാം സ്‌ത്രീകള്‍ എന്തിനീ കൂലിയില്ലാചുമട്‌ പേറുന്നു."നമ്മള്‍ നില നിര്‍ത്തുന്നൊരീ സദ്‌ഗുണത്തില്‍ നിന്നാണല്ലോപൈതൃകമെന്നൊരു വാക്ക്‌ ജനിക്കുന്നത്‌.വേണ്ടി വന്നാലീ സദ്‌ഗുണം വലിച്ചെറിഞ്ഞിട്ടു നമ്മള്‍ പൈതൃകമെന്നീ വാക്കിനെ ചുട്ടെരിക്കേണം."

ഇതാണ്‌ മാതൃക

2009-07-02T19:38:00.000-07:00

ഇതാണ്‌ മാതൃക

അനുബന്ധം

കൈവശ ഭൂമിയുടെ വിവരം കാണിക്കുന്ന സത്യപ്രസ്‌താവന

ജില്ല താലൂക്ക്‌ വില്ലേജ്‌

മുനിസിപ്പാലിറ്റി/പഞ്ചായത്ത്‌

1കൈവശക്കാരന്റെ /(കൈവശക്കാരിയുടെ),കുടുംബനാഥന്റെ / (കുടുംബനാഥയുടെ) പേരും മുഴുവന്‍ മേല്‍ വിലാസവും

2അച്ഛന്റെ / അമ്മയുടെ പേര്‌

3...................................................

4കുടുംബാംഗങ്ങളുടെ വീട്ടില്‍ താമസിക്കുന്ന അംഗങ്ങളുടെ വിവരം------------------------------------------------------------------------ക്രമ നമ്പര്‍ പേര്‌ കുടുംബനാഥനും/ കൈവശഭൂമിയുടെവിവരം കുടുംബനാഥയുമായുള്ള ബന്ധം........................................................................................................................................................................................................................................................................................................................................................................................................................................................................................സത്യപ്രസ്‌താവന...............................................................................................................................................................................................................................................................................................................................കുടുംബനാഥന്റെ(കുടുംബ നാഥയുടെ)/കൈവശക്കാരന്റെ(കൈവശക്കാരിയുടെ)ഒപ്പ്‌

ഇതാണ്‌ മാതൃക അവിടേയും പെണ്ണിനെ കൂട്ടിനുള്ളിലാക്കാന്‍ നമ്മുടെ പുരുഷ സാമ്രാട്ടുക്കള്‍ പ്രത്യേകം ശ്രദ്ധിച്ചിട്ടുണ്ട്‌. ഈ രീതിയിലെങ്കിലും impliment ചെയ്‌തതിനു ശേഷമല്ലേ കൂടു മാറ്റുന്നതിനെപ്പറ്റി ചര്‍ച്ച ചെയ്യാന്‍ പറ്റൂ

എന്റെ വിധി

2009-07-01T15:33:00.000-07:00

എന്റെ വിധി

B.N SRIKRISHNA, & RAMACHANDRAN

-------------------------------------------------------------

(O.P.No.28856 of 1999,I)

----------------------------------------------------------------------------

Dated this the 27th day of september, 2001

JUDGEMENT

Sri Krishna,C.J

-------------------

With this direction we close this Original petition

(B.N.SRIKRISHNA)

(Chief Justice)

(RAMACHANDRAN)

Judge

കേരള സര്‍ക്കാര്‍

‍പൊതുഭരണ(ഏകോപന)വകുപ്പ്‌

സര്‍ക്കുലര്‍നമ്പര്‍ 15800/സി.ഡി.എന്‍4/2004/പൊ.ഭ.വ തിരുവനന്തപുരം 2004 ഏപ്രില്‍ 27.

സൂചന- 28856/99-നമ്പര്‍ ഒ.പി യിലെ ബഹു ഹൈക്കോടതിയുടെ 27-09-2001 ലെ വിധിന്യായം

ഹൗ...........ന്റെ മോളേ ഇനീം കയ്‌ച്ചൂട്ടണം മൂന്നീസം കൂടി.യ്‌ക്ക്‌ വയ്യേ.........

