Friday, March 13, 2009

അയാളിപ്പം നിങ്ങളുടെ പുറകിലിരിക്ക്യോ......... ?

അയാളിപ്പം നിങ്ങളുടെ പുറകിലിരിക്ക്യോ......... ?
ഞാന്‍ വൈത്തിരി സ്‌റ്റേഷനില്‍ ജോലി ചെയ്യുന്ന കാലത്താണ്‌ എനിക്ക്‌ ഡിപ്പാര്‍ട്ടുമെന്റെ്‌ ജീപ്പ്‌ ഓടിക്കുന്നതിനുള്ള ഓതറൈസേഷന്‍ കിട്ടിയത്‌.വര്‍ഷങ്ങളായി ഞാന്‍ നടത്തിയ എഴുത്തു കുത്തുകളുടെ ഫലം.എനിക്കനുവദിച്ച ബുള്ളറ്റ്‌ മോട്ടോര്‍ സൈക്കിള്‍ പോലീസ്‌ ക്യാമ്പില്‍ പോയി ഏറ്റുവാങ്ങി സ്‌റ്റേഷനില്‍ കൊണ്ടു വന്ന ദിവസം തന്നെ സ്‌റ്റേഷനില്‍ വല്ലാത്ത മുറുമുറുപ്പ്‌. ആരാ.........പ്പം അവരുടെ പുറകിലിരിക്ക്യാ എന്ന്‌ പലരും നേരിട്ടും അല്ലാതേയും എന്നെ പരിഹസിച്ചു.അവിടുന്ന്‌ രണ്ടു ദിവസം കഴിഞ്ഞപ്പോള്‍ സ്‌റ്റേഷനിലെ ജൂനിയര്‍ സബ്ബ്‌ ഇന്‍സ്‌പെക്ടര്‍ക്ക്‌ പടിഞ്ഞാറത്തറ പോലീസ്‌ സ്‌റ്റേഷനിലേക്ക്‌ അത്യാവശ്യമായി എത്തുന്നതിന്‌ വയര്‍ലെസ്‌ സന്ദേശം ലഭിച്ചു.സ്‌റ്റേഷനിലെ ജീപ്പ്‌ മറ്റേതോ ആവശ്യത്തിനായി പുറത്തു പോയതായിരുന്നു.സ്‌റ്റേഷനില്‍ എന്റെ ബുള്ളറ്റ്‌ ബൈക്കുള്‍പ്പെടെ മൂന്ന്‌ ബുള്ളറ്റ്‌ മോട്ടോര്‍ സൈക്കിളാണുള്ളത്‌.അന്നേ ദിവസം മറ്റു രണ്ടു ബൈക്കും പുറത്ത്‌ ഡ്യൂട്ടിയിലായിരുന്നു.സ്റ്റേഷനില്‍ ഫയല്‍ എഴുതിക്കൊണ്ടിരിക്കുകയായിരുന്ന എന്നെ വിളിച്ച്‌ സ്റ്റേഷന്‍ റൈട്ടര്‍ പറഞ്ഞു.
'വിനയാ.......... നിങ്ങളുടെ ബുള്ളറ്റൊന്ന്‌ ജൂനിയര്‍ എസ്‌.ഐ ക്ക്‌ വേണം "
"അതിനെന്താ..........." ഞാന്‍ അതിശയം പ്രകടിപ്പിച്ചു."അല്ലാ ബൈക്ക്‌ എസ്‌.ഐ എടുത്തോളും,നിങ്ങളാ വെഹ്‌ക്കിള്‍ ഡയറി ഒന്നെഴുതിയാല്‍ മതി.
"അതെന്തിനാ.......? എസ്‌.ഐ ബൈക്ക്‌ എടുക്കുമെങ്കില്‍ എസ്‌.ഐ ക്കു തന്നെ വെഹ്‌ക്കിള്‍ ഡയറിയും എഴുതരുതോ..... "?
"അല്ല വണ്ടി നിങ്ങളുടെ പേരിലല്ലേ............."?
"ഇന്നിപ്പം ഇവിടെ എനിക്ക്‌ എമര്‍ജന്‍സി ഡ്യൂട്ടിയൊന്നുമില്ലല്ലോ, ഞാന്‍ തന്നെ ബൈക്കെടുക്കാം അപ്പം പിന്നെ പ്രശ്‌നോം ഇല്ലല്ലോ" ഞാന്‍ എന്റെ നിലപാട്‌ വ്യക്തമാക്കി.
"അതിന്‌ അയാളിപ്പം നിങ്ങളുടെ പുറകിലിരിക്ക്വോ " റൈട്ടര്‍ ഗൗരവത്തോടെ എന്നോടായി പറഞ്ഞു
"അതിനിപ്പം ഞാനെന്തു ചെയ്യും.ഞാനെടുക്കാത്ത വണ്ടിയുടെ ഡയറി ഞാന്‍ എഴുതില്ല " എന്നും പറഞ്ഞ്‌ ഞാന്‍ എന്റെ ഫയലെഴുതാനായി പോയി.
എസ്‌.ഐ ബൈക്കെടുത്താല്‍ ഞാന്‍ വെഹിക്കള്‍ ഡയറി എഴുതുകയില്ലെന്ന്‌ എല്ലാവര്‍ക്കും നല്ല ബോധ്യമുള്ളതുകൊണ്ടും മറ്റു നിവൃത്തിയില്ലാത്തതു കൊണ്ടും എസ്‌.ഐക്ക്‌ എന്റെ പുറകിലിരുന്നു തന്നെ പടിഞ്ഞാറത്തറ വരെ യാത്ര ചെയ്യേണ്ടി വന്നുഎന്റെ പുറകിലൊരിക്കലും ഇരിക്കില്ലെന്ന്‌ വീമ്പു പറഞ്ഞവര്‍ തന്നെ പലപ്പോഴും എന്റെ സേവനം ആവശ്യപ്പെട്ടുകൊണ്ട്‌ എന്റെടുത്തെത്തുമ്പോള്‍ ഞാന്‍ ഉള്ളാലെ "ഇപ്പോളെന്തായി " എന്നു ചോദിക്കാറുണ്ടായിരുന്നു.

2 comments:

ഇ.എ.സജിം തട്ടത്തുമല said...

ഈ ബ്ലോഗിൽ ഇത്‌ ആദ്യ സന്ദർശനം.
ഈ പോസ്റ്റു വായിച്ചു.. നന്നായി.
വ്യത്യസ്ഥ മേഖലകളിലുള്ളവർ ഇതു പോലെ കടന്നുവന്ന്‌ അനുഭവങ്ങൾ പങ്കു വയ്ക്കട്ടെ. ബ്ലോഗിംഗ് രംഗം ഇനിയും സജീവമാകട്ടെ. ഭാവുകങ്ങൾ!

ശ്രീ said...

അത് നന്നായി