2009-06-30T03:35:00.000-07:00

ഹൗ...........ന്റെ മോളേ ഇനീം കയ്‌ച്ചൂട്ടണം മൂന്നീസം കൂടി.യ്‌ക്ക്‌ വയ്യേ.........
ഒരു കല്ല്യാണത്തിന്‌ പാര്‍ട്ടിയോടൊപ്പം അമ്പലത്തില്‍ പോകുമ്പോഴാണ്‌ ഞാന്‍ പാറുകുട്ടിയമ്മയെ പരിചയപ്പെടുന്നത്‌. എന്റെ മരുമകള്‍ അവരെ അമ്മായി എന്നു പരിചയപ്പെടുത്തിയതു കൊണ്ട്‌ ഞാനും അവരെ അങ്ങനെ വിളിച്ചു.ഏകദേശം ഒരു കിലോമീറ്റര്‍ നാട്ടുവഴിയിലൂടെ നടന്നാണ്‌ ചെക്കനോടും പാര്‍ട്ടിയോടുമൊത്ത്‌ ഞങ്ങള്‍ അമ്പലത്തിലേക്ക്‌ പോയത്‌. ആ വഴിയിലൂടെ നടക്കുമ്പോള്‍ അവരെന്റെടുക്കല്‍ വന്ന്‌ സ്വകാര്യമെന്നോണം പറഞ്ഞു
"വാ മോളേ............. നമ്മക്ക്‌ പാടീം കളിച്ചും നടക്കാം.ഇങ്ങനെ വെടുതെ നടന്നാ വെറുപ്പ്‌ പിടിക്കൂലേ."
?
എനിക്ക്‌ വളരെ അടുപ്പം തോന്നി. "അമ്മായി പാട്‌ ഡാന്‍സ്‌ കളിക്കാന്‍ ഞാനും കൂടാം".ഞാന്‍ അവരെ പിന്താങ്ങി.അവര്‍ പാടിയ തിരുവാതിര പാട്ടിനു താളം പിടിച്ച്‌ ഞാനും അവരോടൊപ്പം കൈകോര്‍ത്ത്‌ ഉറക്കെ പാട്ടു പാടി നടന്നു. വീഡിയോക്കോര്‍ ഞങ്ങളുടെ സന്തോഷം പകര്‍ത്തി.വിവാഹം കഴിഞ്ഞ ഉടനെതന്നെ തിരക്കു കാരണം അവരോടു യാത്ര പറയാതെ ഞാന്‍ തിരിച്ചു.
മാസങ്ങള്‍ കഴിഞ്ഞപ്പോള്‍ എന്റെ മരുമകള്‍ അവളുടെ അമ്മാവന്‍ മരിച്ചെന്നും പറഞ്ഞ്‌ എന്റെടുത്തു നിന്നും പോയി. തിരിച്ചു വന്നപ്പോള്‍ വല്ല്യമ്മായി അമ്മായിയെ കാണണമെന്നു പറഞ്ഞിട്ടുണ്ട്‌ എന്നു പറഞ്ഞു.എനിക്കറിയില്ലല്ലോ അവരെ എന്നു ഞാന്‍ പറഞ്ഞപ്പോള്‍ അന്ന്‌ കല്ല്യാണത്തിനു പോകുമ്പോള്‍ ഡാന്‍സു കളിച്ച അമ്മായിയുടെ ഭര്‍ത്താവാണ്‌ മരിച്ചു പോയതെന്ന്‌ പറഞ്ഞ്‌ അവള്‍ പാറുകുട്ടിയമ്മയെ എനിക്ക്‌ ഓര്‍മ്മപ്പെടുത്തിത്തന്നു.ഒരു ദിവസം ഓഫെടുത്ത്‌ ഞാന്‍ പാറുകുട്ടിയമ്മയെ കാണാന്‍ എന്റെ മരുമകളോടൊപ്പം അവരുടെ വീട്ടിലേക്കു പോയി. അന്നേക്ക്‌ അവരുടെ ഭര്‍ത്താവ്‌ മരിച്ചിട്ട്‌ എട്ടു ദിവസമായിരുന്നു.എഴുപത്തഞ്ചു വയസ്സോളം പ്രായം തോന്നുന്ന ആ സ്‌ത്രീയെ എങ്ങനെ ഇങ്ങനെയൊരു സാഹചര്യത്തില്‍ അഭിമുഖീകരിക്കും എന്നൊരു വല്ലായ്‌മ അവിടെത്തിയപ്പോള്‍ എനിക്കുണ്ടായി. വീട്ടിലെത്തിയ ഉടനെ തന്നെ മുറ്റത്തെ പന്തലില്‍ നിന്ന്‌ ചായ കുടിച്ച്‌ ഞാന്‍ പാറുകുട്ടിയമ്മയുടെ മകളോടും എന്റെ മരുമകളോടുമൊന്നിച്ച്‌ പാറുകുട്ടിയമ്മയുടെ മുറിയുടെ വാതില്‍ക്കലെത്തി.നിലത്ത്‌ ഒരു പായില്‍ ഇരുന്ന്‌ വേഷ്ടികൊണ്ട്‌ കഴുത്തില്‍ വീശിയും കുനിഞ്ഞ്‌ വായകൊണ്ട്‌ കഴുത്തിലേക്ക്‌ ഊതിയും ഏറെ അസ്വസ്ഥയായി വിയര്‍ത്തു കുളിച്ചിരിക്കുന്ന പാറുകുട്ടിയമ്മക്കു സമീപം കത്തികൊണ്ടിരിക്കുന്ന നിലവിളക്ക്‌.
"അമ്മേ ആരാ വന്നത്‌ന്ന്‌ നോക്കി " മകള്‍ എന്നെ ചേര്‍ത്തു പിടിച്ചുകൊണ്ട്‌ പറഞ്ഞു. പെട്ടന്ന്‌ പാറുകുട്ടിയമ്മ വീശിക്കൊണ്ടു തന്നെ എന്നെ നോക്കി.
"ആരാത്‌" ! പാറുകുട്ടിയമ്മയുടെ മുഖത്ത്‌ വല്ലാത്ത സന്തോഷം
"ദാ.... ഇങ്ങോട്ടിരിക്ക്‌" അകത്തെ ഒഴിഞ്ഞു കിടക്കുന്ന കസേര കാണിച്ചുകൊണ്ട്‌ പാറുകുട്ടിയമ്മ എന്നെ ക്ഷണിച്ചു.ഞാന്‍ അവിടെച്ചെന്നിരുന്നു. പ്രതീക്ഷിച്ച വിഷമാവസ്ഥ കാണാത്തതില്‍ എനിക്കാശ്വാസം തോന്നി." നല്ല ചൂട്‌ ല്ലേ വല്ലാതെ വിയര്‍ക്കുന്നുണ്ട്‌ ഞാന്‍ വീശിത്തരാം" എന്നു പറഞ്ഞ്‌ ഞാന്‍ അവിടുന്നൊരു പേപ്പറെടുത്ത്‌ മടക്കി അവരെ വീശി.അവര്‍ വീശല്‍ നിര്‍ത്തി ആശ്വാസം കൊണ്ടെന്നപോലെ എന്നോടായി പറഞ്ഞു
"ഹൗ...........ന്റെ മോളേ ഇനീം കയ്‌ച്ചൂട്ടണം മൂന്നീസം കൂടി.യ്‌ക്ക്‌ വയ്യേ......... ചൂടുംപൊകച്ചിലെടുത്തിറ്റ്‌ ....................... " മുറിയില്‍ ഫാന്‍ ഉണ്ടെങ്കിലും വിളക്കു കെട്ടുപോകുമെന്നുള്ളതിനല്‍ പ്രവര്‍ത്തിപ്പിക്കാനും കഴിയില്ല.അനവധി സ്ഥലങ്ങളില്‍ ഈ കാഴ്‌ച മറ്റൊരു ചിന്തയ്‌ക്കിടയില്ലാതെ ഞാന്‍ നോക്കി കടന്നു പോയിട്ടുണ്ട്‌. എന്നാല്‍ പാറുകുട്ടിയമ്മയുടെ നിഷ്‌കളങ്കമായ പ്രതികരണം സ്‌ത്രീയ്‌ക്ക്‌മേല്‍ സമൂഹം അടിച്ചേല്‍പ്പിക്കുന്ന ആചാരം എന്ന അടിമത്തത്തെപ്പറ്റി ചിന്തിക്കുന്നതിനിടയാക്കി.ഭര്‍ത്താവു മരിച്ചാല്‍ അതേ ദിവസം തലക്കല്‍ (തലഭാഗത്ത്‌) കത്തിച്ചു വെക്കുന്ന നിലവിളക്ക്‌ അണയാതെ പതിനൊന്ന്‌ ദിവസം കത്തിക്കണം.വിളക്കണയാതെ കുത്തിയിരിക്കുക എന്നത്‌ ഭാര്യമാരുടെ ചുമതലയാണ്‌. ഈ ക്രൂരകൃത്യം ധാരാളം കണ്ടിട്ടുണ്ടെങ്കിലും പരിഭവമില്ലാതെ ഈ കൃത്യം തുടരുന്ന സ്‌ത്രീകളുടെ മാനസീകാവസ്ഥയുടെ പ്രകടമായ രൂപമാണ്‌ പാറുകുട്ടിയമ്മയിലൂടെ എനിക്കു കാണാന്‍ കഴിഞ്ഞത്‌.ഒരിക്കലും ഭാര്യ മരിച്ചാല്‍ ഭര്‍ത്താവ്‌ ഇത്തരത്തില്‍ കാവലിരിക്കേണ്ട. ഭര്‍ത്താവെന്നല്ല ഒരാണും ക്ഷമകെട്ട്‌ ഇരിക്കുന്നതിന്‌ ആരും അയാളെ നിര്‍ന്ധിക്കില്ല.മരിച്ചതാരായാലും ആ ശരീരത്തിനു കൂട്ടിരിക്കുക എന്ന ബാധ്യത സ്‌ത്രീകളെത്തന്നെ ഏല്‌പിച്ച്‌ പുരുഷന്മാര്‍ മുട്ടാന്യായം പറഞ്ഞ്‌ ഉള്‍വലിയുന്നത്‌ ശ്രദ്ധിച്ചാല്‍ ആര്‍ക്കും മനസ്സിലാകും.

ATM card

2009-06-25T06:36:00.000-07:00

ATM card
എന്റെ മക്കള്‍ക്കു ഞാനിന്നൊരു
ATM card മാത്രം